MS Dhoni Birthday: భారత క్రికెట్ జట్టుకు మూడు ఐసీసీ ట్రోఫీలు అందించిన దిగ్గజ సారథి మహేంద్ర సింగ్ ధోని నేడు 42వ పుట్టినరోజు జరుపుకుంటున్నాడు. సాధారణ దిగువ మధ్య తరగతి కుటుంబంలో పుట్టిన ధోని.. చిన్నప్పుడు సగటు మధ్య తరగతి భారతీయ యువకులు అనుభవించిన కష్టాలన్నీ అనుభవించాడు. క్రికెట్ ను కెరీర్ గా ఎంచుకున్న ధోని క్రీడల కోటాలో ఖరగ్పూర్ రైల్వే స్టేషన్ లో టికెట్ కలెక్టర్ (టీసీ) గా ఉద్యోగం చేసిన విషయం తెలిసిందే. ఇరుకు గదుల్లో అద్దెకు ఉన్న ధోని ఆస్తులు ఇప్పుడు ఎంతో తెలుసా..?
కోటీశ్వరుడే..
కొన్ని నివేదికల ప్రకారం మహేంద్రుడి ఆస్తుల విలువ రూ. 1,040 కోట్లు. క్రికెటర్ గా ఉన్నప్పుడు సంపాదించుకున్న ఆస్తులతో పాటు ధోని చాలాకాలంగా పలు వ్యాపారాలలో కూడా భాగమయ్యాడు. బ్రాండ్ ఎండార్స్మెంట్స్, ఐపీఎల్ సాలరీ, పెట్టుబడుల రూపంలో మహేంద్రుడి సంపాదన నానాటికీ పెరుగుతోంది.
ఐపీఎల్ లో చెన్నై సూపర్ కింగ్స్ కు కెప్టెన్ గా వ్యవహరిస్తున్న ధోనికి వార్షిక వేతనం రూ. 12 కోట్లు (గతంలో రూ. 15 కోట్ల దాకా తీసుకునేవాడు. కానీ 2022లో సారథ్య బాధ్యతల నుంచి తప్పుకునేందుకని వేతనాన్ని తగ్గించుకున్నాడు) గా ఉంది.
బ్రాండ్ ఎండార్స్మెంట్స్..
అంతర్జాతీయ క్రికెట్ నుంచి తప్పుకుని సుమారు మూడేండ్లు కావొస్తున్నా ధోని మార్కెట్ పడిపోలేదు. ఇప్పటికీ కోహ్లీ తర్వాత భారత క్రికెట్ లో అత్యధిక ఎండార్స్మెంట్స్ కలిగిన క్రికెటర్ ధోనీనే.. కోకో కోలా, డ్రీమ్ 11, గో డాడీ, రీబాక్, ఓరియో, గల్ఫ్ ఆయిల్, ఇండియా సిమెంట్స్, కోల్గెట్ సియారమ్, టీవీఎస్, ఒప్పో కు ధోనినే బ్రాండ్ అంబాసిడర్..
పెట్టుబడులు..
కొద్దిరోజులుగా బ్రాండ్స్ ఎండార్స్మెంట్స్ తో పాటు పలు వ్యాపారాలలో కూడా ఎంట్రీ ఇస్తున్న ధోని.. ఖాతా బుక్, కార్స్ 23, శాఖాహారితో పాటు కొద్దిరోజుల క్రితమే డ్రోన్స్ బిజినెస్ లో కూడా దిగాడు. ప్రముఖ డ్రోన్ తయారీ సంస్థ గరుడా ఏరోస్పేస్ లో ధోని పెట్టుబడులు పెట్టాడు. ఫిట్నెస్ కు అధిక ప్రాధాన్యమిచ్చే ధోనికి.. బ్రాండ్ సెవెన్ లో కూడా పెట్టుబడులున్నాయి.
లీగుల్లోనూ..
ఫుట్బాల్ కు వీరాభిమాని అయిన ధోనికి వ్యాపారాలతో పాటు ఇండియన్ సూపర్ లీగ్ (ఐఎస్ఎల్)లో చెన్నియన్ ఫుట్బాల్ క్లబ్ కు ఓనర్ గా కూడా ఉన్నాడు. హాకీలో రాంచీ రేస్, రేసింగ్ టీమ్ (మహీ రేసింగ్) కూడా ఉన్నాయి.
సినిమాల్లో..
తన జీవితంపై బాలీవుడ్ లో తీసిన ఎంఎస్ ధోని : అన్టోల్డ్ స్టోరీ ద్వారా లాభాల్లో ధోని రూ. 30 కోట్లు తీసుకున్నాడు. చెన్నై అభిమానులతో ప్రత్యేక అనుబంధాన్ని ఏర్పరుచుకున్న ధోని.. తమిళ చిత్ర సీమలో నిర్మాతగా కూడా ఎంట్రీ ఇచ్చాడు. ఇటీవలే ధోని అక్కడ ఓ ప్రొడక్షన్ హౌజ్ ను స్టార్ట్ చేసి వరుసగా సినిమాలు తీసేందుకు సన్నాహకాలు చేస్తున్నాడు. తెలుగు, తమిళ భాషల్లో ఓ సినిమా ప్రస్తుతం సెట్స్ లో ఉంది.