IPL 2024 LSG vs GT Match Preview and prediction : ఐపీఎల్‌(IPL)లో మరో రసవత్తర సమరానికి రంగం సిద్ధమైంది. గుజరాత్‌ టైటాన్స్‌(GT)తో లక్నో సూపర్‌ జెయింట్స్‌(LSG) అమీతుమీ తేల్చుకోనుంది. లక్నో నయా సెన్సేషన్‌ మయాంక్‌ యాదవ్‌ ప్రత్యేక ఆకర్షణగా నిలవనున్న ఈ మ్యాచ్‌లో మరో విజయం నమోదు చేయాలని లక్నో సూపర్‌ జెయింట్స్‌ భావిస్తోంది. వరుసగా రెండు మ్యాచుల్లో గెలిచిన లక్నో మూడో గెలుపుపై కన్నేసింది. 

చూపంతా మాయంక్‌పైనే కొత్త పేస్ సెన్సేషన్ మయాంక్ యాదవ్ వరుసగా రెండు ప్లేయర్ ఆఫ్ ది మ్యాచ్ అవార్డులను గెలుచుకుని సత్తా చాటడం లక్నోకు వరంలా మారింది. పంజాబ్ కింగ్స్‌తో జరిగిన మ్యాచ్‌లో అరంగేట్రం చేసిన 21 ఏళ్ల మాయంక్‌ యాదవ్‌ తొలి మ్యాచ్‌లో 27 పరుగులు ఇచ్చి మూడు వికెట్లు తీశాడు. ఇంగ్లాండ్ బ్యాటర్ జానీ బెయిర్‌స్టోను తన పేస్‌తో ఆశ్చర్యపరిచాడు. రాయల్ ఛాలెంజర్స్ బెంగళూరుపై 3/14 గణాంకాలతో ఆర్సీబీ ఓటమికి ప్రధామ కారణమయ్యాడు. ఆస్ట్రేలియన్ ఆల్‌రౌండర్ గ్లెన్ మాక్స్‌వెల్‌ను 151 కిలోమీటర్ల వేగంతో బంతులు సంధించి ఆశ్చర్యపరిచాడు. మయాంక్‌ యాదవ్‌ అద్భుతమైన ప్రదర్శనలు... ఈ మ్యాచ్‌లో చూపంతా అతడిపైనే ఉండేలా చేశాయి. లక్నో ఓపెనింగ్‌ జోడీ క్వింటన్ డి కాక్-  KL రాహుల్‌లు మరోసారి భారీ భాగస్వామ్యం నెలకొల్పాలని చూస్తున్నారు.

నికోలస్ పూరన్ ఫినిషింగ్ ఓవర్లలో లక్నోకు భారీ స్కోరు అందిస్తూ తన పాత్రను సమర్థంగా పోషిస్తున్నాడు. కానీ దేవదత్ పడిక్కల్, ఆల్ రౌండర్ మార్కస్ స్టోయినిస్ ఫామ్‌లోకి రావాలని లక్నో కోరుకుంటోంది. లక్నో బౌలింగ్‌లో మాయాంక్‌ యాదవ్‌కు నవీన్-ఉల్-హక్, యశ్ ఠాకూర్, మొహ్సిన్ ఖాన్, స్టోయినిస్ , లెగ్ స్పిన్నర్ రవి బిష్ణోయ్ సహకరించాల్సి ఉంది. మూడు మ్యాచుల్లో రెండు విజయాలతో పాయింట్ల పట్టికలో నాల్గో స్థానంలో ఉన్న LSG.. ఈ సీజన్‌లో వరుసగా మూడో విజయాన్ని నమోదు చేయాలని చూస్తోంది. 

గుజరాత్‌ సమస్యలు తీరేనా..?కొత్త కెప్టెన్ శుభ్‌మన్ గిల్ నేతృత్వంలో గుజరాత్‌కు భిన్నమైన ఫలితాలు వచ్చాయి. రెండు మ్యాచులు గెలిచి రెండు మ్యాచుల్లో ఓడి పాయింట్ల పట్టికలో ఏడో స్థానంలో గుజరాత్‌ ఈ మ్యాచ్‌లో గెలవాలని పట్టుదలతో ఉంది. గత మ్యాచ్‌లో 48 బంతుల్లో అజేయంగా 89 పరుగులు చేసిన గిల్ ప్రత్యర్థులకు హెచ్చరికలు పంపాడు. అదే ఫామ్‌ కొనసాగించాలని  గిల్‌ చూస్తున్నాడు. సాయి సుదర్శన్ మంచి టచ్‌లో కనిపించాడు. అయితే భారీ స్కోర్లు నమోదు చేయాలని సుదర్శన్‌ కన్నేశాడు. 

జట్లు గుజరాత్ టైటాన్స్: శుభమన్ గిల్ (కెప్టెన్‌), డేవిడ్ మిల్లర్, మాథ్యూ వేడ్, వృద్ధిమాన్ సాహా, రాబిన్ మింజ్, కేన్ విలియమ్సన్, అభినవ్ మంధర్, బి సాయి సుదర్శన్, దర్శన్ నల్కండే, విజయ్ శంకర్, అజ్మతుల్లా ఒమర్జాయ్, షారుక్ ఖాన్, జయంత్ యాదవ్ ., రాహుల్ తెవాటియా, కార్తీక్ త్యాగి, శాంత్ మిశ్రా, స్పెన్సర్ జాన్సన్, నూర్ అహ్మద్, సాయి కిషోర్, ఉమేష్ యాదవ్, రషీద్ ఖాన్, జాషువా లిటిల్, మోహిత్ శర్మ, మానవ్ సుతార్. 

లక్నో సూపర్ జెయింట్స్: కేఎల్ రాహుల్ (కెప్టెన్‌), క్వింటన్ డి కాక్, నికోలస్ పూరన్, ఆయుష్ బదోని, కైల్ మేయర్స్, మార్కస్ స్టోయినిస్, దీపక్ హుడా, దేవదత్ పడిక్కల్, రవి బిష్ణోయ్, నవీన్-ఉల్-హక్, కృనాల్ పాండ్యా, యుధ్వీర్ సింగ్, ప్రేరక్ మన్కద్ యశ్ ఠాకూర్, అమిత్ మిశ్రా, షమర్ జోసెఫ్, మయాంక్ యాదవ్, మొహ్సిన్ ఖాన్, గౌతం, అర్షిన్ కులకర్ణి, ఎం. సిద్ధార్థ్, అష్టన్ టర్నర్, మాట్ హెన్రీ, మొహమ్మద్ అర్షద్ ఖాన్.