తెలంగాణ మంత్రి గంగుల కమలాకర్ కు చెందిన ఇళ్లు, కార్యాలయాల్లో ఎన్‌ఫోర్స్‌మెంట్ అధికారులు బుధవారం (నవంబరు 9) సోదాలు చేసిన సంగతి తెలిసిందే. అదే సమయంలో దుబాయ్ లో ఉన్న మంత్రి గంగుల కమలాకర్ ఈ విషయాన్ని తెలుసుకొని హుటాహుటిన హైదరాబాద్ కు చేరుకున్నారు. దుబాయ్ నుంచి బుధవారం రాత్రి శంషాబాద్ ఎయిర్ పోర్ట్ కి గంగుల కమలాకర్ చేరుకున్నారు. తాను దర్యాప్తు సంస్థలు, ప్రభుత్వానికి సంపూర్ణ సహకారం అందిస్తానని మంత్రి గంగుల తెలిపారు. బుధవారం రాత్రి శంషాబాద్ విమానాశ్రయం వద్ద మీడియాతో మాట్లాడారు.
‘‘విచారణ సంపూర్ణంగా చేయండి. నిజాలు నిగ్గుతేల్చాల్సిన బాధ్యత కేంద్ర సంస్థలదే. నేను దుబాయ్ పర్యటనలో ఉన్నప్పుడు ఈడీ అధికారులు వీడియో కాల్ చేశారు. ఫోన్ చేసి ఇంటి తాళాలు తీయమని అడిగారు. నేనే ఇంట్లోని ప్రతి లాకర్ ఓపెన్ చేసి చూసుకొమ్మని చెప్పా. ఈ సోదాల్లో ఎంత నగదు దొరికిందో, ఏమేం స్వాధీనం చేసుకున్నారో ఈడీ అధికారులు బయటకు చెప్పాలి’’ అని మంత్రి కమలాకర్ డిమాండ్ చేశారు.
‘‘ఈడీ సోదాల విషయం తెలుసుకొని ఈడీ అధికారులకు సహకరించేందుకే 16 గంటల్లోనే వచ్చేశాను. 32 సంవత్సరాలుగా నేను ఈ వ్యాపారం చేస్తున్నాను. పూర్తి పారదర్శకంగా వ్యాపారం జరుగుతుంది చట్టానికి ఎవరు చుట్టాలు కారు చట్టబద్ధంగా సహకరిస్తాను’’ అని మంత్రి గంగుల మీడియాతో అన్నారు.
‘‘గతంలో కూడా చాలా మంది మా పైన ఫిర్యాదు చేశారు. నిజానిజాలు తేల్చాల్సిన బాధ్యత వాళ్లదే. మేం ఓపెన్ గానే ఉన్నాం. మా గ్రానైట్ ఆఫీసులు, క్వారీలు అన్ని చెక్ చేశారు. బంధువుల ఇళ్లలో అందరి ఇళ్లలో తనిఖీలు చేశారు. నేను దుబాయ్ లో ఉన్నప్పుడు నాకు ఫోన్ చేశారు. వీడియో కాల్ ఆన్ చేసి మా ఇంట్లో ఏఏ లాకర్లు ఉన్నాయో అన్నీ ఓపెన్ చేయించాను. తాళాలు నా దగ్గరే ఉన్న వాటిని పగలగొట్టమని చెప్పింది కూడా నేనే. అధికారులు అంతా పత్రాలు పరిశీలించారు. దర్యాప్తు చేసుకునేందుకు పూర్తిగా సహకారం అందిస్తా. వారు ఏం అడిగినా అన్ని వివరాలు ఇచ్చేందుకు రెడీ. నేను దుబాయ్ వెళ్లి 17 గంటలే అయింది. ఈడీ అధికారులు సోదాల కోసం వచ్చారు కాబట్టి, నేను ఇక్కడ ఉండాల్సిన బాధ్యత ఉందని వెంటనే వచ్చేశాను.’’ అని గంగుల కమలాకర్ మాట్లాడారు.
ఈడీ అధికారుల సోదాలు
కరీంనగర్‌లోని 9 గ్రానైట్ సంస్థలు అక్రమాలకు పాల్పడ్డాయని పేరాల శేఖర్‌ రావు అనే వ్యక్తి సీబీఐ, జాతీయ హరిత ట్రిబ్యునల్ , కేంద్ర పర్యావరణశాఖకు గతేడాది ఫిర్యాదు చేశారు. అదే విషయంపై 2019లో కూడా బండి సంజయ్‌ కేంద్ర మంత్రి ఫిర్యాదు చేస్తూ లేఖ రాశారు. ఆ రెండు ఫిర్యాదుల ఆధారంగా దర్యాప్తు సంస్థలు సోదాలు నిర్వహిస్తున్నాయి.
ఈడీ, ఐటీ శాఖ అధికారులు 20 బృందాలుగా విడిపోయి హైదరాబాద్, కరీంనగర్‌లోని గ్రానైట్ సంస్థల యజమానుల ఇళ్లు, కార్యాలయాల్లో తనిఖీలు చేపట్టారు. హైదరాబాద్ సోమాజీగూడలోని పీఎస్ఆర్ గ్రానైట్స్ కార్యాలయం, హైదర్‌గూడ ఉప్పరపల్లిలోని ఎస్వీజీ గ్రానైట్స్ అధినేత ఇళ్లు, కార్యాలయంలో సోదాలు చేశారు. నిబంధనలకు విరుద్ధంగా ఎగుమతులు చేపట్టారనే సమాచారంతో కంపెనీ అధినేత శ్రీధర్‌ రావుకి కరీంనగర్‌లోని మూడు గ్రానైట్ క్వారీలతో సంబంధాలు ఉన్నట్లు అధికారులు గుర్తించారు.