రాజస్థాన్‌లో నాలుగు వైద్య కళాశాలలకు వర్చువల్గా శంకుస్థాపన చేశారు ప్రధాని నరేంద్ర మోదీ. బన్స్వారా, సిరోహి, హనుమాన్గఢ్, దౌసా జిల్లాల్లో ఈ కళాశాలలు నిర్మించనున్నారు. జైపుర్ సితాపురాలో పెట్రోకెమికల్స్ టెక్నాలజీ ఇన్‌స్టిట్యూట్‌ను కూడా ప్రారంభించారు. దేశ ఆరోగ్య రంగంలో సమూల మార్పులు తీసుకొచ్చేందుకు నూతన జాతీయ ఆరోగ్య విధానం కోసం కృషి చేస్తున్నామని ఈ సందర్భంగా మోదీ అన్నారు.
ఈ శంకుస్థాపన కార్యక్రమంలో కేంద్ర ఆరోగ్య శాఖ మంత్రి మన్‌సుఖ్ మాండవీయా, రాజస్థాన్ సీఎం అశోక్ గహ్లోత్, లోక్సభ స్పీకర్ ఓం బిర్లా వర్చువల్గా హాజరయ్యారు.
డిజిటల్ హెల్త్ ఐడీలు..
ఆయుష్మాన్ భారత్ డిజిటల్ మిషన్‌లో భాగంగా ప్రతి భారతీయుడికీ హెల్త్ ఐడీ కేటాయిస్తామని ప్రధాని నరేంద్ర మోదీ అన్నారు. ఆయుష్మాన్ భారత్ ప్రారంభించి మూడేళ్లు పూర్తయిన సందర్భంగా ఈ కార్యక్రమాన్ని మొదలుపెట్టినట్లు వెల్లడించారు.
ఆరు కేంద్ర పాలిత ప్రాంతాల్లో ఇప్పటికే పైలట్ ప్రాజెక్టుగా పీఎండీహెచ్ఎం అమలవుతోంది. టెక్నాలజీ ఆధారంగా దేశ ప్రజలందరికీ వైద్య సేవలు అందించడం కోసం కేంద్రం ఈ కార్యక్రమం చేపడుతోంది.
ఎలా పనిచేస్తుంది?
- ఈ పథకంలో భాగంగా దేశ ప్రజలకు హెల్త్ కార్డ్‌లతో పాటు హెల్త్ ఐడీలను అందించనున్నారు.
- వీటి ఆధారంగా ప్రజలు తమ ఆరోగ్య సమాచారాన్ని ఆయుష్మాన్ భారత్ డిజిటల్ వెబ్‌సైట్‌లో అప్‌డేట్‌ చేయలి.
- ఎవరైనా అనారోగ్య సమస్యలతో ఆస్పత్రికి వెళ్లినా, ట్రీట్మెంట్‌ రికార్డ్‌లను పోగొట్టుకున్నా సంబంధిత సమాచారం ఈ వెబ్‌సైట్‌లో భద్రంగా ఉంటుంది.
- హెల్త్ ఐడీ చెబితే మన ఆరోగ్య వివరాలు మొత్తం తెలుస్తాయి.
Also Read: ISIS Terrorist: కబాబ్ మార్చిన కథ.. ఏకంగా ఐసిస్ ఉగ్రవాదినే పట్టించేసింది!