Beau Webster News: భారత్‌తో కొత్త సంవత్సరంలో జరిగే ఐదో టెస్టుకు ఆస్ట్రేలియా ఒక మార్పు చేసింది. స్టార్ ఆల్ రౌండర్ మిషెల్ మార్ష్ స్థానంలో బ్యూ వెబ్ స్టర్‌ను జట్టులోకి తీసుకుంది. ఆరున్నర అడుగుల ఆజానుబాహుడైన వెబ్ స్టర్.. అటు మిడిలార్డర్లో రాణించడంతో పాటు ఇటు పేస్ బౌలింగ్ కూడా చేయగలడు. 1993లో టాస్మానియాలో జన్మించిన వెబ్ స్టర్.. దేశవాళీల్లో టన్నుల కొద్దీ పరుగులు సాధించడం సహా కీలక సమయాల్లో వికెట్లు తీసి, సిసలైన ఆల్ రౌండర్ అనిపించుకున్నాడు. మరోవైపు టెస్టుకు ఒక్క రోజు ముందు తుదిజట్టును ప్రకటించే సంప్రదాయాన్ని ఆసీస్ ఈ మ్యాచ్‌లోనూ ప్రదర్శించింది. 


ఈ సిరీస్‌లో మూడో అరంగేట్రం..


ఆసీస్ తరఫున ఈ సిరీస్‌లో అరంగేట్రం చేయబోతున్న మూడో ఆటగాడు వెబ్ స్టర్ కావడం విశేషం. ఇంతకు ముందే ఓపెనర్లు నాథన్ మెక్ స్వినీ, శామ్ కొన్ స్టాస్ డెబ్యూ చేయగా, ఈ మ్యాచ్‌లో వెబ్‌స్టర్ ముచ్చట తీర్చుకుంటున్నాడు. నిజానికి తను తొలి టెస్టు నుంచే జట్టులో ఉండగా తుదిజట్టులో ఆడే అవకాశం రాలేదు. ఇక మార్ష్ ఈ సిరీస్‌లో ఘోరంగా విఫలమయ్యాడు. అటు బ్యాటింగ్‌లో 73 పరుగులు చేసిన ఈ ఆల్ రౌండర్.. బౌలింగ్‌లో 3 వికెట్లు మాత్రమే తీసి నిరాశపర్చాడు. దీంతో గాయం సాకు చూపి, ఐదో టెస్టు నుంచి అతడిని జట్టులో నుంచి తప్పించినట్లుగా తెలుస్తోంది. నిజానికి అంతకు ముందే మార్ష్ స్థానంలో వెబ్‌స్టర్‌ను ఆడించాలని పలువురు మాజీలు సూచించారు.


స్పిన్నర్ నుంచి పేసర్‌గా..
నిజానికి వెబ్‌స్టర్ తొలుత స్పిన్ బౌలింగ్ వేసేవాడు. ఆ తర్వాత తన పంథా మార్చుకుని, పేస్ బౌలింగ్‌కు దిగాడు. నిజానికి ఆసీస్‌లో స్పిన్నర్లకు ఏమాత్రం అవకాశాలు లభించవు. ఇప్పటికే చాలామంది స్పిన్నర్లు జాతీయ జట్టులో చోటు దక్కించుకోలేకపోతున్నారు. ఆడమ్ జంపా లాంటి వైట్ బాల్ క్రికెటర్ ఒక్క టెస్టు కూడా ఆడలేకపోయాడంటేనే స్పిన్నర్లకు ఆసీస్ జట్టులో అంతగా చోటు దక్కదని తెలుస్తోంది. ఇక, ఆసీస్ పిచ్‌లు పేస్‌కు సహకరిస్తాయి, కాబట్టి వెబ్ స్టర్ ఈ రూట్ ఎంచుకున్నట్లు తెలుస్తోంది. ఇక ఫస్ట్ క్లాస్ క్రికెట్లో 93 మ్యాచ్‌లాడిన వెబ్ స్టర్ 5200 పరుగులకు పైగా చేశాడు. బౌలింగ్‌లో 184 వికెట్లు తీశాడు. ఇక ఐదు టెస్టుల సిరీస్‌లో ఆసీస్ 2-1తో ఆధిక్యంలో ఉంది. తొలి టెస్టును భారత్ గెలుచుకోగా, రెండు, నాలుగో టెస్టులను ఆసీస్ కైవసం చేసుకుంది. సిరీస్‌లో మూడో టెస్టు పలుమార్లు వర్షం అంతరాయం కలిగించడంతో డ్రాగా ముగిసింది. ఐదో టెస్టు గెలిస్తే, అటు బోర్డర్ - గావస్కర్ ట్రోఫిని దక్కించుకోవడంతోపాటు ఇటు ప్రపంచ టెస్టు ఛాంపియన్ షిప్ ఫైనల్ బెర్త్‌ను దాదాపుగా కన్ఫాం చేసుకుంటుంది. 


Also Read: Gambhir Clarification: డ్రెస్సింగ్ రూంలో వివాదాలపై స్పందించిన గంభీర్.. సిడ్నీ టెస్టుకి రోహిత్ డౌటే!.. గతంలో ఈ వివాదంపై ధోనీ సెటైర్లు