Watch Video:
అభిమానులను అలరించడంలో విరాట్‌ కోహ్లీ ఎప్పుడూ ముందుంటాడు! మొదట బ్యాటింగ్‌తో మురిపించేందుకు ప్రయత్నిస్తాడు. కుదరకపోతే చురుకైన ఫీల్డింగ్‌తో మైమరిపిస్తాడు. అవసరమైతే మైదానంలో స్టెప్పులేస్తూ ఉత్సాహం పెంచుతాడు. శ్రీలంకతో రెండో వన్డేలోనూ అంతే! బ్యాటింగ్‌లో విఫలమైన కింగ్‌ మ్యాచ్‌ ముగిశాక ఇషాన్‌ కిషన్‌తో చిందులేస్తూ ఫ్యాన్స్‌ను ఎంటర్‌టైన్‌ చేశాడు. ఇప్పుడీ వీడియో ఇంటర్నెట్లో వైరల్‌గా మారింది.
గువాహటిలో జరిగిన తొలి వన్డేలో విరాట్‌ కోహ్లీ సెంచరీ కొట్టాడు. మునుపటి స్థాయిలో బ్యాటు ఝుళిపించాడు. చక్కని బౌండరీలతో మురిపించాడు. ఈడెన్ గార్డెన్లోనూ అభిమానులు అతడి నుంచి ఇదే ఆశించారు. పరుగుల వరద పారించాలని కోరుకున్నారు. అయితే లంకేయులు మంచి బౌలింగ్‌తో సవాల్‌ విసరడంతో కేవలం 9 బంతులాడి 4 రన్స్‌ చేశాడు. లాహిరు కుమార బౌలింగ్‌లో క్లీన్‌బౌల్డ్‌ అయ్యాడు. 220 పరుగుల లక్ష్య ఛేదనలో టీమ్‌ఇండియా 86/4తో కష్టాల్లో పడింది. కేఎల్‌ రాహుల్‌ 103 బంతుల్లో 64తో అజేయంగా నిలిచాడు. 40 బంతులు మిగిలుండగానే 4 వికెట్ల తేడాతో గెలిపించాడు. 2-0తో సిరీస్‌ను అందించాడు.
మ్యాచ్‌ ముగిసిన తర్వాత విరాట్‌ కోహ్లీ, ఇషాన్‌ కిషన్‌ అభిమానులను మురిపించారు. ఇద్దరూ కలిసి మైదానంలో డీజే పాటలకు చిందులేశారు. ఒక్కసారిగా మైదానంలో జోష్‌ తీసుకొచ్చారు. ఎవరో అభిమాని వారు డాన్స్‌ చేస్తున్న వీడియో తీసి సోషల్‌ మీడియాలో పోస్ట్‌ చేశాడు. ఇప్పుడది వైరల్‌గా మారింది. కాగా ఈ సిరీసులో ఇషాన్‌కు అవకాశాలు దక్కలేదు. ఓపెనర్‌గా శుభ్‌మన్‌ గిల్‌కు అవకాశాలు ఇవ్వడంతో అతడు రిజర్వు బెంచీకే పరిమితం అయ్యాడు. మిడిలార్డర్లో కేఎల్‌ రాహుల్‌ కీపింగ్‌ చేస్తుండటంతో తుది జట్టులో చోటు దొరకలేదు.