MI vs DC Live Updates: అయ్యో.. ముంబయి! కీలక మ్యాచులో ఓటమి
ఐపీఎల్‌ మ్యాచ్‌-46లో తలపడుతున్న ముంబయి ఇండియన్స్‌, దిల్లీ క్యాపిటల్స్. విజయమే లక్ష్యంగా బరిలోకి దిగిన ముంబయి. ప్లేఆఫ్స్‌కు చేరుకోవాలని దిల్లీ పట్టుదల.
కృనాల్‌ వేసిన 19.1వ బంతిని అశ్విన్‌ (20) సిక్సర్‌గా బాదేసి ఉత్కంఠకు తెరదించాడు. ముంబయికి ఎక్కువ అవకాశం ఇవ్వలేదు. మరోఎండ్‌లో శ్రేయస్‌ (33) అజేయంగా నిలిచాడు. దిల్లీ 19.1 ఓవర్లకు 4 వికెట్ల తేడాతో 130 పరుగుల లక్ష్యం ఛేదించింది.
బౌల్ట్‌ 7 పరుగులు ఇచ్చాడు. యాష్‌ (14), అయ్యర్‌ (33) తెలివిగా పరుగులు చేశారు. దిల్లీకి 6 బంతుల్లో 4 పరుగులు కావాలి.
బుమ్రా ఎనిమిది పరుగులు ఇచ్చాడు. శ్రేయస్‌ (30), అశ్విన్‌ (10) తెలివిగా ఆడారు. సింగిల్స్‌ తీశారు. ఆఖరి బంతిని శ్రేయస్‌ బౌండరీకి బాదడంతో దిల్లీపై ఒత్తిడి తగ్గింది. ఆ జట్టుకు 12 బంతుల్లో 11 పరుగులు అవసరం.
కౌల్టర్‌నైల్‌ ఆరు పరుగులు ఇచ్చాడు. మూడో బంతిని శ్రేయస్‌ (24) బౌండరీకి తరలించాడు. అశ్విన్‌ (8) నిలకడగా ఆడుతున్నాడు. దిల్లీకి 18 బంతుల్లో 19 పరుగులు అవసరం.
బౌల్ట్‌ కట్టుదిట్టంగా బౌలింగ్‌ చేశాడు. ఐదు పరుగులు ఇచ్చాడు. శ్రేయస్‌ (19), అశ్విన్‌ (7) నిలకడగా ఆడుతున్నారు. భారీ షాట్లకు వెళ్లడం లేదు.
కౌల్టర్‌నైల్‌ ఆరు పరుగులు ఇచ్చాడు. శ్రేయస్‌ (17), అశ్విన్‌ (5) నిలకడగా ఆడుతున్నారు. దిల్లీకి 30 బంతుల్లో 30 పరుగులు అవసరం.
బుమ్రా ఈ ఓవర్లో ఒక పరుగే ఇచ్చి వికెట్‌ తీశాడు. రవిచంద్రన్‌ అశ్విన్‌ (1) బ్యాటింగ్‌కు వచ్చాడు. శ్రేయస్‌ (16) నిలకడగా ఆడుతున్నాడు.
బుమ్రా వేసిన 13.1వ బంతికి హెట్మైయిర్ (15) ఔట్ అయ్యాడు. టాప్ ఎడ్జ్‌ అయిన బంతి గాల్లోకి లేవగా.. రోహిత్‌ క్యాచ్‌ అందుకున్నాడు.
జయంత్ యాదవ్‌ 13 పరుగులు ఇచ్చాడు. హెట్మైయిర్ (15) మొదటి, ఐదో బంతుల్ని చూడచక్కన బౌండరీలుగా మలిచాడు. శ్రేయస్‌ (16) అతడికి తోడుగా ఉన్నాడు.
బౌల్ట్‌ ఆరు పరుగులు ఇచ్చి వికెట్‌ తీశాడు. నాలుగో బంతికి అక్షర్‌ పటేల్‌ (9)ని వికెట్ల ముందు దొరకబుచ్చుకున్నాడు. శ్రేయస్‌ (15), షిమ్రన్‌ హెట్‌మైయర్‌ (3) క్రీజులోకి వచ్చాడు.
