Curd: పెరుగు భోజనానికి ముందు తింటే మంచిదా? లేక తరువాత తింటే మంచిదా?

చలికాలంలో పెరుగు తినడం వల్ల జలుబు, దగ్గు వస్తాయని అంటారు. అది ఎంతవరకు వాస్తవం.

పెరుగు ఆరోగ్యానికి ఎంత మంచిదో అందరికీ తెలిసిందే. కొన్ని రకాల స్నాక్స్, టిఫిన్స్, కూరల్లో పెరుగు వేసుకొనిదే వాటికి రుచి రాదు. భారతీయులకి అయితే పెరుగు ఆహారంలో విడదీయరాని భాగం. పెరుగుతో భోజనం ముగించనిదే కొందరికి కడుపు నిండినట్టు అనిపించదు. అందుకే తప్పనిసరిగా పెరుగు ఇళ్ళల్లో ఉండాల్సిందే. అయితే పెరుగు ఎప్పుడు తీసుకోవాలి, చలికాలంలో పెరుగు తీసుకుంటే ఆరోగ్య సమస్యలు ఏవైనా వస్తాయా అనే సందేహాలు చాలా మందిలో ఉంటాయి. వాస్తవానికి చలికాలంలో పెరుగు తినడం కూడా మంచిదే.

రోజు పెరుగు తినడం వల్ల కలిగే ప్రయోజనాలు

పెరుగు రోజువారీ ఆహారంలో ఒక ముఖ్యమైన భాగం. పెరుగు కడుపుని చల్లగా ఉంచడమే కాదు శరీరాన్ని డీహైడ్రేట్ కాకుండా కాపాడుతుంది. రోజు పెరుగు తినడం వల్ల జీవక్రియని వేగవంతమ చేయడంలో సహాయపడుతుంది. ఆహారం నుండి పోషకాలని శోషించుకుంటుంది. ఎముకల ఆరోగ్యాన్ని బలోపేతం చేస్తుంది. పేరుగులో ఉండే ప్రోబయాటిక్స్, ప్రీబయాటిక్స్ ఉండటం వల్ల పేగుల ఆరోగ్యాన్ని కాపాడుతుంది. జీర్ణక్రియని మెరుగుపరిచి, మంటని తగ్గిస్తుంది.

పెరుగు ఎప్పుడు తినాలి?

ఆయుర్వేదం ప్రకారం కూడా పెరుగు తినడానికి నిర్ధిష్ట సమయం ఉంటుంది. పెరుగు భోజనానికి ముందు తినడం మంచిదని కొత్త అధ్యయనం వెల్లడించింది. విస్కాన్సిన్ మాడిసన్ విశ్వవిద్యాలయం జీవక్రియ పరిస్థితులపై చేసిన పరిశోధన ప్రకారం భోజనం తర్వాత తినడం కంటే పెరుగు భోజనానికి ముందు తినడం మంచి ఆలోచన అని చెప్తున్నారు. భోజనానికి ముందు పెరుగు తినే స్త్రీలు గత ఇన్ఫ్లమేషన్లో గణనీయమైన మార్పులు గుర్తించినట్టు తెలిపారు. దీని వల్ల జీర్ణక్రియ మెరుగుపడిందని పరిశోధకులు కనుగొన్నారు.

చలికాలంలో పెరుగు తీసుకోకూడదా?

పెరుగు చలికాలంలో తీసుకుంటే దాని చల్లదనం వల్ల జలుబు, దగ్గు వంటివి వస్తాయని అంటారు. అయితే అదంతా అపోహ మాత్రమే అని వైద్యులు కొట్టి పడేస్తున్నారు. చలికాలంలో పెరుగు తినాలని అనుకుంటే దానిలో తేనె, నల్ల మిరియాలు లేదా వేయించిన జీలకర్ర పొడి కలుపుకుని తీసుకోవచ్చు. ఇది ఆరోగ్యాన్ని సురక్షితంగా చేస్తుంది. శరీరానికి అవసరమైన శక్తిని ఇవ్వడంలో సహాయపడుతుంది. శరీరంలో శ్లేష్మం ఏర్పడతాన్ని తగ్గిస్తుంది. జీర్ణక్రియ, మలబద్ధకం సమస్యని నివారిస్తుంది.

చలికాలంలో పెరుగు తినడం వల్ల ప్రయోజనాలు

పెరుగులో విటమిన్స్ తో పాటు పొటాషియం, మెగ్నీషియం, ప్రోటీన్ ఉంటాయి. ఇందులో ఉండే విటమిన్ సి జలుబు, దగ్గుని నియంత్రిస్తుంది. కడుపులో ఎసిడిటీ ఏర్పడకుండా pH స్థాయిని సమతుల్యం చేస్తుంది. ఇది తక్కువ కొవ్వు, కేలరీలు కలిగి ఉండటం వల్ల బరువు పెరుగుతారనే భయం కూడా అక్కర్లేదు. చర్మాన్ని కాంతివంతంగా ఉంచుతుంది. చలికాలంలో పెరుగు తీసుకున్నా, చర్మానికి రాసుకున్నా మంచిదే.

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.