శనివారం ఈ వస్తువులను ఇంటికి తీసుకురావద్దు, ఈ నియమాలు పాటిస్తే సేఫ్ - లేదంటే కష్టాలే!

శని దేవుడిని ప్రసన్నం చేసుకోవడానికి శనివారం నాడు కొన్ని పనులు చెయ్యకూడదు. కొన్ని వస్తువులు ఇంటికి తెచ్చుకోకూడదు. ఇలాంటి జాగ్రత్తలు పాటించి శని కృపకు పాత్రులు కావచ్చు.

వారంలోని ఏడు రోజులకు అధిదేవతలు ఉంటారు. ఆ రోజున ఆ ప్రత్యేక దేవతను ప్రత్యేకంగా పూజిస్తారు. శనివారనికి అధిదేవుడు శని. ఈ రోజున శని దేవుడిని ఆరాధించడం వల్ల భక్తులకు విశేష లాభాలు పొందవచ్చు. శని న్యాయం అందించే దేవుడు. పాప పుణ్యాల ఆధారంగా వారికి తగిన ఫలితాలు అందించే వాడు శని. జ్యోతిషం శనిని పాపగ్రహంగా అభివర్ణిస్తుంది. శని వారం రోజున కొన్ని వస్తువులను ఇంటికి తెచ్చుకోవడం, కొనుగోలు చెయ్యడం చెయ్యకూడదు. తెలిసీ తెలియక ఈ వస్తువులు శని వారం రోజున ఇంటికి తెచ్చుకుంటే దురదృష్టం వెంటాడుతుంది. అలా శనివారం నాడు ఎలాంటి వస్తువులు కొన కూడదో తెలుసుకుందాం.

ఇనుప వస్తువులు

శాస్త్రాన్ని అనుసరించి ఇనుముతో చేసిన వస్తువులు శనివారం కొనుగోలు చెయ్యకూడదు. ఇది శని కి కోపం కలిగించే విషయం. ఇలా ఇనుముతో చేసిన వస్తువులను కొని ఇంటికి తెచ్చుకుంటే దురదృష్టం వెంటాడుతుంది. ఒకవేళ తప్పనిసరై కొనుగోలు చేస్తే మాత్రం వాటిని ఇంటికి తీసుకురాకుండా చూసుకోవాలి.

ఉప్పు

శనివారం రోజున ఉప్పు కొనుగోలు చెయ్యకూడదు. శనివారం ఉప్పు కొంటే అప్పులు పెరుగుతాయని శాస్త్రం చెబుతోంది. క్రమంగా ఆర్థిక స్థితి దిగజారుతుంది. కనుక శనివారం ఎట్టిపరిస్థితుల్లో ఉప్పు కొనకూడదు.

నల్ల నువ్వులు

శనివారం నల్ల నువ్వులు కొన కూడదు. ఈరోజున నల్లనువుల కొనడం వల్ల తలపెట్టిన పనులకు ఆటంకం కలుగుతుందని నమ్మకం. శని వారం రోజున నల్లనువ్వులు, ఆవనూనెతో పూజిస్తారు. అందువల్ల శనివారం నాడు నల్లనువ్వులు కొనకూడదు.

నల్లని చెప్పులు

నల్ల రంగులో ఉండే చెప్పులు కూడా కొనకూడదు. శనివారం నల్లని చెప్పులు కొని వాటిని ధరిస్తే అది వైఫల్యానికి కారణం కావచ్చు.

కత్తెర

శనివారం కత్తెర కొనడం, కత్తెర బహుమతిగా ఇవ్వడం అశుభం. ఇది కుటుంబంలో, బంధుమిత్రులతో తగాదాలకు కారణం కావచ్చు. కనుక శనివారం కత్తెర కొనకూడదు, ఎవరికీ బహూకరించకూడదు కూడా.

శనివారం అగ్గిపెట్టె, బొగ్గు, సూది, నల్లని మినుముల వంటి వస్తువులు కూడా కొనకూడదు. గుమ్మడి కాయ కూడా కొని ఇంటికి తెచ్చుకోకూడదు. తప్పనిసరిగా కోనాల్సి వస్తే శుక్రవారమే కొని తెచ్చుకోవాలి. లేదా ఆదివారం వరకు ఆగాలి.

శనివారం చెయ్యకూడని పనులు

శనివారం నాడు తల్లిదండ్రులు, వృద్ధులను, పనివారిని అవమాన పరచడం, వారి మనసు కష్ట పెట్టే విధంగా ప్రవర్తించడం చెయ్యకూడదు. జంతువులకు నష్టం కలిగే పనులు చెయ్యకూడదు. శనివారం నాడు చెప్పులు, బూట్లు ఎవరికీ ఇవ్వకూడదు. ఎవరి దగ్గర నుంచి తీసుకోవద్దు.

ఈ పనులు తప్పక చెయ్యాలి

శని వారం మంచి ఫలితాల కోసం మినపప్పుతో చేసిన కిచిడి ఎవరికైనా దానం చేస్తే మంచిది. శనివారాల్లో రావి చెట్టు కింద దీపం వెలిగించి నాణెం ఆ దీపానికి సమర్పించాలి. శనివారం నాడు సూర్యాస్తమయం తర్వాత మాత్రమే శనికి దీపారాధన చెయ్యలి. సూర్యాస్తమయానికి ముందు శనిపూజ తగదు.

Disclaimer: ఇక్కడ అందించిన సమాచారం కేవలం మత విశ్వాసాల మీద ఆధారపడి సేకరించింది మాత్రమే. దీనికి సంబంధించిన శాస్త్రీయ ఆధారాలకు సంబంధించి ‘ఏబీపీ దేశం’ ఎలాంటి భాధ్యత తీసుకోదు. ఈ సమాచారాన్ని పరిగణనలోకి తీసుకునే ముందు పండితులను సంప్రదించి పూర్తి వివరాలు తెలుసుకోగలరు. ‘ఏబీపీ దేశం’, ‘ఏబీపీ నెట్‌వర్క్’ ఈ విషయాలను దృవీకరించడం లేదు.