పొలార్డ్‌ తొమ్మిది పరుగులు ఇచ్చాడు. ఆఖరి బంతిని అక్షర్‌ పటేల్‌ (8) బౌండరీకి పంపించాడు. శ్రేయస్‌ (13) ఆచితూచి ఆడుతున్నాడు.
కృనాల్‌ 5 పరుగులు ఇచ్చాడు. శ్రేయస్‌ (11), అక్షర్‌ (3) ఆచితూచి ఆడుతున్నారు. దిల్లీకి 60 బంతుల్లో 65 పరుగులు అవసరం.
జయంత్ యాదవ్‌ ఐదు పరుగులిచ్చి వికెట్‌ తీశాడు. శ్రేయస్‌ (8), అక్షర్‌ పటేల్‌ (1) క్రీజులో ఉన్నారు.
జయంత్ యాదవ్‌ వేసిన 8.2వ బంతికి రిషభ్ పంత్‌ (26: 22balls 3x4, 1x6) ఔటయ్యాడు. భారీ షాట్‌ ఆడబోయి హార్దిక్‌ పాండ్యకు క్యాచ్‌ ఇచ్చాడు.
కౌల్టర్‌నైల్‌ నాలుగు పరుగులు ఇచ్చాడు. పంత్‌ (24), శ్రేయస్‌ (7) ఆచితూచి ఆడుతున్నారు.
జయంత్ యాదవ్‌ 5 పరుగులు ఇచ్చాడు. తెలివిగా బంతులు వేశాడు. పంత్‌ (23) ఎదురుదాడికి ప్రయత్నించాడు. శ్రేయస్‌ (5) ఆచితూచి ఆడుతున్నాడు.
బుమ్రా దాడికి దిగాడు. 11 పరుగులు ఇచ్చాడు. రిషభ్ పంత్‌ (21) తన ప్రతిభను చూపించాడు. నాలుగో బంతిని బౌండరీకి తరలించాడు. ఇక ఆఖరి బంతిని స్ట్రెయిట్‌గా బౌండరీకి పంపించిన తీరు ఎంత మెచ్చుకున్నా తక్కువే! శ్రేయస్‌ (2) అతడికి సహకారం అందిస్తున్నాడు.
కౌల్టర్‌నైల్‌ 5 పరుగులిచ్చి వికెట్‌ తీశాడు. రిషభ్ పంత్‌ (11) ఒక బౌండరీ బాదాడు. శ్రేయస్‌ అయ్యర్‌ (1) పరుగుల ఖాతా తెరిచాడు.
కౌల్టర్‌నైల్‌ వేసిన 4.1వ బంతికి స్టీవ్‌స్మిత్‌ (9) క్లీన్‌బౌల్డ్‌ అయ్యాడు. దాంతో 30 పరుగులకే దిల్లీ 3 వికెట్లు కోల్పోయింది.
పేసుగుర్రం జస్ప్రీత్‌ బుమ్రా బౌలింగ్‌కు వచ్చాడు. తొమ్మిది పరుగులు ఇచ్చాడు. స్టీవ్‌స్మిత్‌ (9) నాలుగో బంతిని సునాయాసంగా సిక్సర్‌గా మలిచాడు. పంత్‌ (7) అతడికి తోడుగా ఉన్నాడు.
కృనాల్‌ ఏడు పరుగులిచ్చి ఒక వికెట్‌ తీశాడు. రిషభ్ పంత్‌ (6) క్రీజులోకి వచ్చాడు. ఆఖరి బంతిని కళ్లుచెదిరే సిక్సర్‌గా మలిచాడు. స్మిత్‌ (1) అతడికి తోడుగా ఉన్నాడు.
