Rajkot T20 Match: రాజ్‌కోట్‌ టీ20లో భారత్ 91 పరుగుల తేడాతో శ్రీలంకను ఓడించింది. తద్వారా మూడు టీ20ల సిరీస్‌ని 2-1 తేడాతో టీమిండియా కైవసం చేసుకుంది. టాస్ గెలిచి తొలుత బ్యాటింగ్ చేసిన భారత జట్టు 20 ఓవర్లలో 5 వికెట్లకు 228 పరుగులు చేసింది. అనంతరం బ్యాటింగ్‌కు దిగిన శ్రీలంక జట్టు 16.4 ఓవర్లలో 137 పరుగులకే కుప్పకూలింది.
ఓటమిపై కెప్టెన్ దసున్ షనక ఏమన్నారు?
ఈ ఓటమి తర్వాత శ్రీలంక కెప్టెన్ దసున్ షనక టీమిండియా మరియు సూర్యకుమార్ యాదవ్‌పై ప్రశంసలు కురిపించాడు. అలాగే రాబోయే రోజుల్లో తమ ఆటగాళ్లు తమ తప్పుల నుంచి గుణపాఠం నేర్చుకుని మంచి ప్రదర్శన చేయాలని కోరుకుంటున్నాను అని చెప్పాడు. భారత పర్యటనకు ముందు తన ఫామ్ బాగోలేదని, ఈ సిరీస్‌లోని తొలి మ్యాచ్ నుంచి బ్యాటింగ్ బాగానే ఉందని చెప్పాడు.
తన వ్యక్తిగత ప్రదర్శన పట్ల సంతోషంగా ఉన్నట్లు షనక పేర్కొన్నాడు. ఇది కాకుండా తమ ఆటగాళ్లు సిరీస్‌లో చూపించిన ఆట చాలా సానుకూలంగా ఉందన్నారు. అలాగే తన చేతి వేళ్లకు గాయం అయిందని, దాని కారణంగా సిరీస్‌లో బౌలింగ్ చేయలేదని, అయితే వన్డే సిరీస్‌లో బౌలింగ్ చేయగలనని ఆశిస్తున్నట్లు పేర్కొన్నాడు.
సూర్యకుమార్ యాదవ్ అద్భుతమైన సెంచరీ
భారత్ తరఫున సూర్యకుమార్ యాదవ్ అద్భుత సెంచరీ ఆడాడు. ఈ బ్యాట్స్‌మన్ కేవలం 45 బంతుల్లోనే మూడో సెంచరీని పూర్తి చేశాడు. టీ20 మ్యాచ్‌ల్లో భారత బ్యాట్స్‌మెన్‌ చేసిన రెండో వేగవంతమైన సెంచరీ ఇదే. సూర్యకుమార్ యాదవ్ 51 బంతుల్లో 112 పరుగులు చేసి అజేయంగా నిలిచాడు.
అతని ఇన్నింగ్స్‌లో ఏడు ఫోర్లు, తొమ్మిది సిక్సర్లు బాదాడు. ఇది కాకుండా, అక్షర్ పటేల్ తొమ్మిది బంతుల్లో అజేయంగా 21 పరుగులు చేసి గొప్ప ముగింపు చేశాడు. శుభ్‌మన్ గిల్ 36 బంతుల్లో 46 పరుగులు చేశాడు. రాహుల్ త్రిపాఠి 16 బంతుల్లో 35 పరుగులతో మెరుపు ఇన్నింగ్స్ ఆడాడు. అతని ఇన్నింగ్స్‌లో ఐదు ఫోర్లు, రెండు సిక్సర్లు ఉన్నాయి.