రియల్‌మీ 10 సిరీస్‌లో టాప్ మోడల్ వేరియంట్ అయిన రియల్‌మీ 10 ప్రో ప్లస్ మార్కెట్లో లాంచ్ అయింది. ఇందులో 6.7 అంగుళాల అమోఎల్‌డీ డిస్‌ప్లేను అందించారు. ఈ స్మార్ట్ ఫోన్‌లో 108 మెగాపిక్సెల్ కెమెరాను రియల్‌మీ అందించింది. రెడ్‌మీ నోట్ 12 ప్రో ప్లస్ స్మార్ట్‌ఫోన్‌తో రియల్‌మీ 10 ప్రో ప్లస్ పోటీ పడనుంది. అయితే రెడ్‌మీ ఫోన్‌లో 200 మెగాపిక్సెల్ కెమెరా ఉంది.
రియల్‌మీ 10 ప్రో ప్లస్ ధర
ఈ ఫోన్ మూడు వేరియంట్లలో కొనుగోలు చేయవచ్చు. వీటిలో ప్రారంభ వేరియంట్ అయిన 8 జీబీ ర్యామ్ + 128 జీబీ స్టోరేజ్ వేరియంట్ ధర 1,699 యువాన్లుగా (సుమారు రూ.19,500) ఉంది. ఇక 8 జీబీ ర్యామ్ + 256 జీబీ స్టోరేజ్ వేరియంట్ ధర 1,999 యువాన్లు (సుమారు రూ.23,000) కాగా, 12 జీబీ ర్యామ్ + 256 జీబీ స్టోరేజ్ ఉన్న వేరియంట్ ధరను 2,299 యువాన్లుగా (సుమారు రూ.26,500) నిర్ణయించారు. నైట్, ఓషన్, స్టార్‌లైట్ కలర్ ఆప్షన్లలో రియల్‌మీ 10 ప్రో ప్లస్‌ను కొనుగోలు చేయవచ్చు. ఈ ఫోన్ మనదేశంలో కూడా లాంచ్ కానుందని రియల్‌మీ ప్రకటించింది.
రియల్‌మీ 10 ప్రో ప్లస్ స్పెసిఫికేషన్లు, ఫీచర్లు
ఇందులో 6.7 అంగుళాల 61 డిగ్రీ కర్వేచర్ అమోఎల్ఈడీ డిస్‌ప్లేను అందించారు. ఇన్‌డిస్‌ప్లే ఫింగర్ ప్రింట్ సెన్సార్‌ను ఈ ఫోన్‌లో అందించారు. దీని స్క్రీన్ రిఫ్రెష్ రేట్ 120 హెర్ట్జ్‌గా ఉంది. మీడియాటెక్ డైమెన్సిటీ 1080 ప్రాసెసర్‌పై రియల్‌మీ 10 ప్రో ప్లస్ పని చేయనుంది. 12 జీబీ వరకు ఎల్పీడీడీఆర్4ఎక్స్ ర్యామ్, 256 జీబీ యూఎఫ్ఎస్ 2.2 స్టోరేజ్ ఇందులో అందించారు.
ఇక కెమెరాల విషయానికి వస్తే... ఫోన్ వెనకవైపు మూడు కెమెరాలు అందుబాటులో ఉన్నాయి. వీటిలో ప్రధాన కెమెరా సామర్థ్యం 108 మెగాపిక్సెల్ కాగా, దీంతోపాటు 8 మెగాపిక్సెల్ అల్ట్రా వైడ్ యాంగిల్ సెన్సార్, 2 మెగాపిక్సెల్ మోనోక్రోమ్ కెమెరా కూడా ఉన్నాయి. సెల్ఫీలు, వీడియో కాల్స్ కోసం ముందువైపు 16 మెగాపిక్సెల్ కెమెరా అందించారు. ఆండ్రాయిడ్ 13 ఆధారిత రియల్‌మీ యూఐ 4.0 ఆపరేటింగ్ సిస్టంపై రియల్‌మీ 10 ప్రో ప్లస్ పని చేయనుంది.
దీని బ్యాటరీ సామర్థ్యం 5000 ఎంఏహెచ్ కాగా, 67W ఫాస్ట్ చార్జింగ్‌ను ఈ ఫోన్ సపోర్ట్ చేయనుంది. దీని మందం 0.77 సెంటీమీటర్లు కాగా, బరువు 173 గ్రాములుగా ఉంది. డ్యూయల్ స్టీరియో స్పీకర్లు, ఎక్స్-యాక్సిస్ లీనియర్ వైబ్రేషన్ మోటార్ కూడా ఈ ఫోన్‌లో ఉంది.
Also Read: ఐఫోన్ 14 సిరీస్ వచ్చేసింది - ధర విషయంలో జాగ్రత్త పడ్డ యాపిల్ - మనదేశంలో ఎంతంటే?