Taiwan Fire Accident: 13 అంతస్తుల భవనంలో అగ్నిప్రమాదం.. 46 మంది మృతి

తైవాన్​లో సంభవించిన ఘోర అగ్ని ప్రమాదంలో 46 మంది మరణించారు. అనేక మంది గాయపడ్డారు.

తైవాన్‌లో ఘోర అగ్నిప్రమాదం జరిగింది. కాహ్సిఅంగ్ నగరంలో జరిగిన ఈ ప్రమాదంలో సుమారు 46 మంది ప్రాణాలు కోల్పోయారు. 80 వరకు తీవ్రంగా గాయపడ్డారు. 

ఏం జరిగింది?

గురువారం తెల్లవారుజామున ఈ అగ్నిప్రమాదం జరిగినట్లు సమాచారం. నగరంలోని 13 అంతస్తుల భవనంలో మంటలు చెలరేగాయి. స్థానికులు అగ్నిమాపక సిబ్బందికి సమాచారమిచ్చారు. అయితే అప్పటికే ఘోరం జరిగిపోయింది. 

భవనం మొత్తం మంటలు చెలరేగడంతో వాటిని ఆర్పడానికి అగ్నిమాపక సిబ్బందికి నాలుగు గంటల సమయం పట్టినట్లు స్థానికులు తెలిపారు. ప్రమాదంలో గాయపడిన క్షతగాత్రులను ఆసుపత్రికి తరలించినట్లు అధికారులు తెలిపారు. అయితే ప్రమాదానికి గల కారణాలు తెలియాల్సి ఉంది.

అక్కడే మొదలు..

భవనంలో అస్తవ్యస్తంగా సామగ్రి పడి ఉన్నచోటే మంటలు వ్యాపించినట్లు అధికారికంగా ప్రాథమికంగా గుర్తించారు. ఈ అగ్ని ప్రమాద తీవ్రతకు భవనంలోని పలు అంతస్తులు ధ్వంసమయ్యాయని అధికారులు తెలిపారు. దాదాపు 40 సంవత్సరాల క్రితం నిర్మించిన ఈ భవనంలో కింద షాపింగ్ కాంప్లెక్స్​లు, పైన అపార్ట్‌మెంట్లు ఉన్నాయి.

అయితే అగ్నిప్రమాదానికి ముందు పెద్ద పేలుడు శబ్దం వినిపించినట్లు స్థానికులు తెలిపారు. మృతుల సంఖ్య పెరిగే అవకాశం ఉంది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి