Best Tips To Improve Car Mileage: ఇండియాలో పెట్రోల్, డీజిల్ ధరలు నిరంతరం పెరుగుతుండటంతో వాహనదారులపై ఆర్థిక భారం భారీగా పెరుగుతోంది. ఈ పరిస్థితుల్లో కార్ల ఇంధన సామర్థ్యం లేదా మైలేజ్ అనేది చాలా కీలకంగా మారింది. ఇంధన ధరలు కస్టమర్ల చేతుల్లో లేకపోయినప్పటికీ, రోజువారీ డ్రైవింగ్ అలవాట్లు, సరైన మెయింటెనెన్స్ లేకపోవడం వల్ల మైలేజ్ తగ్గి రన్నింగ్ కాస్ట్స్ పెరుగుతున్నాయి. ఆధునిక కార్లు మంచి మైలేజ్ ఇచ్చేలా డిజైన్ చేయబడినప్పటికీ, డ్రైవర్ల చిన్న చిన్న తప్పుల వల్ల ఎక్కువ ఇంధనం వృథా అవుతోంది. కొన్ని సాధారణ విషయాల్లో జాగ్రత్తలు తీసుకుంటే మైలేజ్ ని గుర్తించదగిన స్థాయిలో పెంచుకోవచ్చని ఆటోమొబైల్ నిపుణులు చెబుతున్నారు.
అగ్రెసివ్ డ్రైవింగ్ శైలి..
కార్లలో ఇంధన వినియోగం ఎక్కువగా ఉండటానికి అగ్రెసివ్ డ్రైవింగ్ ప్రధాన కారణం. సిటీ ట్రాఫిక్ లో వేగంగా వెళ్లాలనే ఉద్దేశంతో సడన్ గా యాక్సిలరేషన్ ఇవ్వడం, హార్డ్ బ్రేకింగ్ వేయడం, తరచుగా లైన్లు మారడం వల్ల ఇంజన్ పై అదనపు లోడ్ పడి ఎక్కువ ఫ్యూయల్ ఖర్చవుతుంది. స్థిరమైన స్పీడ్ మెయింటెయిన్ చేయడం, స్మూత్ థ్రోటిల్ ఇన్పుట్స్ ఇవ్వడం వల్ల సిటీ, హైవే కండిషన్లలో మంచి మైలేజ్ వస్తుంది. అలాగే టైర్లలో గాలి తక్కువగా ఉండటం వల్ల రోలింగ్ రెసిస్టెన్స్ పెరిగి ఇంజన్ ఎక్కువ ఇంధనాన్ని లాగుతుంది. ఇది మైలేజ్ తో పాటు టైర్ల లైఫ్, హ్యాండ్లింగ్ పర్ఫార్మెన్స్ ని దెబ్బతీస్తుంది. ఆఫ్టర్ మార్కెట్ ఓవర్సైజ్ వీల్స్, వెడల్పాటి టైర్లు వాడటం వల్ల కూడా మైలేజ్ తగ్గుతుంది.
కారులో అదనపు బరువు..
వాహనంలో అనవసరమైన లగేజీ, టూల్స్, యాక్సెసరీలు ఎక్కువ కాలం ఉంచడం వల్ల బరువు పెరిగి ఇంజన్ పై భారం పడుతుంది. ముఖ్యంగా హ్యాచ్బ్యాక్, కాంపాక్ట్ ఎస్యూవీ కార్లలో ఈ బరువు ప్రభావం స్పష్టంగా కనిపిస్తుంది. హైవేలపై వెళ్లేటప్పుడు రూఫ్ క్యారియర్లు, రూఫ్ బాక్సులు అమర్చడం వల్ల కారు ఎయిర్ ఏరోడైనమిక్స్ దెబ్బతిని ఎక్కువ ఫ్యూయల్ వినియోగం అవుతుంది. వీటితో పాటు టైమ్కి సర్వీసింగ్ చేయించకపోవడం మైలేజ్ను బాగా తగ్గిస్తుంది. ఇంజన్ ఆయిల్, ఎయిర్ ఫిల్టర్లు, స్పార్క్ ప్లగ్స్, ఫ్యూయల్ ఫిల్టర్లను క్రమం తప్పకుండా మార్చాలి. మురికిగా ఉన్న ఎయిర్ ఫిల్టర్లు, పాత ఇంజన్ ఆయిల్ వల్ల బిఎస్6 ఇంజన్లపై లోడ్ పెరుగుతుంది. వీల్ అలైన్మెంట్ సమస్యలు కూడా ఇంధన వృథాకు దారితీస్తాయి.
నావిగేషన్ యాప్స్ వాడకం
బెంగళూరు, ఢిల్లీ, ముంబై వంటి రద్దీ నగరాల్లో ఎక్కువసేపు కార్లను ఐడ్లింగ్ మోడ్లో (ఇంజన్ ఆన్ చేసి ఉంచడం) ఉంచడం వల్ల చాలా ఫ్యూయల్ వృథా అవుతోంది. సిగ్నల్స్ వద్ద లేదా ఎవరి కోసమైనా ఎక్కువ సమయం వేచి చూసేటప్పుడు ఇంజన్ ఆఫ్ చేయడం మంచి అలవాటు. ఐడ్లింగ్ సమయంలో ఏసీని నిరంతరం రన్ చేయడం వల్ల రన్నింగ్ కాస్ట్స్ మరింత పెరుగుతాయి. ట్రాఫిక్ జామ్స్ నుండి తప్పించుకోవడానికి మోడర్న్ నావిగేషన్ యాప్స్ ఉపయోగించడం ద్వారా క్లియర్ రూట్లను ఎంచుకోవచ్చు. స్మూత్ డ్రైవింగ్, ప్రాపర్ టైర్ ప్రెజర్, అదనపు బరువును తొలగించడం, రెగ్యులర్ సర్వీసింగ్, ఐడ్లింగ్ తగ్గించడం వంటి సింపుల్ మెజర్స్ ద్వారా నెలవారీ ఇంధన ఖర్చులను గణనీయంగా తగ్గించుకోవచ్చు.