World Happiness Report: ప్రపంచ అత్యంత సంతోషకర దేశాల జాబితా ( World Happiness Report) తాజాగా విడుదలైంది. ప్రపంచంలోనే అత్యంత సంతోషకరమైన దేశంగా ఫిన్లాండ్ నిలిచింది. ఫిన్లాండ్ ఈ ఘనత సాధించడం వరుసగా ఇది ఐదోసారి. ఐక్యరాజ్యసమితి ఆధ్వర్యంలో 146 దేశాల్లో జరిపిన అధ్యయనం ఆధారంగా ఈ నివేదికను బయటపెట్టారు.
టాప్ 20
ఈ రిపోర్ట్ ప్రకారం అత్యంత సంతోషకరమైన దేశాల జాబితాలో ఫిన్లాండ్ మొదటి స్థానంలో నిలవగా, అఫ్గానిస్థాన్ చివరి స్థానంలో నిలిచింది. టాప్ 20 దేశాల జాబితా, మునుపటి ఏడాదికి ఇప్పటికీ స్థానంలో తేడా చూద్దాం.
- ఫిన్లాండ్ (=)
- డెన్మార్క్ (=)
- ఐస్లాండ్ (+1)
- స్విట్జర్లాండ్ (-1)
- నెదర్లాండ్స్ (=)
- లక్సమ్‌బర్గ్ (+2)
- స్వీడన్ (=)
- నార్వే (-2)
- ఇజ్రాయెల్ (+3)
- న్యూజిలాండ్ (-1)
- ఆస్ట్రియా (-1)
- ఆస్ట్రేలియా (-1)
- ఐర్లాండ్ (+2)
- జర్మనీ (-1)
- కెనడా (-1)
- అమెరికా (+3)
- యునైటెడ్ కింగ్‌డమ్ (=)
- చెక్ రిపబ్లిక్ (=)
- బెల్జియం (+1)
- ఫ్రాన్స్ (కొత్తగా పోటీలోకి వచ్చింది)
భారత్ ఎక్కడ?
మరోవైపు ఈ జాబితాలో భారత్ 136వ స్థానంలో నిలిచింది. గత ఏడాది 139వ స్థానంలో ఉంది. అంటే మూడు స్థానాలు మెరుగైంది. అయితే పాకిస్థాన్ (121), నేపాల్ (84), బంగ్లాదేశ్ (94), శ్రీలంక (127) మనకంటే మెరుగైన స్థానాల్లో ఉన్నాయి.
ఆ రెండు
ఈ నివేదిక ఉక్రెయిన్‌పై రష్యా దాడికి ముందే రూపొందింది. దీంతో రష్యా 80వ స్థానంలో, ఉక్రెయిన్ 98వ స్థానంలో నిలిచాయి.
ఎలా లెక్కిస్తారు?
పౌరుల సంతోషం, ఆదాయం, ఆరోగ్యం, సామాజిక అంశాలు వంటి వాటిని పరిశీలించి, 0-10 పాయింట్ల ఆధారంగా ఈ నివేదిక రూపొందిస్తారు. అఫ్గానిస్థాన్ చివరి (146) స్థానంలో నిలవగా, లెబనాన్ (145), జింబాబ్వే (144), రువాండా (143) ర్యాంకులు సాధించాయి.
ఆకలి కేకలు
ఈ నివేదిక ప్రకారం ప్రపంచవ్యాప్తంగా ఐదేళ్లలోపు చిన్నారులు దాదాపు పది లక్షల మంది ఆకలితో అలమటిస్తున్నారని తెలిసింది. చిన్నారులకు సాయం అందకుంటే వాళ్లంతా మరణించే అవకాశం ఉందని వెల్లడైంది.