Thyroid Medication Guide : థైరాయిడ్ సమస్య ఉంటే.. ముఖ్యంగా హైపో థైరాయిడిజం ఉన్నవారికి వైద్యులు కచ్చితంగా మెడిసన్స్ వాడమని సూచిస్తారు. థైరాయిడ్ లెవెల్స్ బట్టి ట్యాబ్లెట్ల మోతాదు సూచిస్తారు. అలాగే వీటిని వేసుకునేప్పుడు కొన్ని నిబంధనలు కచ్చితంగా ఫాలో అవ్వాలని చెప్తారు. కానీ కొందరు వాటిని సరిగ్గా ఫాలో అవ్వరు. దీనివల్ల సమస్య మరింత పెరుగుతుంది. మరి థైరాయిడ్ ట్యాబ్లెట్స్ వేసుకునేప్పుడు తీసుకోవాల్సిన జాగ్రత్తలు ఏంటో.. ఎలాంటి తప్పులు చేయకూడదో.. నిపుణుల సూచనలు ఏంటో ఇప్పుడు చూసేద్దాం.
ట్యాబ్లెట్ ఎప్పుడు తీసుకోవాలంటే..
సాధారణంగా డాక్టర్లు థైరాయిడ్ టాబ్లెట్ (Levothyroxine) ఉదయాన్నే ఖాళీ కడుపుతో తీసుకోవాలని సూచిస్తారు. అలాగే కాస్త నీళ్లతో ట్యాబ్లెట్ వేసుకోవాలి. టాబ్లెట్ వేసుకున్న తర్వాత 30 నుంచి 60 వరకు నిమిషాలు ఏమీ తినకూడదు. ఎందుకంటే థైరాయిడ్ మెడిసన్ శరీరంలో బాగా శోషించాల్సి ఉంది.
తీసుకోవాల్సిన జాగ్రత్తలు
థైరాయిడ్ మెడిసన్ వేసుకునేప్పుడు కొన్ని జాగ్రత్తలు తప్పక తీసుకోవాలి. ప్రతి రోజు ఒకే సమయానికి మెడిసన్ తీసుకోవాలి. వైద్యులు సూచించిన డోస్నే ఫాలో అవ్వాలి. TSH టెస్ట్ రెగ్యులర్గా చేయించుకోవాలి. టాబ్లెట్ వేసుకున్న వెంటనే పాలు, కాఫీ, టీ వంటివి తాగకూడదు. ఇలా తీసుకుంటే మెడిసన్ శరీరానికి అందదని గుర్తించుకోవాలి. ఐరన్, కాల్షియం సప్లిమెంట్స్ తీసుకునేవారు.. థైరాయిడ్ మెడిసన్ తీసుకున్న 4 గంటల తర్వాత సప్లిమెంట్స్ తీసుకోవాలి.
చేయకూడని తప్పులు ఇవే..
బ్రేక్ఫాస్ట్తో పాటు టాబ్లెట్ తీసుకోవడం అస్సలు చేయకూడదు. అలాగే మిస్ అయిన డోస్ని తర్వాత డబుల్గా తీసుకోకూడదు. డాక్టర్ సలహా లేకుండా మెడిసన్ ఆపకూడదు. మీకు సర్జరీ, ఆపరేషన్ వంటివి అయినా కూడా వీటిని కచ్చితంగా తీసుకోవాలని వైద్యులు సూచిస్తున్నారు. సోయా, ఫైబర్ ఫుడ్స్ వెంటనే తీసుకుంటే మెడిసన్ ప్రభావం తగ్గుతుందని చెప్తున్నారు.
థైరాయిడ్ ఉంటే ఆహారంలో కొన్ని మార్పులు చేసుకోవాలి. అయోడిన్ ఉన్న ఆహారం సరిపడా తీసుకోవాలి. గ్రీన్ వెజిటబుల్స్, ప్రోటీన్ ఫుడ్స్ మంచివి. క్యాబేజీ, బ్రోకోలీ వంటివి తక్కువ మోతాదులో తీసుకోవాలి. అలాగే థైరాయిడ్ గురించి భయపడాల్సిన అవసరం లేదు. వైద్యుల సూచనలతో.. సరైన విధంగా తీసుకుంటే సమస్య పూర్తిగా కంట్రోల్ అవుతుంది.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.