Surya Tilak: బాల రాముడి నుదుటిన సూర్య తిలకం, ఈ అద్భుతం ఎలా సాధ్యమైంది?

అయోధ్య రామ మందిరంలో అద్భుతమైన దృశ్యం ఆవిష్కృతమైంది. రాముడి నుదుటిన సూర్య తిలకం దర్శనమిచ్చింది. దాదాపు మూడు నిముషాల పాటు సూర్య కిరణాలు రాముడి నుదురుపై ప్రసరించాయి. ఈ ఘట్టాన్ని చూసి ఆలయమంతా ఒక్కసారిగా జై శ్రీరామ్ నినాదాలతో మారు మోగింది.

శ్రీరామ నవమికి ఈ అపూర్వ ఘట్టాన్ని అందరి ముందు ఉంచింది ఆలయ ట్రస్ట్. సరిగ్గా మధ్యాహ్నం 12.01 నిముషాలకు సూర్య కిరణాలు రాముడి నుదుటిపై పడ్డాయి. ఆ సమయంలో పూజారులు రామయ్యకి ప్రత్యేక హారతి ఇచ్చారు. వేదమంత్రోచ్ఛారణల మధ్య ఈ ఘట్టం విజయవంతంగా ముగిసింది.

వచ్చే ఏడాది శ్రీరామ నవమికి ఈ సూర్య తిలక దర్శనం ఉంటుందని ట్రస్ట్ చెప్పింది. కానీ...ఆ తరవాత ఈ ఏడాదే ఇది ఉంటుందని ప్రకటించింది. 58 మిల్లీ మీటర్ల పరిమాణంలో సూర్య కిరణాలు బాల రాముడి నుదుటిపై ప్రసరించాయి. ఈ అద్భుతాన్ని ఆవిష్కరించడం వెనక సైంటిస్ట్‌ల శ్రమ ఉంది. ఇందుకోసం వాళ్లు స్పెషల్‌గా ఓ పరికరాన్ని తయారు చేశారు.

పది మంది సైంటిస్ట్‌లు కలిసి ఈ ఇంజనీరింగ్ అద్భుతాన్ని సాధించారు. ఆప్టో మెకానికల్ సిస్టమ్ ఆధారంగా సరిగ్గా అనుకున్న సమయానికి సూర్య కిరణాలు రాముడిని తాకేలా చేశారు. ఈ ప్రక్రియకి సూర్య తిలక్ మెకానిజం అనే పేరు పెట్టారు. అద్దాలు, లెన్స్ సాయంతో ఈ మొత్తం వ్యవస్థను రూపొందించారు.

ఆలయ శిఖర భాగాన టిల్ట్ సిస్టమ్ అమర్చారు. అందులో పైప్‌లు ఏర్పాటు చేశారు. ఈ పైప్‌లలో నాలుగు అద్దాలు, నాలుగు లెన్స్ అమర్చారు. సూర్య కిరణాలు ఆలయ శిఖర భాగంలో తాకినప్పుడు అవి నేరుగా అద్దంపై పడి ప్రసారం చెందుతాయి. అక్కడి నుంచి నేరుగా రాముడి విగ్రహాన్ని తాకేందుకు మధ్యలో మెకానిజమ్‌ని రూపొందించారు.

రామ మందిరంలో బాల రాముడి విగ్రహం తూర్పు ముఖంగా ఉంటుంది. ఆలయ శిఖరాన ఏర్పాటు చేసిన మొదటి అద్దాన్ని అడ్జస్ట్ చేసుకునే విధంగా వాలుగా ఉంటుంది. ఆ అద్దం మీదుగా సూర్య కిరణాలు ఉత్తరం వైపు ప్రసరిస్తాయి. పైన ఉన్న అద్దం సూర్యుని కిరణాలు గ్రహించి వాటిని రెండో అద్దంవైపు మళ్లిస్తాయి. అలా ఒక అద్దం నుంచి మరో అద్దానికి లెన్స్ ద్వారా కిరణాలు ప్రసరిస్తాయి.

చివరలో ఉన్న అద్దం, లెన్స్ పై నుంచి వచ్చిన సూర్య కిరణాలను గ్రహించి సరిగ్గా రాముడి నుదుటిపై పడేలా చేస్తాయి. ఇలా ప్రతి శ్రీరామ నవమికి సూర్య తిలకం దిద్దేలా ఈ వ్యవస్థను రూపొందించింది ట్రస్ట్. బెంగళూరుకి చెందిన ఓ కంపెనీ సైంటిస్ట్‌లకు టెక్నికల్ సపోర్ట్ అందించింది. అలా ఇది సాధ్యమైంది.

ఈ సిస్టమ్‌లోని పైప్‌లను ఇత్తడితో తయారు చేశారు. అలా అయితే ఎక్కువ కాలం అవి మన్నికగా ఉంటాయి. ప్రస్తుతం ఈ సూర్య తిలకం దర్శనానికి సంబంధించిన వీడియోలు, ఫొటోలు సోషల్ మీడియాలో వైరల్ అవుతున్నాయి. ఇదో అద్భుతం అంటూ భక్తులంతా పరవశించిపోతున్నారు.