Viral Video: గుజరాత్లో కొంతమంది ఆకతాయిలను పోలీసులు.. కరెంట్ స్తంభానికి కట్టేసి చితక్కొట్టిన వీడియో సోషల్ మీడియాలో వైరల్ అవుతోంది. దసరా నవరాత్రుల సందర్భంగా మహిళలు, చిన్నారులంతా కలిసి గార్బా ఆడుతుండగా కొందరు ఆకతాయిలు వాళ్లపై రాళ్లు రువ్వారు. దీంతో పోలీసులు వాళ్లను పట్టుకుని ఇలా దేహశుద్ధి చేశారు.
ఇదీ జరిగింది
ఖేడా జిల్లాలో దసరా నవరాత్రుల వేడుకలు అంగరంగ వైభవంగా జరుగుతున్నాయి. ఈ సందర్భంగా కొంతమంది మహిళలు రోడ్డుపై గార్బా నృత్యం చేస్తున్నారు. ఆ సమయంలో కొంతమంది కుర్రాళ్లు.. వారిపై రాళ్లు రువ్వారు. దీంతో కొంతమందికి గాయాలయ్యాయి. ఆ సమయంలో అక్కడున్న పోలీసులు వెంటనే రంగంలోకి దిగి ఆకతాయిలను పట్టుకున్నారు.
వారికి బుద్ధి చెప్పేందుకు కరెంట్ స్తంభానికి కట్టేసి లాఠీలతో కొట్టారు. దీనికి సంబంధించిన వీడియోను కొంతమంది సోషల్ మీడియాలో షేర్ చేయడంతో వైరల్ అవుతోంది.
ఆకతాయిలను కొడుతున్న సమయంలో పోలీసులు యూనిఫాంలో లేరు. అయితే అక్కడున్న ఇన్స్పెక్టర్ దగ్గర రివాల్వర్ ఉన్నట్లు వీడియోలో కనిపిస్తోంది. దేహశుద్ధి తర్వాత నిందితులు అక్కడున్న వారికి క్షమాపణలు చెప్పారు.