ఆస్ట్రేలియా ఓపెన్‌(Australian Open 2024)లో ఇండియన్‌ టెన్నిస్‌ స్టార్‌ సుమిత్‌ నగాల్‌(Sumit Nagal) చరిత్ర సృష్టించాడు. తొలి రౌండ్‌లో ప్రపంచ 27వ ర్యాంకర్‌ను ఓడించి రెండో రౌండ్‌కు దూసుకెళ్లాడు. మెన్స్ సింగిల్స్‌లో కజికిస్థాన్‌కు చెందిన దిగ్గజ ఆటగాడు అలెగ్జాండర్ బబ్లిక్‌(Sumit Nagal vs Alexander Bublik) ను మట్టికరిపించాడు. 6-4, 6-2, 7-6 (5)తో వరుస సెట్లలో గెలిచి చరిత్ర సృష్టించాడు. 1989 తర్వాత ఆస్ట్రేలియా ఓపెన్‌లో ఓ సీడెడ్ ప్లేయర్‌ను భారత ఆటగాడు ఓడించడం ఇదే తొలిసారి. ప్రపంచ ర్యాంకింగ్స్‌లో 139వ స్థానంలో ఉన్న నగాల్‌.. 27వ ర్యాంకర్‌ అలెగ్జాండర్‌ బబ్లిక్‌పై గెలిచి సంచలనం సృష్టించాడు. సుమిత్‌ 6-4, 6-2, 7-6 (7-5)తో గెలుపొంది రెండో రౌండ్‌కు చేరుకున్నాడు. ఆస్ట్రేలియా ఓపెన్‌ చరిత్రలో దాదాపు మూడున్నర దశాబ్దాల తర్వాత ఓ సీడెడ్‌ ఆటగాడిని భారత క్రీడాకారుడు ఓడించడం ఇదే తొలిసారి. జబ్లిక్‌ను ఓడించిన రెండో రౌండ్‌లో దూసుకెళ్లిన సుమిత్ తర్వాత మెకెంజీ మెక్‌డొనాల్డ్, షాంగ్ జున్‌చెంగ్ లతో తలపడనున్నాడు.

 

అప్పుడెప్పుడో 1989లో....

టెన్నిస్ దిగ్గజం రమేశ్ కృష్ణన్‌( Ramesh Krishnan) 1989లో.. అప్పటి ప్రపంచ నంబర్‌ 1 మ్యాట్స్‌ విలాండర్‌ను రెండో రౌండ్‌లో ఓడించాడు. టెన్నిస్‌ పురుషుల సింగిల్స్‌ విభాగంలో ఇప్పటివరకు ఓ భారత ఆటగాడు ఆస్ట్రేలియా ఓపెన్‌లో మూడో రౌండ్‌ వరకు మాత్రమే చేరుకున్నారు. రమేశ్ కృష్ణన్‌ తన కెరీర్‌లో ఐదు సార్లు 1983, 84, 87, 88, 89 ఏడాదుల్లో ఆస్ట్రేలియా ఓపెన్‌లో మూడో రౌండ్‌ వరకు వెళ్లాడు. లియాండర్‌ పేస్‌, విజయ్‌ అమృత్‌రాజ్ కూడా ఈ టోర్నీలో ఆడినప్పటికీ.. రెండో రౌండ్‌లోనే వెనుదిరిగారు. సుమిత్‌ చివరగా 2021 ఆస్ట్రేలియన్‌ ఓపెన్‌ ప్రధాన డ్రాలో ఆడాడు. అప్పుడు మొదటి రౌండ్లోనే ఓడిపోయాడు. 2019, 2020లో యూఎస్‌ ఓపెన్‌ ప్రధాన డ్రాలోనూ సుమిత్‌ బరిలో దిగాడు. 2020 యూఎస్‌ ఓపెన్‌లోనూ రెండో రౌండ్‌ వరకు చేరుకున్నాడు. 

 

అప్పుడు యూఎస్‌ ఓపెన్‌లో కూడా..

స్విస్ దిగ్గజం, 20సార్లు గ్రాండ్‌స్లామ్ ఛాంపియన్ అయిన రోజర్ ఫెదరర్‌ యూఎస్ ఓపెన్‌ 2019లో తొలి రౌండ్‌లో భారత ఆటగాడు సుమిత్ నగాల్‌(22)పై 4-6, 6-1, 6-2, 6-4 తేడాతో ఆయన విజయం సాధించాడు. అయితే ఈ ఆటలో మొదటి సెట్‌లో సుమిత్ నుంచి గట్టి పోటీ ఎదుర్కొన్నాడు ఫెదరర్. తొలిసారి గ్రాండ్‌స్లామ్ ఆడుతున్న ఈ నగాల్‌ 6-4తో మొదటి సెట్‌ను సొంతం చేసుకున్నాడు. అయితే ఆ తరువాత ఫెదరర్ అనుభవం ముందు సుమిత్ ఓడిపోక తప్పలేదు. ఏది ఏమైనా అరంగేట్ర మ్యాచ్‌లోనే ప్రపంచ దిగ్గజంతో పోటీ పడి అదరగొట్టాడని అభిమానులు సుమిత్‌ను పొగిడేస్తున్నారు. మరోవైపు మ్యాచ్ అనంతరం ఫెదరర్ మాట్లాడుతూ.. భవిష్యత్‌లో సుమిత్‌ మంచి ఆటగాడు అవుతాడంటూ ప్రశంసించడం మరో విశేషం. ప్రాగ్‌ ఓపెన్‌లోనూ భారత యువ కెరటం సుమిత్‌ నగాల్‌.. మూడు గ్రాండ్‌స్లామ్‌ల విజేత స్టానిస్లాస్‌ వావ్రింకా (స్విట్జర్లాండ్‌)కు చెమటలు పట్టించాడు. అ యితే, ఆ తర్వాత ఒత్తిడికి గురై మ్యాచ్‌ను చేజార్చుకున్నాడు. ప్రాగ్‌ ఓపెన్‌లో క్వార్టర్స్‌ మ్యాచ్‌లో సుమిత్‌ 6-2తో తొలి సెట్‌ను కైవసం చేసుకొని వావ్రింకాకు షాకిచ్చాడు. కానీ, ఆ తర్వాత స్విస్‌ ప్లేయర్‌ విజృంభించడంతో అనవసర తప్పిదాలు చేసిన సుమిత్‌ 6-2, 0-6, 1-6తో మ్యాచ్‌ను చేజార్చుకున్నాడు.