Ant Research: ఈ ప్రపంచంలో మొత్తం ఎన్ని చీమలు ఉన్నాయో తెెలుసా? మనుషుల గురించి పట్టించుకునే టైమే లేదు.. ఇక చీమల సంగతెందుకు? అనుకోకండి. ఎందుకంటే ఈ భూమి మీద ఉన్న చీమల సంఖ్య తెలిస్తే అవాక్కవుతారు.
పెద్ద సాహసమే
ఈ ప్రపంచంలో మనుషుల కంటే చీమల సంఖ్యే ఎక్కువ. ఇది ఎప్పుడో తెలిసిన విషయమే. అయితే వాటి సంఖ్య ఎంతో తెలుసుకునేందుకు హాంకాంగ్‌కు చెందిన కొందరు పరిశోధకులు ఓ సాహసం చేశారు. చీమల సంఖ్యను లెక్కగట్టే ప్రయత్నం చేశారు. ఏకంగా 489 అధ్యయనాల నుంచి సేకరించిన సమాచారం ద్వారా ఓ విషయాన్ని వెల్లడించారు.
భూమిపై 20,000,000,000,000,000 లేదా 20 క్వాడ్రిలియన్ల చీమలు ఉన్నాయని అంచనా వేశారు. అయితే వాటి సాంద్రత దృష్ట్యా కచ్చితమైన సంఖ్యను మాత్రం చెప్పలేకపోతున్నామన్నారు. ఈ పరిశోధనలు నేషనల్ అకాడమీ ఆఫ్ సైన్సెస్ ప్రొసీడింగ్స్ జర్నల్‌లో ప్రచురితమయ్యాయి.
బయోమాస్
భూగోళం మీద చీమల బయోమాస్ 12 మిలియన్ టన్నులుగా అధ్యయన బృందం వెల్లడించింది. ఓ ప్రాంతం లేదా వాల్యూమ్‌లోని జీవుల మొత్తం పరిమాణం కానీ బరువును సూచించడాన్ని బయోమాస్ అంటారు. అడవిలో నివసించే పక్షులు, క్షీరదాల మొత్తం బరువు కలిపి సుమారు 2 మిలియన్ టన్నులు ఉంటుందని తెలిపింది.
ఇంట్రెస్టింగ్ ఫ్యాక్ట్స్
చీమలు ఒకే వరుసలో వెళ్లటం మనం చాలా సార్లు చూసే ఉంటాం. దీనికి ఓ సైంటిఫిక్ రీజన్ ఉందట. చీమలు నిత్యం Pheromones అనే కెమికల్ సెంట్‌ను తమ శరీరం నుంచి స్రవిస్తుంటాయి. చీమలు ఒకరితో ఒకటి ఇలా ఫెరోమోన్స్‌ ద్వారానే కమ్యూనికేట్ అవుతాయి. ఈ కెమికల్ ద్వారానే వెనకాల వచ్చే చీమలకు వార్నింగ్ ఇస్తుంటాయి. దగ్గర్లో శత్రువు ఉంటే అప్రమత్తం చేయాలన్నా, లేదంటే...ఆహారం దొరికే స్థలాన్ని కనుక్కోటానికైనా ఈ కెమికల్‌తోనే సిగ్నల్స్ ఇచ్చేస్తాయన్నమాట.
చీమలు నివసించే చోటుని ఓ కాలనీ అనుకుందాం. ఆ కాలనీ నుంచి కొన్ని చీమలు మాత్రమే ఆహార అన్వేషణకు బయల్దేరతాయి. ఓసారి ఫుడ్ సోర్స్‌ని కనుక్కోగానే...అక్కడి నుంచి మళ్లీ తమ కాలనీకి తిరుగు పయన మవుతాయి. ఈ వచ్చే క్రమంలో ఆ దారంతా ఫెరోమోన్స్‌ను విడుదల చేస్తాయి. నేరుగా తమ చోటుకి వెళ్లి మిగతా చీమలతో కమ్యూనికేట్ చేస్తాయి. అవి మళ్లీ కలిసి కట్టుగా ఫెరోమోన్స్‌ విడుదల చేసిన దారిలోనే ఫుడ్ సోర్స్‌ వద్దకు వెళ్తాయి. ఆహారం దొరికేంత వరకూ ఇలా అన్ని చీమలూ ఆ కెమికల్‌ను రిలీజ్ చేస్తూనే ఉంటాయి. వెనకాల వచ్చే చీమలు ఆ కెమికల్‌ను సెన్స్ చేస్తూ వచ్చేస్తాయి. ఆహారం అంతా ఆరగించాక మళ్లీ అవే ఫెరోమోన్స్‌ సాయంతో తమ సొంత చోటుకు వచ్చేస్తాయి.
Also Read: Heroin Seized In Mumbai: 22 టన్నుల హెరాయిన్ స్వాధీనం- విలువ తెలిస్తే మైండ్ బ్లాక్ అవుద్ది!