HYDRA Chief Ranganath | హైదరాబాద్‌: నిబంధనలు అతిక్రమిస్తూ పర్మిషన్ లేకుండా నిర్మించే బిల్డింగ్స్ కూల్చడం తప్పదని,  నాలాలు, చెరువులు ఆక్రమించి నిర్మించే కట్టడాలు నేలమట్టం చేస్తామని హైడ్రా (HYDRAA) కమిషనర్ రంగనాథ్ హెచ్చరించారు. నగరంలోని గచ్చిబౌలి అంజయ్యనగర్‌లో శనివారం మధ్యాహ్నం కూలిన ఏడంతస్తుల భవనం స్థలాన్ని ఆయన పరిశీలించారు. అనంతరం ఆయన మీడియాతో మాట్లాడుతూ స్థానికుల ఫిర్యాదులను ప్రస్తావించారు. బిల్డర్ సాజిద్ నిర్మిస్తున్న భవనాలన్నీ నిబంధనలకు విరుద్ధంగానే ఉంటున్నాయని స్థానికులు చెబుతున్నారని, అలాంటి భవనాలన్నింటినీ త్వరలోనే కూల్చివేస్తామని ఆయన స్పష్టం చేశారు.

Continues below advertisement

కేవలం 50 గజాల పరిమిత స్థలంలో ఏడంతస్తుల భవనాన్ని నిర్మించడమే కాకుండా, నిబంధనలకు విరుద్ధంగా దానిపై మరొక పెంట్ హౌస్ కూడా నిర్మించారని రంగనాథ్ తెలిపారు. అంజయ్యనగర్‌లో సరైన సెట్‌బ్యాక్‌లు లేని భవనాలు చాలా ఉన్నాయని, నాలాలను ఆక్రమించి ఇష్టానుసారంగా కట్టిన ఇలాంటి అక్రమ కట్టడాలన్నింటినీ కూల్చివేస్తామని హెచ్చరించారు. ప్రస్తుతం వీటిని హాస్టళ్లుగా వాడుతుండటంతో, తక్షణమే ఖాళీ చేయాలని యజమానులకు సూచించారు. ఈ ప్రాంతంలో ఆక్రమణలు, అక్రమ నిర్మాణాలపై ప్రత్యేక డ్రైవ్ నిర్వహించి చర్యలు తీసుకుంటామని హైడ్రా కమిషనర్ రంగనాథ్ స్పష్టం చేశారు.

Continues below advertisement

Also Read: Hyderabad Building Collapse: గచ్చిబౌలిలో కుప్పకూలిన నిర్మాణంలో ఉన్న 7 అంతస్తుల బిల్డింగ్.. ఇద్దరు మృతి!  

ఒక్కసారిగా కుప్పకూలిన 7 అంతస్థుల బిల్డింగ్

గచ్చిబౌలిలోని అంజయ్య నగర్‌లో నాలా పక్కన 50 గజాల చిన్న స్థలంలో అక్రమంగా నిర్మిస్తున్న 7 అంతస్తుల భవనం ఒక్కసారిగా కుప్పకూలింది. ఈ ప్రమాదంలో టైల్స్, ఎలక్ట్రీషియన్ పనులు చేస్తున్న మధ్యప్రదేశ్‌కు చెందిన ఉమేష్, మహబత్ అనే ఇద్దరు కార్మికులు ప్రాణాలు కోల్పోయారు. శిథిలాల కింద చిక్కుకున్న మరికొందరి కోసం రెస్క్యూ టీమ్ సహాయక చర్యలు చేపడుతోంది. భవనం కూలిన తీవ్రతకు పక్కనే ఉన్న అపార్ట్‌మెంట్‌లో 10 ఫ్లాట్లు దెబ్బతిన్నాయి, సమీప హాస్టల్ విద్యార్థులు భయంతో బయటకు పరుగులు తీశారు. సాయంత్రం వేళ ఈ ప్రమాదం జరిగి ఉంటే భారీగా ప్రాణనష్టం జరిగేదని స్థానికులు తెలిపారు. రెస్క్యూ టీమ్ మృతదేహాలను వెలికితీయగా, పోలీసులు పోస్టుమార్టం కోసం ఆసుపత్రికి తరలించారు.