Watermelon Safety Guide : పుచ్చకాయ ఆరోగ్యానికి మేలు చేస్తుంది. పైగా వేసవిలో తినేందుకు అనువైన ఆహారం. అందుకే దీనిని చాలామంది డైట్లో చేర్చుకుంటారు. కానీ సరైన పద్ధతిలో స్టోర్ చేయకుండా.. సరైన సమయంలో తీసుకోకుంటే ఆరోగ్యానికి ప్రమాదంగా మారవచ్చు. ముంబైలోని పైధోనిలో జరిగిన ఘటనే.. దీనికి ఉదాహరణగా చెప్పవచ్చు. వైరల్ అవుతున్న ఈ ఘటన గురించిన పూర్తి విషయాలతో పాటు.. పుచ్చకాయ ఏ సమయంలో తింటే మంచిదో.. పుచ్చకాయ తినేముందు చేయకూడని తప్పులు ఏంటో చూసేద్దాం.
ముంబై విషాదం..
ముంబై పైధోని ప్రాంతంలో ఒకే కుటుంబంలోని నలుగురు 24 గంటల వ్యవధిలో మృతి చెందారు. రాత్రి 10 గంటల సమయంలో బంధువులతో కలిసి తిని.. వారు వెళ్లిపోయిన తర్వాత మధ్యరాత్రి 1 గంట సమయంలో కట్ చేసిన పుచ్చకాయ తిన్నారు. మరుసటి రోజు ఉదయం 5 తర్వాత వాంతులు, అస్వస్థత మొదలైంది. దాంతో వారు ఆస్పత్రిలో చేరారు. ఒకరి తర్వాత ఒకరు మృతి చెందారు. ఫోరెన్సిక్ రిపోర్టులు రావాల్సి ఉంది. అయితే అధికారులు ఇది ఫుడ్ పాయిజనింగ్గా అనుమానిస్తున్నారు.
వైరల్ ఎందుకవుతుందంటే..
బిర్యానీ, పుచ్చకాయ కాంబినేషన్ వల్ల ఇలా జరుగుతుందా అనే పోస్ట్లు సోషల్ మీడియాలో వైరల్ అయ్యాయి. అయితే కొందరు బిర్యానీ రిలేటివ్స్తో తిన్నారు. వాళ్లు బాగానే ఉన్నారు. కానీ ఫ్యామిలీ అంతా పుచ్చకాయ తిన్నారు కాబట్టి.. అదే వారు చనిపోవడానికి కారణమంటూ సోషల్ మీడియాలో కామెంట్లు పెడుతున్నారు. నిజంగానే పుచ్చకాయ అర్థరాత్రి తింటే అంత ప్రమాదమా? పుచ్చకాయ తినడంలో తీసుకోవాల్సిన జాగ్రత్తలు ఏంటో, నిపుణుల సూచనలు ఇప్పుడు తెలుసుకుందాం.
పుచ్చకాయతో హెల్త్ బెనిఫిట్స్..
కచ్చితంగా పుచ్చకాయ ఆరోగ్యానికి చాలా మంచిది. దీనిలో 92 శాతం నీరు ఉంటుంది. దీనివల్ల డీహైడ్రేషన్ దూరమవుతుంది. దీనిలోని యాంటీఆక్సిడెంట్లు గుండె, కిడ్నీల ఆరోగ్యాన్ని కాపాడతాయి. తక్కువ కేలరీలు బరువు తగ్గిస్తాయి. విటమిన్ సి, ఎ, బి6 అధికంగా ఉంటాయి. ఆరోగ్యానికి మంచిది అయినా పుచ్చకాయ తినే విషయంలో కొన్ని జాగ్రత్తలు తీసుకోవాలి.
పుచ్చకాయ తినడానికి సరైన సమయం
మీరు పుచ్చకాయ తినాలనుకుంటే.. ఉదయం 10 నుంచి మధ్యాహ్నం 12 మధ్యలో.. బ్రేక్ఫాస్ట్ తర్వాత లేదా లంచ్కు ముందు తింటే చాలా మంచిది. మధ్యాహ్నం 2 నుంచి 4 మధ్య స్నాక్గా కూడా తీసుకోవచ్చు. పుచ్చకాయలో నీరు అధికంగా ఉండటం వల్ల మధ్యాహ్నం తింటే శరీరం చల్లగా మారుతుంది.
ఎప్పుడు తినకూడదంటే..
రాత్రుళ్లు 8 తర్వాత పుచ్చకాయ తినకపోవడమే మంచిది. ఎందుకంటే దీనిలోని చక్కెర, నీరు ఎక్కువగా ఉండటం వల్ల జీర్ణం కావడానికి సమయం పడుతుంది. నిద్రపోయే ముందు తింటే బ్లడ్ షుగర్ పెరగవచ్చు. తరచూ మూత్రవిసర్జన అవుతుంది. దీని వల్ల నిద్ర భంగమవుతుంది. అలాగే భోజనం తర్వాత వెంటనే తినకపోవడమే మంచిది.
తీసుకోవాల్సిన జాగ్రత్తలు
పుచ్చకాయ కొనే ముందు మంచిది ఎంచుకోవాలి. తొక్క మృదువుగా లేదా మచ్చలు ఉంటే కొనకండి. మార్కెట్లో కట్ చేసి పెట్టిన పుచ్చకాయ తినకండి. ఎందుకంటే కోసి ఎంతసేపు అయిందో తెలియదు. అలాగే పుచ్చకాయను కోసే ముందు కడగండి. దీనివల్ల బయటివైపు బ్యాక్టీరియా లోపలికి వెళ్లదు. కట్ చేసిన పుచ్చకాయను 2 గంటల కంటే ఎక్కువసేపు ఉంచకండి. గది ఉష్ణోగ్రత వద్ద బాక్టీరియా వేగంగా పెరుగుతుంది. CDC ప్రకారం ఇది అత్యంత ముఖ్యమైన నియమం.
ఫ్రిజ్లో పెడితే సరిగ్గా నిల్వ చేయాలి. కట్ చేసిన పుచ్చకాయను ఎయిర్టైట్ కంటైనర్లో పెట్టి ఫ్రిజ్లో 4°C కంటే తక్కువ ఉష్ణోగ్రత వద్ద ఉంచండి. దీనిని 24 గంటల్లో తినేస్తే చాలా మంచిది. కట్ చేసి పుచ్చకాయను చాలాసేపు బయట ఉంచి తింటే అస్సలు మంచిది కాదు. అలాగే పుచ్చకాయ జ్యూస్ చేసుకుంటే అరగంట లోపు తాగండి. నిల్వ చేయడం వల్ల బాక్టీరియా పెరుగుతుంది. పోషకాలు తగ్గుతాయి.
ఫుడ్ పాయిజనింగ్ లక్షణాలు కనిపిస్తే..
ఏ ఫుడ్ తిన్నా.. వాంతులు, విరేచనాలు అవుతుంటే ఫుడ్ పాయిజనింగ్గా గుర్తించి వెంటనే వైద్య సహాయం తీసుకోవాలి. తీవ్రమైన కడుపు నొప్పి, తీవ్ర జ్వరం, మైకం, అలసట కూడా దీని లక్షణాలే. కాబట్టి ఈ లక్షణాలు విస్మరించకండి. సొంత వైద్యం కాకుండా వైద్య సహాయం తీసుకోవాలి. నిర్లక్ష్యం చేస్తే 24 నుంచి 48 గంటల్లో పరిస్థితి తీవ్ర విషమంగా మారుతుందని గుర్తించుకోండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.