కృనాల్‌ పాండ్య వేసిన 2.4వ బంతికి పృథ్వీ షా (6) ఔటయ్యాడు. బంతి అతడి తొడల వద్ద తాకింది. అంపైర్‌ ఔటివ్వకపోవడంతో ముంబయి రివ్యూ తీసుకొని విజయం సాధించింది.
జయంత్ యాదవ్‌ బౌలింగ్‌కు దిగాడు. ఎనిమిది పరుగులు ఇచ్చాడు. అయితే ఆఖరి బంతికి అనవసర పరుగుకు ప్రయత్నించి శిఖర్‌ ధావన్‌ (8; 7balls 1x6) రనౌట్‌ అయ్యాడు. పొలార్డ్‌ అద్భుతంగా త్రో చేశాడు. షా (6) క్రీజులో ఉన్నాడు.
దిల్లీ ఛేదన ఆరంభించింది. మొదటి ఓవర్‌ను బౌల్ట్‌ వేసి ఆరు పరుగులు ఇచ్చాడు. పృథ్వీ షా (5) ఆఖరి బంతిని బౌండరీకి పంపించాడు. శిఖర్‌ ధావన్‌ (1) పరుగుల ఖాతా తెరిచాడు.
అశ్విన్‌ వేసిన ఈ ఓవర్లో 13 పరుగులు ఇచ్చాడు. రెండో బంతికి జయంత్ యాదవ్‌ (11: 4 balls 1x4, 1x6) ఔటయ్యాడు. ఆఖరి బంతికి కృనాల్‌ (13: 15 balls 1x4, 1x6) సిక్సర్‌ బాదేశాడు. దాంతో స్కోరు 129కి చేరుకుంది.
అవేశ్‌ అద్భుతంగా బౌలింగ్‌ చేశాడు. మొదటి బంతికి హార్దిక్‌, నాలుగో బంతికి కౌల్టర్‌నైల్‌ను బౌల్డ్‌ చేశాడు. ఈ ఓవర్లో 7 పరుగులు వచ్చాయి. జయంత్ యాదవ్‌ (5) రాగానే బౌండరీ బాదాడు. కృనాల్‌ (7) మరో ఎండ్‌లో ఉన్నాడు.
అవేశ్‌ ఖాన్‌ వేసిన 18.4 బంతికి కౌల్టర్‌నైల్‌ (1) ఔటయ్యాడు. క్లీన్‌బౌల్డ్‌ అయ్యాడు.
అవేశ్‌ ఖాన్‌ వేసిన 18.1 బంతికి హార్దిక్‌ (17; 18balls 2x4) ఔటయ్యాడు.
ఆన్రిచ్‌ నార్జ్‌ ఈ ఓవర్లో 9 పరుగులు ఇచ్చాడు. హార్దిక్‌ పాండ్య (17) రెండు బౌండరీలు బాదేశాడు. కృనాల్‌ (6) అతడికి తోడుగా ఉన్నాడు.
రబాడా 12 పరుగులు ఇచ్చాడు. నాలుగో బంతిని కృనాల్‌ (6) బౌండరీకి పంపించాడు. హార్దిక్‌ (8) ఆచితూచి ఆడుతున్నాడు. ముంబయి స్కోరు వందకు చేరుకుంది.
అవేశ్‌ ఖాన్‌ సైతం దుమ్మురేపుతున్నాడు. నెమ్మది బంతులతో విరుచుకుపడ్డాడు. కేవలం ఒకే పరుగు ఇచ్చాడు. కృనాల్‌ (0) ఏడు బంతులు ఆడినా ఖాతా తెరవలేదు. హార్దిక్‌ (3) ఆచితూచి ఆడుతున్నాడు.
నార్జ్‌ అద్భుతంగా బౌలింగ్‌ చేశాడు. వికెట్‌ తీసి పరుగులేమీ ఇవ్వలేదు. కృనాల్‌ (0), హార్దిక్‌ (2) ఆచితూచి ఆడుతున్నారు.
ఆన్రిచ్‌ నార్జ్‌ వేసిన 14.1వ బంతికి పొలార్డ్‌ (6; 9 balls) ఔటయ్యాడు. ఆఫ్‌సైడ్‌ వేసిన లెగ్‌కట్టర్‌ వికెట్ల మీదకు ఆడుకున్నాడు.
