Lakhimpur Violence Case: 'ఆ కేంద్ర మంత్రి ఓ క్రిమినల్..' విపక్షాల నిరసనలతో దద్దరిల్లిన పార్లమెంటు

లఖింపుర్ ఖేరీ ఘటనకు బాధ్యుడైన కేంద్ర మంత్రి అజయ్ మిశ్రాను పదవి నుంచి తొలగించాలని రాహుల్ గాంధీ డిమాండ్ చేశారు.

కేంద్ర హోంశాఖ సహాయమంత్రి అజయ్ మిశ్రా రాజీనామా చేయాల్సిందేనని కాంగ్రెస్ అగ్రనేత రాహుల్ గాంధీ పార్లమెంటులో డిమాండ్ చేశారు. లఖింపుర్ ఖేరీ ఘటనలో అజయ్ మిశ్రా కుమారుడు ఆశిష్ మిశ్రా ప్రధాని నిందితుడిగా ఉన్నాడని రాహుల్ గాంధీ మరోసారి గుర్తు చేశారు. విపక్షాలు కూడా అజయ్ మిశ్రా రాజీనామా చేయాల్సిందేనని పట్టుపడ్డటంతో ఉభయ సభలు దద్దరిల్లాయి.

లఖింపుర్ ఖేరీలో జరిగిన హత్యలపై మాట్లాడేందుకు మాకు అవకాశం ఇవ్వాలి. ఎందుకంటే ఇందులో ఓ కేెంద్రమంత్రి పాత్ర కూడా ఉంది. అందులోనూ ఈ ఘటన కచ్చితంగా ఉద్దేశపూర్వకంగానే చేసినట్లు సిట్ దర్యాప్తులో తేలింది. రైతులను హత్య చేసిన ఆ కేంద్రమంత్రి రాజీనామా చేయాలి. ఆయనకు శిక్ష పడాలి. ఆయన ఓ క్రిమినల్.                                                   - రాహుల్ గాంధీ, కాంగ్రెస్ అగ్ర నేత

ఉభయ సభలు వాయిదా..

లఖింపుర్ ఖేరీ ఘటనపై చర్చ జరగాల్సిందేనని లోక్‌సభలో విపక్షాలు పట్టుబట్టాయి. ప్రతిపక్ష ఎంపీలు ప్లకార్డులు పట్టుకుని వెల్‌లోకి దూసుకెళ్లి నినాదాలు చేశారు. ఉభయసభల్లోనూ లఖింపుర్ ఘటనపై విపక్షాలు ఆందోళన చేశాయి. 

సిట్ దర్యాప్తులో..

లఖింపుర్ ఖేరిలో రైతులపైకి కేంద్ర మంత్రి కుమారుడి వాహనంతో దూసుకెళ్లిన ఘటన ముందస్తు ప్రణాళిక ప్రకారమే జరిగిందని దీనిపై విచారణ చేపట్టిన ప్రత్యేక దర్యాప్తు బృందం(సిట్) స్పష్టం చేసింది. పక్కా ప్రణాళికాబద్ధంగా, ఉద్దేశపూర్వకంగానే ఈ ఘటన జరిగిందని.. నిర్లక్ష్యంతో కాదని తెలిపింది. ఈ నేపథ్యంలో నిందితులపై హత్యాయత్నం అభియోగాలు మోపేందుకు అనుమతించాలని చీఫ్ జ్యుడిషియల్ మేజిస్ట్రేట్ (సీజేఎం)ను సిట్ అధికారి విద్యారామ్ దివాకర్ అభ్యర్థించారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి