Strict Action on Banned Apps : డిజిటల్ కంటెంట్‌ను నియంత్రించే దిశగా భారత ప్రభుత్వం చురుకుగా పని చేస్తోంది. అందులో భాగంగా అశ్లీల కంటెంట్ ను వ్యాప్తి చేస్తున్నారన్న ఆరోపణలతో కేంద్రం.. 2024 డిసెంబర్ లో 18 ఓటీటీ యాప్ లను బ్లాక్ చేసింది. డిజిటల్ జవాబుదారీతనాన్ని అమలు చేయడానికి, భారతీయ వినియోగదారుల ప్రయోజనాలను రక్షించడానికి చర్యలు చేపట్టిన కేంద్రం.. ఈ తరహా కంటెంట్ ను అందిస్తోన్న యాప్ లపై కఠిన చర్యలు తీసుకుంది. సమాచార, ప్రసార మంత్రిత్వ శాఖ కొన్ని రోజుల క్రితమే ఈ కోవకు చెందిన అనేక యాప్ లను బ్యాన్ చేసింది. ఈ ప్లాట్ ఫారమ్స్ భారతీయ చట్టాలను ఉల్లంఘించి అశ్లీల, అసభ్య కంటెంట్ ను చూపుతున్నట్టు గా అధికారులు గుర్తించారు. ఈ నేపథ్యంలో తాజాగా వాటికి సంబంధించిన 19 వెబ్ సైట్ లు, 10 మొబైల్ యాప్ లు, 57 సోషల్ మీడియా అకౌంట్ల పై చర్యలకు ఉపక్రమించింది. ఈ యాప్స్, వెబ్ సైట్స్ ను ఇప్పుడు ఇండియాలో యాక్సెస్ చేయడం వీలు కాదు.
IT రూల్స్ 2021 కింద కేంద్రం చర్యలు
కొత్త IT రూల్స్ 2021లో భాగంగా, ఓటీటీ (OTT) ప్లాట్‌ఫారమ్‌ల నుండి హానికరమైన కంటెంట్‌ను తొలగించడంపై ప్రభుత్వం దృష్టి సారించింది. ఈ నియమాలు డిజిటల్ మీడియాను నియంత్రించడానికి, కంటెంట్ సామాజిక విలువలకు అనుగుణంగా ఉండేలా రూపొందించారు. ఇటీవల శీతాకాల సమావేశాల సందర్భంగా మర్యాదను కాపాడుకోవడం, నైతిక జర్నలిజాన్ని రక్షించడం ప్రాముఖ్యతను నొక్కిచెప్పిన కేంద్ర సమాచార, ప్రసార శాఖ సహాయ మంత్రి ఎల్.మురుగన్.. ఈ సందర్భంగా ప్రభుత్వ చర్యను హైలైట్ చేశారు. ఐటీ చట్టం 2021 ప్రకారం 18 ఓటీటీ ప్లాట్ ఫారమ్స్ ను నిషేధించాలని కేంద్రం నిర్ణయించిందని తెలిపారు. ఈ యాప్ లు అశ్లీల, అసభ్యకరమైన కంటెంట్ ను ప్రసారం చేస్తున్నారని ఆరోపించారు.
ప్రభుత్వం బ్లాక్ చేసిన యాప్‌లు ప్రధానంగా అభ్యంతరకరమైన విషయాలను చూపించే ప్లాట్‌ఫారమ్‌లు. ఇప్పుడు ఈ 18 యాప్‌లను నిషేధించారు:
- యస్స్మా(Yessma)
- ఎక్స్ ట్రా మూడ్ (Xtramood)
- ఫుగి (Fugi)
- డ్రీమ్స్ ఫిల్మ్స్ (Dreams Films)
- నియాన్ X VIP
- బేషరామ్స్(Besharams)
- వూవి(Voovi)
- చికూఫ్లిక్స్ (Chikooflix)
- హంటర్స్ (Hunters)
- అన్ కట్ అడ్డా (Uncut Adda)
- ఎక్స్ ప్రైమ్ (X Prime)
- న్యూఫ్లిక్స్ (Nuefliks)
- ప్రైమ్ ప్లే (Prime Play)
- మోజ్ ఫ్లిక్స్ (Mojflix)
- ట్రై ఫ్లిక్స్(Tri Flicks)
- ర్యాబిట్ (Rabbit)
- హాట్ షాట్స్ వీఐపీ (Hot Shots VIP)
- మూడ్ఎక్స్ (MoodX)
ఈ ప్లాట్‌ఫారమ్‌లు అసభ్యకరమైన కంటెంట్ ను అందిస్తూ ఐటీ చట్టంలోని 67, 67ఏ సెక్షన్ లను ఉల్లంఘిస్తున్నట్లు కనుగొన్నారు. ఈ నేపథ్యంలో యాప్‌లను బ్లాక్ చేయడంతో పాటు, ప్రభుత్వం ఐపీసీలోని సెక్షన్ 292 కింద కేసులు నమోదు చేసింది. ఇవి మహిళల గౌరవాన్ని కించపర్చేలా, అనుచితంగా ఉన్నాయని మంత్రిత్వ శాఖ గుర్తించింది. వీటిలో చాలా యాప్‌లు గణనీయమైన ప్రజాదరణ పొందాయి. వీటిలో కొన్ని 1 కోటికి పైగా డౌన్‌లోడ్‌లను కలిగి ఉంటే... ఈ యాప్ లకు సోషల్ మీడియాలో 32 లక్షల మంది ఫాలోవర్లు ఉన్నారు. వారు అభ్యంతరకరమైన కంటెంట్‌ను ప్రచారం చేయడానికి ఫేస్ బుక్, వాట్సాప్ (WhatsApp), యూట్యూబ్ (YouTube)వంటి సోషల్ మీడియా ప్లాట్‌ఫారమ్స్ ను కూడా విరివిగా ఉపయోగిస్తున్నారు.