టెస్లా సీఈఓ ఎలాన్ మస్క్ శనివారం నాడు తాను పోస్ట్ చేసిన ట్విట్టర్ పోల్‌పై స్పందించారు. గతంలో ట్విట్టర్ నుంచి అమెరికా మాజీ అధ్యక్షుడు డొనాల్డ్ ట్రంప్‌ను బ్యాన్ చేసిన సంగతి తెలిసిందే. ఆయనను ఇందులోకి తిరిగి తీసుకురావాలా వద్దా అనే దానిపై ఓటు వేయాలని వినియోగదారులను కోరారు. ఈ పోల్ గంటకు 1 మిలియన్ ఓట్లను పొందుతున్నట్లు ఎలాన్ మస్క్ తెలిపారు. "ట్రంప్ పోల్ గంటకు ~1 మిలియన్ ఓట్లను పొందుతోంది!" అని మస్క్ ట్వీట్ చేశాడు. "హింసను మరింత ప్రేరేపించే ప్రమాదం కారణంగా" డొనాల్డ్ ట్రంప్‌ను 2021లో ట్విట్టర్ నుండి శాశ్వతంగా నిషేధించారు.
ఈ పోల్‌కు ఇప్పటికే 8 మిలియన్ల కంటే ఎక్కువ ఓట్లు వచ్చాయి. దాదాపు 52 శాతం మంది తీసుకురావాలి అని ఓటు వేశారు. 48 శాతం మంది వద్దు అని ఓటు వేశారు. ట్విట్టర్ ఉద్యోగులు కంపెనీలో "అత్యంత హార్డ్‌కోర్" పద్ధతిలో పనిచేయాలని లేదా ఉద్యోగాన్ని విడిచిపెట్టాలని ఎలాన్ మస్క్ నుండి అల్టిమేటం అందుకున్నట్లు నివేదించబడిన తర్వాత కంపెనీ నుండి నిష్క్రమిస్తున్నారు. కొత్త ట్విట్టర్ చీఫ్ హై ఇంటెన్సిటీతో ఎక్కువ గంటలు పని చేయాలని పిలుపునిచ్చారు.
ట్విట్లర్ నుంచి దాదాపు సగం మంది ఉద్యోగులను తొలగించిన తర్వాత ట్విట్టర్ ఇప్పుడు ఉద్యోగాలు కోల్పోయిన డజన్ల కొద్దీ ఉద్యోగులను సంప్రదించినట్లు తెలుస్తోంది. తిరిగి రావాలని కోరిన వారిని పొరపాటున తీసేశామని చెప్తున్నట్లు బ్లూమ్‌బెర్గ్ తన కథనంలో పేర్కొంది. మస్క్ ఊహించిన కొత్త ఫీచర్లను రూపొందించడానికి వారి అనుభవం అవసరమని మేనేజ్‌మెంట్ గ్రహించకముందే కొందరిని తీసేశారని బ్లూమ్‌బర్గ్ తెలిపింది.
సోషల్ మీడియా ప్లాట్‌ఫారమ్ గత వారం ఈమెయిల్ ద్వారా దాదాపు 3,700 మంది వ్యక్తులను తొలగించింది. ఎలాన్ మస్క్ ట్విట్టర్‌ను టేకోవర్ చేసిన తర్వాత ఖర్చులను తగ్గించే ప్రయత్నంలో ఉంది. ఈ-మెయిల్, స్లాక్ వంటి కంపెనీ సిస్టమ్‌లకు వారి యాక్సెస్‌ను అకస్మాత్తుగా సస్పెండ్ చేసిన తర్వాత చాలా మంది ఉద్యోగులు ఈ నిర్ణయం గురించి తెలుసుకున్నారు. ఇప్పుడు కొందరిని తిరిగి రమ్మనడం ఉద్యోగులను తొలగించే విషయంలో కంపెనీ ఎంత అస్తవ్యస్తమైన ప్రక్రియను పాటించిందో తెలియజేస్తుంది.
"Twitterలో ఉద్యోగులను తగ్గించడం గురించి చూస్తే కంపెనీ రోజుకు 4 మిలియన్ డాలర్లకు పైగా నష్టపోతున్నప్పుడు మరో ఆప్షన్ లేదు." అని మస్క్ గతంలో ట్వీట్ చేశారు. ట్విటర్‌లో ప్రస్తుతం దాదాపు 3,700 మంది ఉద్యోగులు మిగిలి ఉన్నారు.
వీరిని మస్క్ కొత్త ఫీచర్లను అమలు చేయడానికి కంపెనీలో ఉంచారు. కొన్ని సందర్భాల్లో ఉద్యోగులు టార్గెట్లను చేరుకోవడానికి కార్యాలయంలోనే పడుకున్నారు. "పేరడీ అని స్పష్టంగా పేర్కొనకుండా ఎవరైనా మరొకరి ట్విట్టర్ హ్యాండిల్‌ను అనుకరించే ఖాతా తెరిస్తే దాన్ని శాశ్వతంగా నిలిపివేస్తాం." అని ఎలాన్ మస్క్ ట్వీట్ చేశాడు.