IND vs ENG: 1000 రోజులుగా 100 కరవు! ఆడుతోంది నిజంగా కోహ్లీయేనా అని డౌటు!!

Virat kohli: విరాట్‌ కోహ్లీ..! అంతర్జాతీయ క్రికెట్లో మంచినీళ్ల ప్రాయంగా సెంచరీలు కొట్టిన ఆటగాడు! ఏమైందో తెలియదు. మూడేళ్లుగా ఏ ఫార్మాట్లోనూ శతకం అందుకోలేదు.

IND vs ENG, Virat Kohli: విరాట్‌ కోహ్లీ..! అంతర్జాతీయ క్రికెట్లో మంచినీళ్ల ప్రాయంగా సెంచరీలు కొట్టిన ఆటగాడు! ఏమైందో తెలియదు. మూడేళ్లుగా ఏ ఫార్మాట్లోనూ శతకం అందుకోలేదు. ఒకవేళ అతడు ఇంగ్లాండ్‌తో మూడో వన్డేలోనూ మూడంకెల స్కోరు అందుకోకపోతే కోరుకోని రికార్డును ఖాతాలో వేసుకుంటాడు. 1000 రోజులుగా 100 కొట్టని ఆటగాడిగా మిగులుతాడు.

ఇంటర్నేషనల్‌ క్రికెట్లో విరాట్‌ కోహ్లీ (Virat Kohli) 2019, నవంబర్‌ 13న చివరి సెంచరీ కొట్టాడు. ఈడెన్‌ గార్డెన్స్‌ వేదికగా బంగ్లాదేశ్‌తో జరిగిన గులాబి టెస్టులో శతకబాదాడు. 136 పరుగులు చేశాడు. అతడి కెరీర్లో ఇది 70వ శతకం. ఆ తర్వాత సిరీసులోనే ఒకట్రెండు శతకాలు బాదేసి రికీ పాంటింగ్‌ 71 సెంచరీల రికార్డు బద్దలు కొట్టేస్తాడని అభిమానులు ఆశించారు. కానీ అలా జరగలేదు. నెల గడిచింది. రెండు నెలలు గడిచాయి. చూస్తుండగానే ఏడాది గడిచింది. ఇప్పుడు మూడేళ్లు గడుస్తున్నాయి. ఫ్యాన్స్‌ కళ్లు కాయలు కాసాయే తప్ప విరాట్‌ బ్యాటు నుంచి వంద రాలేదు.

ఇంగ్లాండ్‌ సిరీసులోనూ విరాట్‌ ఎక్కువ పరుగులు చేయలేదు. టెస్టులో 11, 20 చేశాడు. రెండో టీ20లో ఒక పరుగుకే పెవిలియన్‌ చేరాడు. మూడో టీ20లో 11 పరుగులకు ఔటయ్యాడు. గజ్జల్లో గాయంతో తొలి వన్డేకు దూరమయ్యాడు. లార్డ్స్‌ వేదికగా జరిగిన మ్యాచులో 16 కొట్టాడు. ఒకవేళ మాంచెస్టర్లో మూడో వన్డేలో గనక మూడంకెల స్కోరు చేయకపోతే అనవసర రికార్డు అందుకోవాల్సి వస్తుంది. 1000 రోజులుగా సెంచరీ కొట్టని క్రికెటర్‌గా ఉంటాడు. 

ఎందుకంటే ఈ సిరీస్‌ తర్వాత అతడికి సెలక్టర్లు విశ్రాంతి ఇచ్చారు. వెస్టిండీస్‌ పర్యటనకు ఎంపిక చేయలేదు. పనిభారం ఒకటైతే మానసిక విశ్రాంతి మరొక కారణం. కరీబియన్‌ దీవుల నుంచి తిరిగొచ్చాక టీమ్‌ ఇండియా ఆసియా కప్‌లో తలపడుతుంది. అందుకోసం విరాట్‌ ఆగస్టు 19 వరకు ఆగాల్సి ఉంటుంది. అందుకే మాంచెస్టర్లోనే కింగ్‌ కోహ్లీ తన మునుపటి ఫామ్‌ అందుకోవాలని అభిమానులు ఆశిస్తున్నారు.

ఛేదనలో విరాట్‌ కోహ్లీ బరిలోకి దిగితే ప్రత్యర్థి బౌలర్లు హడలెత్తిపోయేవాళ్లు. అతడిని ఎలా ఔట్‌ చేయాలో అని సతమతం అయ్యేవాళ్లు. అతడికి బంతులేసేందుకు భయపడేవాళ్లు. అలాంటిది రెండున్నరేళ్లుగా విరాట్‌ పరుగులు చేసేందుకు ఇబ్బంది పడుతున్నాడు. అడపాదడపా హాఫ్‌ సెంచరీలు చేస్తున్నా, మిగతా క్రికెటర్లతో పోలిస్తే సగటు బాగున్నా. తన మునుపటి స్థాయి అందుకోవడం లేదు.

ఇప్పటి వరకు 102 టెస్టులాడిన కోహ్లీ 50 సగటుతో 8074 పరుగులు చేశాడు. 261 వన్డేల్లో 57 సగటుతో 12327, 99 టీ20ల్లో 50 సగటుతో 3308 రన్స్‌ సాధించాడు. రెండు ఫార్మాట్లలో కలిసి 70 సెంచరీలు కొట్టాడు. అన్ని ఫార్మాట్లలో కలిపి ఏటా 2000 రన్స్‌ చేసే కింగ్‌ కోహ్లీ 2020లో 842, 2021లో 964, 2022లో 459 మాత్రమే సాధించాడు. అతడు త్వరగా ఫామ్‌ అందుకోవాలని అభిమానులు, టీమ్‌ఇండియా కోరుకుంటోంది.