కోల్‌కతా ప్రిన్స్, దాదా, టీమిండియా మాజీ సారథి, బీసీసీఐ అధ్యక్షుడు సౌరభ్‌ గంగూలీ అభిమానులకు గుడ్ న్యూస్. త్వరలోనే అతడి జీవిత కథ ఆధారంగా బయోపిక్ రానుంది. ఈ విషయాన్ని స్వయంగా దాదానే సామాజిక మాధ్యమాల ద్వారా అభిమానులతో పంచుకున్నాడు. ఎన్నాళ్లుగానో ఎదురుచూస్తున్న అభిమానులకు నిజంగా ఇది శుభవార్త అనే చెప్పాలి.
ఈ నేపథ్యంలో గంగూలీ ‘క్రికెటే నా జీవితంగా మారింది. అది నా ఆత్మవిశ్వాసాన్ని పెంచడమే కాదు ఏ సందర్భంలోనూ తలవంచకుండా ముందుకు సాగడాన్ని నేర్పింది. ఈ ప్రయాణం ఆస్వాదించదగింది. లవ్‌ఫిల్మ్స్‌ చిత్ర నిర్మాణ సంస్థ నా జీవితాన్ని వెండి తెరపైకి తీసుకొచ్చే బాధ్యత తీసుకోవడం చాలా ఆనందంగా ఉంది’ అంటూ దాదా తన సామాజిక మాధ్యమాల్లో పేర్కొన్నాడు. ఇప్పట వరకైతే గంగూలీ పాత్రలో ఎవరు నటిస్తారనేది తెలియదు.
గతంలో దాదా ఓ సందర్భంలో మాట్లాడుతూ... తన బయోపిక్‌లో హృతిక్‌రోషన్‌ నటిస్తే బాగుంటుందని చెప్పాడు. దాదా తనపై బయోపిక్ రూపొందుతోందని చెప్పగానే అప్పటి వీడియో వైరల్‌గా మారింది. మరి గంగూలీ కోరిక మేరకు హృతిక్‌ ఆ పాత్రను పోషిస్తాడో లేదో చూడాలి. లేదంటే మరో నటుడు ఈ పాత్రలో చూస్తామో తెలియాలంటూ కొద్ది రోజులు వేచి చూడాల్సిందే