NEET PG 2022: నీట్ పీజీ- 2022 పరీక్ష వాయిదాపై సుప్రీం కీలక నిర్ణయం

NEET PG 2022: నీట్ పీజీ 2022 పరీక్షను వాయిదా వేయాలన్న అభ్యర్థనను సుప్రీం కోర్టు తిరస్కరించింది.

NEET PG 2022: నీట్ పీజీ-2022 పరీక్ష వాయిదాపై సుప్రీం కోర్టు కీలక నిర్ణయం తీసుకుంది. ఈ పరీక్షను వాయిదా వేసేందుకు సుప్రీం కోర్టు శుక్రవారం తిరస్కరించింది. ఈ పరీక్షలను వాయిదా వేస్తే వైద్యులు అందుబాటులోలేని పరిస్థితికి దారి తీస్తుందని అభిప్రాయపడింది. ఈ మేరకు జస్టిస్ డీవై చంద్రచూడ్, జస్టిస్ సూర్యకాంత్ ధర్మాసనం.. వైద్యులు దాఖలు చేసిన ఈ పిటిషన్‌ను తోసిపుచ్చింది.

నీట్ పీజీ- 2022ను వాయిదా వేస్తే గందరగోళం ఏర్పడుతుంది. ఈ పరీక్షల కోసం సిద్ధమవుతున్న అత్యధిక విద్యార్థులపై ప్రభావం పడుతుంది. విద్యార్థుల్లో రెండు కేటగిరీల వారు ఉన్నారు. ఓ వర్గం వాయిదా వేయాలని కోరుతోంది. కానీ ఇలా చేస్తే పరీక్ష కోసం సన్నద్ధమైన 2 లక్షల 6 వేల మంది విద్యార్థులున్న మరో పెద్ద వర్గానికి నష్టం జరుగుతుంది. కరోనా కారణంగా పరీక్షల షెడ్యూల్​ ప్రభావితమైంది. దానిని పునరుద్ధరించే దిశగా కేంద్ర ప్రభుత్వం ప్రయత్నిస్తోంది.                                                               - సుప్రీం కోర్టు 

వాయిదా కోసం

నేషనల్ ఎలిజిబిలిటీ కమ్ ఎంట్రన్స్ టెస్ట్ ఫర్ పోస్ట్ గ్రాడ్యుయేట్ (NEET-PG), 2022ను వాయిదా వేయాలని కోరుతూ కొందరు వైద్యులు సుప్రీం కోర్టులో పిటిషన్ దాఖలు చేశారు. ఈ పిటిషన్‌పై విచారణ జరిపేందుకు సుప్రీంకోర్టు మే 10న అంగీకరించింది. నీట్​ పీజీ- 2021 కౌన్సెలింగ్​ ఇంకా జరుగుతుందని, అందులో సీటు దక్కని విద్యార్థులు నీట్​-పీజీ 2022కు సన్నద్ధమయ్యేందుకు వీలు కల్పించాలని పిటిషన్‌లో పేర్కొన్నారు. అందుకు అనుగుణంగా పరీక్ష వాయిదా వేయాలని కొందరు వైద్యుల బృందం సుప్రీం కోర్టులో పిటిషన్​ దాఖలు చేసింది.