ఎంతో ప్రేమించిన రాధను కృష్ణుడు ఎందుకు పెళ్లి చేసుకోలేదు?

ఒకరి పట్ల ఒకరికి విపరీతమైన ప్రేమ ఉన్నప్పటికీ రాధాకృష్ణుల పెళ్లి జరగలేదు. కనుక వారి ప్రేమ ఎంత పవిత్రమో అంత వివాదస్పదంగా కూడా మిగిలిపోయింది.

ప్రేమకు ప్రతిరూపాలుగా రాధాకృష్ణులను భావిస్తారు. ప్రేమ దేవతలుగా ప్రపంచవ్యాప్తంగా పూజలందుకునే జంట. వారి ప్రేమ కథ ఒక అజరామరం. కానీ వారికి పెళ్లి జరగలేదు. ఈ ఒక్క కారణంతో వారి ప్రేమను, వారి ప్రేమను ఆరాధించే వారిని కూడా కొంత ఇబ్బంది పెడుతుంది కూడా. కృష్ణుడికి ఎంతో మంది భార్యలున్నా సరే ఆత్మ మాత్రం రాధదే. అత్యంత దైవికమైన ప్రేమగా చరిత్రలో నిలిచిపోయింది. ఈ భూమి ఉన్నంత కాలం వారి ప్రేమ నిలిచి ఉంటుంది. రాధాకృష్ణులను ఆరాధించే వారికి వారు పెళ్లి చేసుకోకపోవడం బాధించే విషయమే. ఎన్నో కథలు ఈ విషయంగా ప్రచారంలో కూడా ఉన్నాయి.

పురాణాలు ఏం చెబుతున్నాయి

వీర్జతో కలిసి ఉన్న శ్రీకృష్ణుడిని చూసి రాధ దుర్భాషలాడడం వల్ల వీర్జ మనసు కష్టపెట్టుకుని నదిగా మారిందని ఒక కథ. తర్వాత రాధ కూడా కృష్ణుడికి దగ్గరయ్యేందుకు నిరాకరించిదని, కృష్ణుడికి అత్యంత ప్రియమైన మిత్రుడు సుధాముడు రాధకు నచ్చజెప్ప చూసినప్పుడు అతడిని కూడా రాధ దుర్భాషలాడిందని అప్పుడు సుధాముడు రాధను ఈ జన్మలోనే కాదు.. మరు జన్మలో కూడా మనసు కోరిన వరుడిని పెళ్లి చేసుకోలేవని శపించినట్టు బ్రహ్మ వైవర్త పురాణం చెబుతోంది. కంససంహారం కోసం కృష్ణుడు గోకులం వదిలి మధురకు వెళ్లిపోవాల్సి వచ్చింది. వారి ప్రేమకు ఇలా అవాంతరాలెన్నో ఉన్నాయి.

రాధను లక్ష్మీ అంశగా కూడా భావిస్తారు. అవతారం చాలించిన తర్వాత తిరిగి వైకుంఠం చేరుకుందని నమ్ముతారు. పెళ్లి చేసుకుందామని అన్న కృష్ణ ప్రతిపాదనను రాధ తిరస్కరించినట్టు కూడా కొన్ని కథలు ప్రాచూర్యంలో ఉన్నాయి.

పవిత్ర ప్రేమ

రాధ, కృష్ణులు పెళ్లి చేసుకోక పోవడం వెనుక ఒక పవిత్ర లక్ష్యం ఉంది. శ్రీకృష్ణుడు లోకకల్యాణార్థం అవతరించిన విష్ణు అవతారం. దుష్ణ శిక్షణకు శిష్ట రక్షణకు భువి కి దిగి వచ్చిన దైవస్వరూపం. ధర్మ పరిరక్షణ అతడి అవతార లక్ష్యం. మానవళికి సరైన మార్గదర్శనం చెయ్యటం కోసం అవతరించాడు. రాధతో పవిత్ర ప్రేమ, పెళ్లి ఆయనను తన లక్ష్యం నుంచి దారి మళ్లించే ప్రమాదం ఉందని భావించడం వల్ల వారి పెళ్లి జరగలేదు.

ఆనాటి సామాజిక పరిస్థితుల దృష్ట్యా రాధా కృష్ణుల ఇద్దరి జీవితాల మధ్య సాంస్కృతిక విబేధాలు చాలా ఉన్నాయి. రాధా, కృష్ణులు ఇద్దరు కూడా వేర్వేరు సామాజిక స్థితులకు చెందిన వారు. రాధ ఒక చిన్న గ్రామానికి చెందిన గొల్ల పిల్ల. కృష్ణుడు మధుర రాజ్యానికి రాజకుమారుడు. తర్వాత కాలం రాజు కూడా. వారి కలయికకు ఈ సామాజిక తేడాలు కూడా కారణం అవుతున్నాయి. ఆ రోజుల్లో సామాజిక నియమాలకు ఈ పెళ్లి అంగీకారయోగ్యం కాదు. అందుకే కృష్ణుడిపై ప్రేమను దాచి, కఠినంగా ప్రవర్తించి దూరం చేసుకుందని చెబుతారు.

Disclaimer: ఇక్కడ అందించిన సమాచారం కేవలం మత విశ్వాసాల మీద ఆధారపడి సేకరించింది మాత్రమే. దీనికి సంబంధించిన శాస్త్రీయ ఆధారాలకు సంబంధించి ‘ఏబీపీ దేశం’ ఎలాంటి భాధ్యత తీసుకోదు. ఈ సమాచారాన్ని పరిగణనలోకి తీసుకునే ముందు పండితులను సంప్రదించి పూర్తి వివరాలు తెలుసుకోగలరు. ‘ఏబీపీ దేశం’, ‘ఏబీపీ నెట్‌వర్క్’ ఈ విషయాలను దృవీకరించడం లేదని గమనించలరు.