Water Intake for Kidney Health : శరీరంలో కిడ్నీలు అత్యంత ముఖ్యమైన అవయవాలలో ఒకటిగా చెప్తారు. ఎందుకంటే ఇవి రక్తంలో ఉన్న వ్యర్థాలను, టాక్సిన్స్ను మూత్ర రూపంలో బయటకు పంపించడమే కాకుండా.. సోడియం, పొటాషియం వంటి ఖనిజాల సమతుల్యతను కూడా కాపాడుతాయి. అయితే కిడ్నీలు సరిగ్గా పనిచేయాలంటే ఎంత నీరు తాగాలి? అనే సందేహం చాలామందికి ఉంటుంది. దీని గురించిన పూర్తి వివరాలు, వైద్యుల సూచనలు తెలుసుకుందాం.
కిడ్నీలకు నీరు ఎందుకు అవసరం?
మీరు నీరు తక్కువగా తాగితే కిడ్నీలు రక్తాన్ని ఫిల్టర్ చేయడానికి ఎక్కువగా కష్టపడాల్సి వస్తుంది. దీనివల్ల శరీరంలో ఎలక్ట్రోలైట్ అసమతుల్యతతో పాటు టాక్సిన్స్ నిల్వ పెరుగుతుంది. డీహైడ్రేషన్ సమస్య పెరిగి.. తలనొప్పి, అలసట, బలహీనత వంటివి జరుగుతాయి. అలాగే చర్మం పొడిబారడం వంటి సమస్యలు ఎదురవుతాయి.
రోజుకు ఎంత నీరు తాగాలి?
నిపుణుల సూచనల ప్రకారం కిడ్నీలతో పాటు పూర్తి ఆరోగ్యంగా ఉండేందుకు.. మహిళలు రోజుకు సుమారు 2.7 లీటర్లు అంటే 11 గ్లాసులు.. మగవారు రోజుకు సుమారు 3.7 లీటర్లు అంటే దగ్గరగా 15 గ్లాసుల నీరు తాగాలని సూచిస్తున్నారు. ఈ మొత్తం నీటితో పాటు పండ్లు, కూరగాయలు, జ్యూస్ల ద్వారా వచ్చే హైడ్రేషన్ కూడా శరీరానికి అందించాలని చెప్తున్నారు.
ఈ కొలత ప్రతి ఒక్కరికీ ఒకేలా ఉండదు. మీ శరీరం నీటి అవసరం, ఇతర అంశాలపై ఆధారపడి ఉంటుంది. వాతావరణంలో మార్పులు, శారీరక శ్రమ, వయస్సు, గర్భధారణ లేదా పాలిచ్చే తల్లులు, ఇతర ఆరోగ్య పరిస్థితులు, కిడ్నీ, గుండె సమస్యలు ఉంటే అనే అంశాలను దృష్టిలో పెట్టుకుని నీటి వినియోగం ఉంటుంది.
నీరు సరిపోతుందో లేదో ఎలా తెలుసుకోవాలి?
మీరు సరిగ్గా వాటర్ తీసుకోకుంటే మీ శరీరం కొన్ని సూచనలు ఇస్తుంది. మూత్రం లైట్ యెల్లో కలర్లో ఉంటే.. మీరు హైడ్రేటెడ్గా ఉంటారని అర్థం. డార్క్ యెల్లో ఉంటే నీరు తక్కువ తాగుతున్నారని సూచన. రోజుకు 4 నుంచి 6 సార్లు మూత్ర విసర్జన చేస్తే నార్మల్. ఇలాంటి సూచనలు మీ శరీరానికి ఎంత నీరు అవసరమో చెప్తాయి.
కిడ్నీ ఆరోగ్యానికి అదనపు టిప్స్
ఉదయం లేవగానే ఒక గ్లాస్ నీరు తాగండి. దాహం వేసే వరకు ఆగకుండా మధ్యలో తాగుతూ ఉండండి. అధిక ఉప్పు, ప్రాసెస్ చేసిన ఫుడ్స్ తగ్గించండి. షుగర్ డ్రింక్స్, సోడాలకు దూరంగా ఉండాలి. పుచ్చకాయ, దోసకాయ, నారింజ వంటి నీరు ఎక్కువగా ఉన్న పండ్లు తినండి. మితమైన వ్యాయామం చేయాలి. ఆల్కహాల్, కాఫీ అధికంగా తీసుకోవద్దు
నిపుణుల సూచనలు
కిడ్నీలు ఆరోగ్యంగా ఉండాలంటే.. రోజంతా ఒక్కసారిగా ఎక్కువ నీరు తాగడం కాకుండా కొద్దికొద్దిగా తాగడం మంచిది. డీహైడ్రేషన్ వల్ల కిడ్నీ స్టోన్స్ వచ్చే ప్రమాదం పెరుగుతుంది. కాబట్టి సమ్మర్లో మరింత జాగ్రత్తగా ఉండాలి. కిడ్నీ సమస్యలు ఉన్నవారు తప్పనిసరిగా డాక్టర్ సలహా మేరకు నీటి పరిమాణం తీసుకోవాలి. హైడ్రేషన్ కేవలం నీరు మాత్రమే కాదు.. హెల్తీ లిక్విడ్స్, ఫుడ్స్ ద్వారా కూడా పొందవచ్చు.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.