ప్రధాని నరేంద్ర మోదీ కీల‌క నిర్ణయం తీసుకున్నారు. క్రీడ‌ల్లో అత్యున్న‌త పురస్కారం అయిన ‘రాజీవ్ గాంధీ ఖేల్‌ర‌త్న’ పేరును ‘మేజర్ ధ్యాన్‌చంద్ ఖేల్‌ర‌త్న’( Major Dhyan Chand Khel Ratna ) అవార్డుగా మార్చారు. ఇకపై దీనిని మేజర్ ధ్యాన్ చంద్ ఖేల్ రత్న పురస్కారం అని పిలుస్తారు. దేశ ప్రజల మనోభావాలను గౌరవిస్తూ ఈ నిర్ణయం తీసుకున్నట్లు ప్రధానమంత్రి నరేంద్ర మోదీ ట్వీట్ వేదికగా తెలిపారు.
‘ఖేల్ రత్న అవార్డుకు మేజర్ ధ్యాన్ చంద్ పేరు పెట్టాలని భారతదేశం నలుమూలల నుంచి నాకు వినతులు వస్తున్నాయి. అభిప్రాయాలు వెల్లడించిన వారందరికీ ధన్యవాదాలు చెప్తున్నాను. ఖేల్ రత్న అవార్డును ఇకపై మేజర్ ధ్యాన్ చంద్ ఖేల్ రత్న అవార్డుగా పిలుస్తాం. జై హింద్’అంటూ ట్వీట్ చేశారు. హాకీ లెజెండ్ ధ్యాన్‌చంద్ జ‌యంతి అయిన ఆగ‌స్ట్ 29ని ఇప్ప‌టికే జాతీయ క్రీడా దినోత్స‌వంగా జ‌రుపుకుంటున్న విష‌యం తెలిసిందే.
ఖేల్ రత్న పురస్కారాన్ని 1991-92లో ఏర్పాటు చేశారు. ఈ పురస్కారం క్రింద రూ.25 లక్షలు నగదు బహుమతి ఇస్తారు. చెస్ ప్లేయర్ విశ్వనాథన్ ఆనంద్‌‌కి మొట్టమొదటసారి ఈ పురస్కారం అందజేశారు. టెన్నీస్ క్రీడాకారుడు లియాండర్ పేస్, క్రికెట్ దేవుడు సచిన్ టెండూల్కర్, ధన్‌రాజ్ పిళ్లై, పుల్లెల గోపీచంద్, అభినవ్ బింద్రా, అంజు బాబీ జార్జ్, మేరీ కోమ్, రాణీ రాంపాల్ కూడా ఈ పురస్కారాన్ని అందుకున్న వారి జాబితలో ఉన్నారు.
మేజర్ ధ్యాన్ చంద్ ఫీల్డ్ హాకీ ప్లేయర్. ఆయన 1926 నుంచి 1949 వరకు అంతర్జాతీయ హాకీ పోటీల్లో పాల్గొన్నారు. తన కెరీర్‌లో 400కు పైగా గోల్స్ స్కోర్ సాధించారు. 1928, 1932, 1936లలో ఒలింపిక్స్ బంగారు పతకాలను గెలుచుకున్న ఇండియన్ హాకీ టీమ్‌లో ఆయన సభ్యుడు.
క్రీడా రంగంలో జీవితకాల సాఫల్యం సాధించిన వారికి ధ్యాన్ చంద్ అవార్డును ఇస్తున్న సంగతి తెలిసిందే. దీనిని 2002లో ఏర్పాటు చేశారు. న్యూఢిల్లీలోని ఓ స్టేడియంకు కూడా 2002లో ధ్యాన్‌చంద్ పేరు పెట్టారు.