అశ్విన్‌ పరుగులను నియంత్రించాడు. ఏడు పరుగులు ఇచ్చాడు. కేవలం క్యారమ్‌ బంతులే వేశాడు. పొలార్డ్‌ (6), హార్దిక్‌ (2) ఆచితూచి ఆడారు.
అక్షర్‌ పటేల్‌ స్పెల్‌ ముగిసింది. నాలుగు ఓవర్లు వేసిన అతడు 21 పరుగులు ఇచ్చి మూడు వికెట్లు తీశాడు. అతడు ఈ ఓవర్లో వేసిన ఐదో బంతికి సౌరభ్‌ తివారీ (15; 18 balls 1x4) ఔటయ్యాడు. భారీ షాట్‌ ఆడబోయి కీపర్‌ పంత్‌కు చిక్కాడు. హార్దిక్‌ పాండ్య క్రీజులోకి వచ్చాడు. పొలార్డ్‌ (3) అతడికి తోడుగా ఉన్నాడు.
రబాడా కట్టుదిట్టంగా బౌలింగ్‌ చేశాడు. కేవలం 3 పరుగులు ఇచ్చాడు. పొలార్డ్‌ (1), తివారీ (16) నిలకడగా ఆడుతున్నారు.
అక్షర్‌ ఒక వికెట్‌ తీసి 7 పరుగులు ఇచ్చాడు. తివారీ (13) ఐదో బంతిని బౌండరీకి తరలించాడు. పొలార్డ్‌ క్రీజులోకి వచ్చాడు.
అక్షర్‌ వేసిన 10.3వ బంతికి సూర్యకుమార్‌ (33; 26balls 2x4, 2x6) ఔటయ్యాడు. షాట్‌ ఆడుతూ రబాడాకు చిక్కాడు.
రబాడా పరుగులు ఇస్తున్నాడు. ఈ ఓవర్లో 9 ఇచ్చాడు. ఐదో బంతిని సూర్య (32) అద్భుతమైన సిక్సర్‌గా మలిచాడు. తివారీ (7) అతడికి తోడుగా ఉన్నాడు.
అక్షర్‌ పటేల్‌ ఐదు పరుగులు ఇచ్చాడు. కట్టుదిట్టంగా బంతులు వేస్తున్నాడు. సూర్య (24), తివారీ (6) ఆచితూచి ఆడారు.
యాష్‌ బౌలింగ్‌కు వచ్చాడు. 12 పరుగులు ఇచ్చాడు. అతడి బౌలింగ్‌లో మంచి రికార్డు సూర్య (21) చెలరేగాడు. రెండు చక్కని బౌండరీలు బాదాడు. తివారీ (4) అతడికి తోడుగా ఉన్నాడు.
అక్షర్‌ పటేల్‌ ఐదు పరుగులిచ్చి డికాక్‌ను పెవిలియన్‌ పంపించాడు. సౌరభ్‌ తివారీ (2) క్రీజులోకి వచ్చాడు. సూర్య (11) ఆచితూచి ఆడుతున్నాడు.
అక్షర్‌ పటేల్‌ వేసిన 6.2వ బంతికి డికాక్‌ (19; 18 balls 1x4, 1x6) ఔటయ్యాడు. భారీ షాట్‌ ఆడబోయి నార్జ్‌కు క్యాచ్‌ ఇచ్చాడు.
నార్జ్‌ మూడు పరుగులు ఇచ్చాడు. పవర్‌ప్లే ముగిసింది. డికాక్‌ (17), సూర్య (10) షాట్లకు ప్రయత్నించారు. కానీ బౌండరీలేమీ రాలేదు.
రబాడా బౌలింగ్‌కు వచ్చాడు. తొమ్మిది పరుగులు ఇచ్చాడు. రబాడాకు డికాక్‌ (15) సిక్సర్‌తో స్వాగతం పలికాడు. మొదటి బంతిని స్టాండ్స్‌లో పెట్టాడు. సూర్య (9) ఆచితూచి ఆడుతున్నాడు.
