Joe Biden Steps Out of President Race: అనుకున్నట్టే జరిగింది. అమెరికా అధ్యక్ష ఎన్నికల బరిలో నుంచి తప్పుకుంటున్నట్టు జో బైడెన్ అధికారికంగా ప్రకటించారు. దాదాపు మూడు నాలుగు రోజులుగా ఆయన తప్పుకుంటారన్న వార్తలు వినిపిస్తూనే ఉన్నాయి. త్వరలోనే ఓ ప్రకటన చేస్తారని విశ్వసనీయ వర్గాలు వెల్లడించాయి. అందుకు తగ్గట్టుగానే ఆ ప్రకటన వచ్చేసింది. ఆయన స్థానంలో భారత సంతతికి చెందిన కమలా హారిస్‌ ప్రెసిడెంట్ రేసులోకి వచ్చారు. అయితే...బైడెన్ ఈ రేసు నుంచి తప్పుకోవాలన్న డిమాండ్‌ ఇప్పుడు కొత్తగా వచ్చిందేమీ కాదు. ఆయన ప్రవర్తన కారణంగా ఈ ఏడాది మొదటి నుంచే ఈ డిబేట్ మొదలైంది. నిజానికి ఏప్రిల్ నెలలోనే ట్రంప్‌తో డిబేట్ జరగాల్సింది. కానీ అదే సమయంలో జో బైడెన్ యూరప్‌కి వెళ్లొచ్చారు. దాదాపు రెండు సార్లు అక్కడ పర్యటించారు. ఈ షెడ్యూల్ కారణంగా బాగా అలిసిపోయారు.
అంతకు ముందు ఏప్రిల్‌లోనే ట్రంప్‌తో డిబేట్ ఉంటుందని ప్రకటించారు బైడెన్. కానీ ఆయన ఆరోగ్యం సహకరించలేదు. ఫలితంగా అది కాస్తా వాయిదా పడింది. అప్పటి నుంచే ఆయన ఆరోగ్యంపై చర్చ మొదలైంది. ఇలా అలిసిపోయే వ్యక్తి అధ్యక్ష పదవికి ఎలా సరిపోతారంటూ ప్రతిపక్షం విమర్శలు గుప్పించింది. మొత్తానికి జూన్ 27న ట్రంప్‌తో డిబేట్ జరిగింది. ట్రంప్ ఎన్ని విమర్శలు చేసినా బైడెన్ అందుకు గట్టిగా బదులు చెప్పలేకపోయారు. దాదాపు గంటన్నర పాటు డిబేట్ జరగ్గా బైడెన్ అరకొరగా మాట్లాడారు. కొన్ని సార్లు తడబడ్డారు. ఏం మాట్లాడుకున్నారో మర్చిపోయారు. ఆ తరవాత విమర్శలు ఎక్కువయ్యాయి.
ఆయన ఆరోగ్యం గురించి దేశమంతా చర్చ జరుగుతుంటే బైడెన్ మాత్రం తాను చాలా ఫిట్‌గా ఉన్నానని స్పష్టం చేశారు. ఆ తరవాత మళ్లీ ఆ వ్యాఖ్యలతో సంబంధం లేని కామెంట్స్ చేశారు. ఒక్కోసారి స్టేజ్‌పై ఉన్నప్పుడు నిద్ర ముంచుకొచ్చేస్తోందని చెప్పారు. హెల్త్ బాలేదన్న విషయం నిజమేనని అంగీకరించారు. అంతే కాదు. సాయంత్రం 4 దాటాకా ఏ పనిపైనా ఫోకస్ పెట్టలేకపోయారు. షెడ్యూల్‌ని అందుకు తగ్గట్టుగా మార్చేయాలని అధికారులకు ఆదేశాలిచ్చారు. ఎన్నికల ప్రచారంపైనా ఇది ఎఫెక్ట్ చూపించింది. ఆ తరవాత ట్రంప్‌పై జరిగిన హత్యాయత్నం ఆయనకు పొలిటికల్‌గా బూస్ట్ ఇచ్చింది. ఎలాంటి పరిస్థితులు వచ్చినా ఎదుర్కొన్ని పోరాడతానంటూ ప్రకటించారు ట్రంప్. అప్పటికే బైడెన్ తన ప్రచారాన్ని చాలా చప్పగా సాగిస్తున్నారు. ఇటు ట్రంప్ మాత్రం దూకుడు పెంచారు. సరిగ్గా అదే సమయంలో దాడి జరగడం ఆ పార్టీకి కలిసొచ్చింది. ఆ వెంటనే బైడెన్‌కి కొవిడ్ సోకింది. ప్రచారం నుంచి పూర్తిగా తప్పుకుని ఐసోలేట్ అవ్వాల్సి వచ్చింది. అలా ప్రచారానికి తెరపడింది. ఈలోగా ట్రంప్ పుంజుకున్నారు. జులై 21 వ తేదీన జో బైడెన్ అధికారికంగా తన ప్రచారానికి ముగింపు పలికారు. డెమొక్రాట్‌ల నుంచే పెద్ద ఎత్తున వ్యతిరేకత రావడం వల్ల ఆయన రేసు నుంచి తప్పుకోక తప్పలేదు. ఆయన మానసిక ఆరోగ్యంపైనా అనుమానాలు వ్యక్తమవడం వల్ల తప్పనిసరి పరిస్థితుల్లో ఎగ్జిట్ ఇచ్చారు.