కండోమ్‌లు ఎందుకు ఉపయోగిస్తారో మీకు తెలిసిందే. కానీ పశ్చిమ బెంగాల్ విద్యార్థులు కండోమ్‌లను మరోలా వాడుతున్నారు. కండోమ్‌లను నీటిలో వేసి ఉడికించి, ఆ నీరు తాగేస్తున్నారు. ఛీ.. యాక్, అదేం పని అని అనుకుంటున్నారా? ఇందుకో కారణం ఉంది.
పశ్చిమ బెంగాల్‌లోని దుర్గాపూర్‌లో విద్యార్థులు కండోమ్‌ల వాడకానికి అలవాటు పడ్డారు. కానీ ఇందులో ఓ ట్విస్ట్ ఉంది. వాళ్లు ఆ కండోమ్‌లు కొనుగోలు చేస్తున్నది పడక గది సుఖానికి కాదు. వాటిని మరిగించుకుని తాగడం కోసం. ఔనండి, మీరు చదివింది కరెక్టే. కండోమ్‌లు కొనుగోలు చేస్తున్న విద్యార్థులు.. వాటిని వేడి నీటిలో నానబెట్టి, ఆ ద్రవాన్ని తాగుతున్నారు. దీంతో వారికి సుమారు 10 నుంచి 12 గంటల వరకు కిక్కు వస్తుంది.
దుర్గాపూర్ సిటీ సెంటర్, బిధాన్‌నగర్, బెనచిటి, ముచ్చిపారా, సి జోన్, ఎ జోన్ తదితర పరిసరాల్లో ఫ్లేవర్(సువాసనలు వెదజల్లే) కండోమ్‌ల అమ్మకాలు బాగా పెరిగాయి. కుర్రాళ్లు కట్టల కట్టల కండోమ్‌లు కొనుగోలు చేస్తుంటే.. ఓ మెడికల్ షాప్ యజమానికి అనుమానం కలిగింది. దీనిపై ఆరా తీయగా అసలు విషయం తెలిసింది. వాళ్లు కండోమ్‌లు వాడుతున్నది లైంగిక చర్యలకు కాదని, వాటిని డ్రగ్స్‌గా తీసుకుంటున్నారని తెలిసి ఆశ్చర్యపోయాడు.
ఆ దుకాణ యజమాని ఓ మీడియా సంస్థతో మాట్లాడుతూ.. ‘‘ఇదివరకు రోజుకు మూడు నుంచి నాలుగు ప్యాకెట్ల కండోమ్‌లు మాత్రమే అమ్ముడయ్యేవి. ఇప్పుడు కట్టకట్టల కండోమ్‌లు అమ్ముడవుతున్నాయి’’ అని తెలిపాడు. ఓ కెమిస్ట్రీ టీచర్ దీని గురించి వివరిస్తూ.. ‘‘కండోమ్‌లను వేడి నీటిలో ఎక్కువసేపు నానబెట్టడం వల్ల పెద్ద ఆర్గానిక్ అణువులు విచ్ఛిన్నమై ఆల్కహాల్ సమ్మేళనాలు ఏర్పడతాయి. ఆ ద్రవం డ్రగ్స్ తరహాలో మత్తు ఇస్తుంది’’ అని తెలిపారు.
సువాసనలు వెదజల్లే కండోమ్‌లలో మాత్రమే ఆల్కహాల్ ఉంటుందని మరో నిపుణుడు తెలిపాడు. దగ్గు సిరప్, హ్యాండ్ శానిటైజర్, ఆప్టర్ సేవ్, జిగురు, పెయింట్, నెయిల్ పాలిష్, వైట్‌నర్, మార్కర్స్‌లో కూడా ఇలాంటి ఆల్కహాల్ ఉంటుంది. అయితే, వాటిని తీసుకోవడం చాలా ప్రమాదకరం. అయితే, ఈ విధంగా మత్తులో జోగే వ్యక్తులను పోలీసులు అదుపులోకి తీసుకోవడం కష్టమేనట. ఇటీవల హైదరాబాద్ అధికారులు స్పందిస్తూ.. మార్కెట్లో లభించే వస్తువులకు బానిసయ్యేవారిపై చర్యలు తీసుకోడానికి భారతీయ శిక్షాస్మృతిలో సంబంధిత నిబంధనలు లేవని తెలిపారు. వైట్‌నర్లు, దగ్గు సిరప్‌లు వంటి ఉత్పత్తులు నార్కోటిక్ డ్రగ్స్, సైకోట్రోపిక్ చట్టం పరిధిలోకి రావు. ఎందుకంటే వాటిలో తక్కువ పరిమాణంలో మత్తుమందులు (NDPS) ఉంటాయి.
Also Read: ఈ వయస్సు వచ్చాక మగాళ్ల లైంగిక శక్తి మటాష్, ఇలా చేస్తే సేఫ్!
Also Read: ఎలోన్ మస్క్ తండ్రి వీర్యానికి అంత డిమాండా? 76 ఏళ్ల వయస్సులోనూ అదేపని!