అవేశ్‌ ఫైర్‌ మీదున్నాడు. అద్భుతంగా బౌలింగ్‌ చేస్తున్నాడు. కేవలం రెండు పరుగులే ఇచ్చాడు. డికాక్‌ (6), సూర్య (9) ఆచితూచి ఆడారు.
అశ్విన్‌ బౌలింగ్‌కు వచ్చాడు. తొమ్మిది పరుగులు ఇచ్చాడు. మూడో బంతిని సూర్య (8) కళ్లు చెదిరే సిక్సర్‌గా మలిచాడు. డికాక్‌ (5) అతడికి తోడుగా ఉన్నాడు.
అవేశ్‌ ఖాన్‌ మరో ఎండ్‌లో బౌలింగ్‌ దాడి ఆరంభించాడు. కేవలం ఐదు పరుగులే ఇచ్చి కీలకమై రోహిత్‌శర్మ (7; 10 balls 1x4)ను ఔట్ చేశాడు. ఐదో బంతిని షాట్‌ ఆడే క్రమంలో అతడు రబాడాకు చిక్కాడు. అయితే ఆఖరి బంతిని డికాక్‌ (4) బౌండరీకి పంపించాడు. సూర్యకుమార్‌ క్రీజులోకి వచ్చాడు.
ఆన్రిచ్‌ నార్జ్‌ బౌలింగ్‌ మొదలు పెట్టాడు. కేవలం 7 పరుగులే ఇచ్చాడు. మొదటి బంతినే రోహిత్‌ శర్మ (7) బౌండరీ బాదేశాడు. క్వింటన్‌ (0) ఎండ్‌లో ఉన్నాడు.
Background
ఇండియన్‌ ప్రీమియర్‌ లీగ్‌ ఆఖరి దశకు చేరుకుంటోంది. మ్యాచులు ముగిసే కొద్దీ అభిమానులకు మజా దొరుకుతుంటే కొన్ని జట్లకేమో చావోరేవో తేల్చుకోవాల్సిన అగత్యం ఏర్పడింది. డిఫెండింగ్‌ ఛాంపియన్‌ ముంబయి ఇండియన్స్‌ది సరిగ్గా ఇదే పరిస్థితి. ప్లేఆఫ్స్‌ చేరుకోవాలంటే ఆ జట్టు శనివారం దిల్లీ క్యాపిటల్స్‌ను ఓడించి తీరాల్సిందే. ఈ నేపథ్యంలో ఎవరి బలాబలాలేంటి? ఏ జట్టు వ్యూహం ఎలా ఉండబోతోంది?
ముంబయి తప్పక గెలవాలి
ఈ సీజన్లో 11 మ్యాచులాడిన దిల్లీ క్యాపిటల్స్ 8 విజయాలతో 16 పాయింట్లతో పట్టికలో రెండో స్థానంలో ఉంది. 11 మ్యాచులాడిన ముంబయి ఐదు మాత్రమే గెలిచి 10 పాయింట్లతో ఐదో స్థానంలో ఉంది. కోల్‌కతా సైతం ఐదే గెలిచినా నెట్‌ రన్‌రేట్‌ తక్కువగా ఉండటంతో రోహిత్‌ సేన వెనకబడింది. దిల్లీ సాంకేతికంగా ప్లేఆఫ్స్‌ చేరినా అధికారికంగా మరో విజయం అందుకోవాలి. మరో రెండు మ్యాచులు మిగిలే ఉండటంతో ఇందులో ఓడినా ఫర్వాలేదు! ముంబయి పరిస్థితి మాత్రం అలా లేదు. కప్పు కొట్టాలంటే ముందీ మ్యాచ్‌ గెలవాలి. కోల్‌కతా చేతిలో ఓడిన రిషభ్ సేన ఈ పోరును తేలిగ్గా తీసుకోదు కాబట్టి ముంబయి కష్టపడాల్సిందే. ఆ తర్వాత హైదరాబాద్‌, రాజస్థాన్‌పై సునాయాసంగా గెలవొచ్చు!
