Mother Amritanandamayi message:బీజేపీ జాతీయ కౌన్సిల్ సభ్యులు ఎస్. విష్ణువర్ధన్ రెడ్డి కేరళ పర్యటనలో భాగంగా ప్రముఖ ఆధ్యాత్మిక వేత్త, 'హగ్గింగ్ సెయింట్'గా ప్రసిద్ధి చెందిన మాతా అమృతానందమయి ను దర్శించుకున్నారు. కొల్లం జిల్లాలోని అమృతపురి ఆశ్రమానికి వెళ్లిన ఆయన, అమ్మ ఆశీస్సులు తీసుకోవడం తన పూర్వజన్మ సుకృతంగా అభివర్ణించారు. ప్రపంచవ్యాప్తంగా కోట్లాది మందికి ఆధ్యాత్మిక గురువుగా, సేవామూర్తిగా వెలుగొందుతున్న మాతా అమృతానందమయి దేవిని బీజేపీ జాతీయ కౌన్సిల్ సభ్యులు ఎస్. విష్ణువర్ధన్ రెడ్డి మర్యాదపూర్వకంగా కలిశారు. కేరళలోని కొల్లం జిల్లా సముద్ర తీరప్రాంతంలో ఉన్న అమృతపురి ఆశ్రమానికి వెళ్లిన ఆయనకు అమ్మ సాదర స్వాగతం పలికారు. ఈ సందర్భంగా అమ్మ ఆశీస్సులు పొందడం తన జీవితంలో మర్చిపోలేని అద్భుత ఘట్టమని, లోకకల్యాణం కోసం అహర్నిశలు శ్రమిస్తున్న మహాత్మురాలిని కలవడం ఆధ్యాత్మిక బలాన్ని ఇచ్చిందని ఆయన పేర్కొన్నారు.
ఈ భేటీ సందర్భంగా మాతా అమృతానందమయి, విష్ణువర్ధన్ రెడ్డిల మధ్య సుదీర్ఘ చర్చలు జరిగాయి. దేశాభివృద్ధి, సమాజ శ్రేయస్సు, పేదల అభ్యున్నతి కోసం చేపట్టాల్సిన సేవా కార్యక్రమాలపై అమ్మ ఆయనకు దిశానిర్దేశం చేశారు. ముఖ్యంగా సమాజంలో సానుకూల మార్పు తీసుకురావాలంటే రాజకీయ నాయకులకు సేవాభావం, నిబద్ధత, సహనం ఎంత అవసరమో ఆమె వివరించారు. రాజకీయాలకు అతీతంగా మానవ విలువల కోసం పనిచేయాలని ఆమె అందించిన మార్గదర్శకాలు తనను ఎంతో ప్రభావితం చేశాయని విష్ణువర్ధన్ రెడ్డి వెల్లడించారు.
ముఖ్యంగా అణగారిన వర్గాల సంక్షేమం కోసం, ప్రజలకు మరింత చేరువ కావాలని అమ్మ ఇచ్చిన సూచనలు తనపై బాధ్యతను మరింత పెంచాయని విష్ణువర్ధన్ రెడ్డి తెలిపారు. సేవలో భాగస్వామ్యం కావడం ద్వారానే నిజమైన సంతృప్తి లభిస్తుందని ఆమె చెప్పిన మాటలు భవిష్యత్ కార్యాచరణకు స్పష్టతనిచ్చాయని అన్నారు. అమ్మ చూపిన మార్గంలో పయనిస్తూ, సమాజ సేవలో మరింత చురుగ్గా పాల్గొంటానని, ఆమె ఆశీస్సులు తన అడుగుజాడలకు శ్రీరామరక్షగా నిలుస్తాయని ఆయన విశ్వాసం వ్యక్తం చేశారు.
అమ్మ ఆశీస్సులు కేవలం వ్యక్తిగత ఆధ్యాత్మిక బలం మాత్రమే కాకుండా, ప్రజా సేవలో తన సంకల్పాన్ని మరింత దృఢపరిచే శక్తిగా నిలుస్తాయని విష్ణువర్ధన్ రెడ్డి పేర్కొన్నారు. తన జీవితాంతం ప్రజా క్షేమం కోసం పనిచేయాలనే పట్టుదలను ఈ భేటీ పెంచిందని, తన ప్రతి అడుగులో అమ్మ మార్గదర్శనం దిశానిర్దేశం చేస్తుందని నమ్ముతున్నట్లు తెలిపారు.