తమ దేశం లేదా ఇతర దేశం తరఫున అంతర్జాతీయ క్రికెట్ ఆడే క్రికెటర్తో పెళ్లి అంటే ఎవరైనా సరే గెంతులేస్తారు. కానీ, తాజాగా నటి అర్షి ఖాన్... ఓ క్రికెటర్తో జరగబోయే నిశ్చితార్థాన్ని రద్దు చేసుకుంది. ఇందుకు కారణం ఏంటో తెలుసా? ఇంతకీ ఆ క్రికెటర్ ఎవరో ఇప్పుడు తెలుసుకుందాం.
ఎప్పుడు వివాదాస్పద వ్యాఖ్యలు చేస్తూ వార్తల్లో నిలిచే అర్షి ఖాన్ గుర్తుంది కదా. తాజాగా ఆమె మరో సారి తన నిశ్చితార్థం రద్దు గురించి చెబుతూ మరో సారి వార్తల్లోకి ఎక్కింది. ఈ ఏడాది అక్టోబర్‌లో ఆమెకి ఓ అఫ్గనిస్తాన్‌ క్రికెటర్తో నిశ్చితార్థం జరగాల్సి ఉందట. కానీ, అక్కడ ప్రస్తుతం నెలకొన్న పరిస్థితులు కారణంతో ఆ నిశ్చితార్థాన్ని రద్దు చేసుకున్నట్లు ప్రకటించింది. తాలిబన్లు.. అఫ్గాన్‌ను ఆక్రమించడమే ఇందుకు కారణమని తెలిపింది. అర్షి ఖాన్ హిందీ బిగ్ బాస్ సీజన్ - 11, 14లో కంటెస్టెంట్.
కొద్ది రోజుల క్రితం ఓ ఆంగ్ల మీడియాతో అర్షి ఖాన్ మాట్లాడుతూ ‘ఓ అఫ్గానిస్తాన్ క్రికెటర్తో ఈ ఏడాది అక్టోబర్‌లో నా నిశ్చితార్థం జరగాల్సి ఉంది. ఈ సంబంధం మా నాన్న కుదిర్చారు. మా నాన్న, ఆ క్రికెటర్ తండ్రి స్నేహితులు. తాలిబన్లు అఫ్గాన్‌ను ఆక్రమించడంతో ఆ దేశ క్రికెటర్తో నిశ్చితార్థాన్ని రద్దు చేసుకున్నాం. కానీ, ఎప్పటికీ మేం మంచి స్నేహితుల్లా ఉంటాం. ఈ నిర్ణయం పట్ల మా కుటుంబం సంతోషంగానే ఉంది. ఇప్పుడు కచ్ఛితంగా మా తల్లిదండ్రులు నన్ను ఓ భారతీయుడికి ఇచ్చి చేయాలనే అనుకుంటారు’ అని తెలిపింది. ఇంతకీ అర్షి ఖాన్ ఏ అప్గాన్ క్రికెటర్తో నిశ్చితార్థం రద్దయ్యిందో అతడి పేరు మాత్రం ఎక్కడా ప్రస్తావించలేదు.
Also Read: Ind vs Eng 3rd Test Pics: మూడో టెస్టు కోసం లీడ్స్‌లో టీమిండియా ప్రాక్టీస్... ఫొటోలు షేర్ చేసిన BCCI
‘మా కుటుంబానికి అఫ్గానిస్తాన్ మూలాలు ఉన్నాయి. మా కుటుంబం యూసుఫ్ జై పఠాన్‌కు చెందినది. మా తాత అఫ్ఘానిస్తాన్ నుంచి భారత్‌కు వలస వచ్చారు. భోపాల్‌లో జైలర్‌గా పని చేశారు. నేను భారతీయ పౌరురాలినే’అన్నారు అర్షి ఖాన్. ఆమె 4వ ఏట అర్షి ఖాన్ తల్లిదండ్రులు అఫ్గాన్‌ నుంచి భారత్‌కు వలస వచ్చారు.
అర్షి ఖాన్ బిగ్ బాస్ సీజన్ 11 లో పాల్గొన్నారు. ఆ తర్వాత 14వ సీజన్‌లో ఛాలెంజర్‌గా షోలో ప్రవేశించారు. 'సావిత్రి దేవి కాలేజ్ అండ్‌ హాస్పిటల్', 'విష్', 'ఇష్క్ మే మార్జవాన్' వంటి టీవీ షోలతో పాటు 'రాత్ కి రాణి బేగం జాన్', 'ది ఈవిల్ డిజైర్స్' వంటి వెబ్ సిరీస్‌లలో కూడా నటించారు.