మానసికంగా ముంబయిదే పైచేయి!
ఐపీఎల్‌లో దిల్లీపై ముంబయిదే పైచేయి! ఈ రెండు జట్లు 29 సార్లు తలపడితే విజయాల శాతం 16-13గా ఉంది. అంటే రోహిత్‌సేనకు పూర్తిగా ఆధిపత్యం లేదనే చెప్పాలి. అయితే చివరి ఐదు మ్యాచుల్లో నాలుగింట్లో హిట్‌మ్యాన్‌ సేన దుమ్మురేపింది. ఆ నాలుగు గతేడాదే ఆడటం గమనార్హం. అంటే రెండు లీగులు, ఒక క్వాలిఫయర్‌, ఫైనల్‌ అన్నమాట! ముంబయి మానసికంగా బలంగా ఉండటం వారికి కలిసొచ్చే అంశం.
జయంత్ కీలకం
యూఏఈకి వచ్చాక ముంబయి తన స్థాయికి తగిన ఆట ఆడలేదు. వరుసగా మూడు మ్యాచులు ఓడి మొన్నే పంజాబ్‌పై గెలిచింది. రోహిత్‌, డికాక్‌ నిలకడగానే ఆడుతున్నారు. మిడిలార్డర్‌ పుంజుకోవాల్సిన అవసరం ఉంది. సూర్యకుమార్‌ నుంచి అభిమానులు మెరుపులు ఆశిస్తున్నారు. పొలార్డ్‌ నిలవాల్సి ఉంది. రాహుల్‌ చాహర్‌ను పూర్తిగా వినియోగించుకోవడం లేదు. బౌలర్లు పరుగులిస్తున్నారు. వారు మెరుగవ్వాలి. దిల్లీపై జయంత్ యాదవ్‌కు అద్భుతమైన రికార్డుంది. అంటే అతడు ఆడటం గ్యారంటీ. రిషభ్, అక్షర్‌, ధావన్‌, శ్రేయస్‌ను అడ్డుకోగలడు. ఈ పోరులో దిల్లీ కచ్చితంగా కొత్త వ్యూహ్యాలతో వస్తుంది. వాటిని తిప్పికొడితేనే ముంబయి హిట్టవుతుంది.
ఇక్కడ అశ్విన్‌ ఉన్నాడు
దిల్లీ క్యాపిటల్స్‌కు ఒత్తిడేం లేదు. ముంబయి, చెన్నై, బెంగళూరుపై ఏ ఒక్కటి గెలిచినా చాలు. ఐతే హిట్‌మ్యాన్‌ సేనను దిల్లీ ఓడించాలని వారి కన్నా ఎక్కువగా బెంగళూరు, కోల్‌కతా కోరుకుంటున్నాయి! అప్పుడే ఆ రెండింటికీ భయం ఉండదు. గాయపడ్డ పృథ్వీషా అందుబాటులోకి రావొచ్చు. అయితే మార్కస్‌ స్టాయినిస్‌ కోసం ఆ జట్టు ఎంతగానో ఎదురు చూస్తోంది. ఇవి మినహా ఆ జట్టులో ఎక్కువ మార్పులేమీ ఉండకపోవచ్చు. అశ్విన్‌ బౌలింగ్‌లో డికాక్‌, రోహిత్‌, కృనాల్‌ ఇబ్బంది పడటం దిల్లీకి కలిసొచ్చే అంశం. అయితే సూర్య అతడి బౌలింగ్‌ను ఊచకోత కోయగలడు. అతడితో జాగ్రత్తగా ఉండాలి. మిడిలార్డర్‌ బ్యాటింగ్‌ ఒక్కోసారి కుప్పకూలుతోంది. దాన్ని సరిదిద్దుకొంటే దిల్లీకి తిరుగుండదు.
- - - - - - - - - Advertisement - - - - - - - - -