Special Offer to Passengers: ఒక్క రూపాయికే వైద్యం, ఒక్క రూపాయికే కిలో బియ్యం.. అలాగే ఒక్క రూపాయికే ప్రయాణం. వినడానికే చాలా బాగున్న ఈ పదాల్లో చివరది నిజం కాబోతుంది. తాజాగా ఒక్క రూపాయికే బస్సు ప్రయాణ ఆఫర్ ను అందిస్తోంది న్యూగో ట్రాన్స్ పొర్టేషన్ ఎలక్ట్రిక్ కంపెనీ. ఇంటర్ సిటీ ఎలక్ట్రిక్ ఏసీ కోచ్ సేవలు అందించే న్యూ గో సంస్థ స్వాతంత్ర దినోత్సవం సందర్భంగా ఈ అద్భుతమైన ఆఫర్ ను ప్రకటించింది.
ఒక్క రూపాయికే హైదరాబాద్ నుంచి విజయవాడకు, విజయవాడ నుంచి హైదరాబాద్ కు బస్సుల్లో ప్రయాణించవచ్చని న్యూగో ట్రాన్స్ పొర్టేషన్ ఎలక్ట్రిక్ కంపెనీ సీఈఓ, ఎండీ దేవేంద్ర చావ్లా ప్రకటించారు. అలాగే ఇండోర్ - భోపాల్, ఢిల్లీ - చండీగఢ్, ఢిల్లీ - ఆగ్రా, ఢిల్లీ - జైపూర్, ఆగ్రా - జైపూర్, బెంగళూరు - తిరుపతి, చెన్నె - తిరుపతి, చెన్నై - పుదుచ్చేరి తదితర మార్గాల్లో తమ సేవలు కొనసాగనున్నట్లు తెలిపారు. అయితే పర్యావరణ స్థిరత్వం కోసం ప్రజలను ప్రోత్సహించడంతో పాటు ఎలక్ట్రిక్ బస్సుల్లో కూడా లాంగ్ జర్నీ చేసేందుకు వీలు ఉంటుందని నిరూపించేందుకు కార్యక్రమాన్ని చేపట్టినట్లు తెలిపారు. ఆగస్టు 15వ తేదీ స్వాతంత్ర దినోత్సవం సందర్భంగా ఈ ఆఫర్ వర్తిస్తుందని చెప్పారు. https://nuego.in/booking వెబ్ సైట్ లో టికెట్లు బుక్ చేసుకోవాలని సూచించారు.
ఇప్పటికే చాలా మంది ఈ ఆఫర్ ను వినియోగించుకోవడానికి బుకింగ్స్ చేసుకుంటున్నారని, రాష్ట్రంలో హైదరాబాద్ నుంచి విజయవాడకు, విజయవాడ నుంచి హైదరబాద్ కు ఈ సేవలు కొనసాగుతున్నట్లు దేవేంద్ర చావ్లా వెల్లడించారు. దేశవ్యాప్తంగా ఆగస్టు 15వ తేదీ రోజు ఈ ఆఫర్ అందుబాటులో ఉంటుందని పేర్కొన్నారు.