H-1B Visa Pause:అమెరికాలో ఉద్యోగం చేయాలనుకునే లక్షలాది మంది విదేశీయులకు, ముఖ్యంగా భారతీయ ఐటీ నిపుణులకు భారీ షాక్ ఇచ్చే వార్త ఇది. హెచ్1బి వీసా వ్యవస్థలో మార్పులు చేయాలనే ప్రతిపాదన చట్ట సభల ముందుకు వచ్చింది. అమెరికా అధ్యక్షుడు డొనాల్డ్ ట్రంప్ అనుచరులు, రిపబ్లికన్ చట్ట సభ సభ్యులు సంయుక్తంగా ఎండ్ హెచ్ -1 బి వీసా అబ్యూస్ యాక్ట్ ఆఫ్ 2026 అనే కొత్త బిల్లును ప్రతిపాదించారు. అమెరికన్ కార్మికుల ప్రయోజనాలను కాపాడటమే లక్ష్యంగా ఈ కఠిన నిబంధనలను తీసుకువస్తున్నట్టు వారు పేర్కొన్నారు.
రూల్స్ కఠిన తరం చేయాలని బిల్లు
రిపబ్లికన్ ప్రతినిధి ఎలీ క్రేన్ నేతృత్వంలో ప్రవేశ పెట్టిన ఈ బిల్లు, ప్రస్తుత హెచ్-1బి వీసా విధానాన్ని పూర్తిగా ప్రక్షాళన చేయాలని కోరుతోంది. ఈ ప్రతిపాదన ప్రకారం అమెరికా ప్రభుత్వం హెచ్-1బి వీసాల జారీ మూడేళ్ల పాటు పూర్తిగా నిలిపివేయాలి. ఈ విరామ సమయంలో వీసా వ్యవస్థలోని లోపాలను సరిదిద్ది, మరింత కఠినమైన నిబంధనలతో తిరిగి ప్రారంభించాలని బిల్లులో పేర్కొన్నారు.
Also Read: దుబాయ్ వీసా రిజెక్ట్ కాకుండా ఉండాలంటే… తప్పక తెలుసుకోవాల్సిన విషయాలు
బిల్లులో భారీ మార్పులు ప్రతిపాదించిన సభ్యులు
ఈ బిల్లు చట్టంగా మారితే అమెరికా వీసా రంగంలో విప్లవాత్మక మార్పులు జరగనున్నాయి. ప్రస్తుతం ఏటా ఇస్తున్న 65వేల హెచ్-1బి వీసాల పరిమితిని ఏకంగా 25వేలకు తగ్గించాలని ప్రతిపాదించారు. వీసా పొందే అభ్యర్థి కనీస వార్షిక వేతనం రెండు లక్షల డాలర్లు ఉండాలి. అంటే సుమారు 1.6 కోట్లు అన్నమాట. ఇది ప్రస్తుతం ఉన్న వేతన ప్రమాణాల కంటే చాలా ఎక్కువ. ప్రస్తుతం అనుసరిస్తున్న కంప్యూటరైజ్డ్ లాటరీ పద్ధతిని రద్దు చేసి, అత్యధిక వేతనం ఇచ్చే అభ్యర్థులకే ప్రాధాన్యత ఇచ్చే వేతన ఆధారిత ఎంపిక విధానాన్ని ప్రవేశ పెట్టాలని ఈ బిల్లు కోరుతోంది. హోచ్-1బి వీసాదారులు తమ కుటుంబ సభ్యులను తీసుకురావడాన్ని నిషేధించడంతోపాటు హెచ్-1బి నుంచి నేరుగా గ్రీన్ కార్డ్ పొందే ప్రక్రియను కూడా అడ్డుకోవాలని బిల్లులో పేర్కొన్నారు. విద్యార్థులకు ఎంత మేలు చేసే, ఆప్షనల్ ప్రాక్టికల్ ట్రైనింగ్ ప్రోగ్రామ్ను కూడా రద్దు చేయాలని ప్రతిపాదించారు.
Also Read: 'గోల్డ్ కార్డ్' వీసా కార్యక్రమం ప్రారంభించిన ట్రంప్! అమెరికన్ పౌరసత్వం పొందడానికి 10 లక్షల డాలర్లు!
అమెరికా ఉద్యోగులను రక్షించడానికే అంటున్న సభ్యులు
అమెరికాలో పెద్ద కార్పొరేట్ సంస్థలు తక్కువ వేతనానికి దొరికే విదేశీ కార్మికులను తీసుకువస్తూ అర్హులైన అమెరికన్లను ఉద్యోగాల నుంచి తప్పిస్తున్నాయని రిపబ్లికన్ సభ్యులు ఆరోపిస్తున్నారు. ప్రభుత్వం కష్టపడి పని చేసే పౌరుల కోసం పని చేయాలి కానీ, కార్పొరేట్ సంస్థల లాభాల కోసం కాదు అని ఎలీ క్రేన్ వ్యాఖ్యానించారు. పాల్ గోసర్ వంటి ఇతర సభ్యులు కూడా ఈ వ్యవస్థను స్కామ్ అని అభివర్ణిస్తూ, అమెరికన్లు ఉద్యోగాలను రక్షించడమే తమ ప్రథమ కర్తవ్యమని పేర్కొన్నారు.
ఆమోదం పొందే ఛాన్స్ ఉందా?
ప్రస్తుతానికి ఇది కేవలం ఒక ప్రతిపాదన మాత్రమే. ఇది అమెరికన్ కాంగ్రెస్లోని రెండు సభల్లో నెగ్గి, అధ్యక్షుడి ఆమోదం పొందాల్సి ఉంటుంది. 2026 నాటికి ఈ మార్పులను తీసుకురావాలని ప్రతిపాదించినప్పటికీ దీనిపై అమెరికా రాజకీయాల్లో, పారిశ్రామిక వర్గాల్లో తీవ్ర చర్చ జరిగే అవకాశం ఉంది.
భారతీయ టెక్కీలపై తీవ్ర ప్రభావం
చారిత్రాత్మకంగా హెచ్1బి వీసాలను అత్యధికంగా పొందుతున్నది భారతీయులే. ముఖ్యంగా ఐటీ, ఇంజనీరింగ్ రంగాల్లో నిపుణులు ఈ విసాపైనే ఆధారపడి ఉంటారు. కనీస వేతనం 2 లక్షల డాలర్లుగా నిర్ణయిస్తే ఎంట్రీ లెవల్ ఉద్యోగాలకు అమెరికా వెళ్లడం దాదాపు అసాధ్యమవుతుంది. అలాగే థర్డ్ పార్టీ స్టాఫింగ్ ఏజెన్సీల ద్వారా ఉద్యోగాలు పొందడానికి కూడా ఈ బిల్లు నిషేధిస్తోంది. ఇది భారతీయ ఐటీ సేవల సంస్థలకు పెద్ద దెబ్బ కానుంది.