కుక్కపిల్ల.. సబ్బు బిళ్ళ.. అగ్గి పుల్ల కవితకి ఏది అనర్హం కాదని అంటారు కవులు. అలాగే ఏ కూరగాయలు, పండ్లు తొక్కలు కూడా ప్రయోజనాలు ఇవ్వకుండా ఉండవు. నిజానికి తొక్కల్లోనే ఎక్కువ పోషకాలు ఉంటాయని చెప్తూ ఉంటారు. మనలో చాలా మంది ఉల్లిపాయ తొక్కలు తీసి చెత్త బుట్టలో వేసేస్తారు. కానీ ఉల్లిపాయ మాదిరిగానే వాటి తొక్కలు కూడా పోషకాలు కలిగి ఉన్నాయి. వినడానికి ఆశ్చర్యంగా ఉన్నా ఇది నిజమే. వాటిని సరిగ్గా ఉపయోగించుకుంటే అనేక ప్రయోజనాలు పొందుతారు. ఉల్లిపాయ తొక్కలతో మీరు ఇలా స్మార్ట్ గా చేసి చూడండి.


వెనిగర్


ఉల్లిపాయ తొక్కల్ని ప్రత్యేకమైన సువాసన కలిగిన ఉల్లిపాయ ఇన్ఫ్యూజ్డ్ వెనిగర్ తయారు చేయడానికి ఉపయోగించవచ్చు. వెనిగర్ ఉన్న బాటిల్ లో ఉల్లిపాయ తొక్కలు వేసేసి గట్టిగా మూత పెట్టేయాలి. కొన్ని వారాల పాటు దాన్ని కదిలించకుండా అలాగే ఉంచండి. ఈ వెనిగర్ ని సలాడ్ డ్రెస్సింగ్, మెరినేడ్ లో ఉపయోగించుకోవచ్చు.


తొక్కలతో టీ


ఉల్లిపాయ తొక్క టీ సంప్రదాయ వైద్యంలో ఆరోగ్య ప్రయోజనాల కోసం ఉపయోగించే వారు. వీటిలో యాంటీ ఆక్సిడెంట్లు, యాంటీ ఇన్ఫ్లమేటరీ సమ్మేళనాలు ఉన్నాయని నమ్మకం. ఉల్లిపాయ తొక్కలని వేడి నీటిలో వేసి బాగా మరిగించుకోవాలి. ఆ తర్వాత వాటిని వడకట్టుకుని తాగేయడమే. రోగనిరోధక శక్తిని పెంచుతుంది. ఇన్ఫెక్షన్స్, ఊబకాయం, అధిక రక్తపోటు సమస్యల నుంచి ఉపశమనం కలిగిస్తుంది. ఈ టీ నరాలకు విశ్రాంతినిస్తుంది. ప్రశాంతమైన నిద్ర అందిస్తుంది.


క్లీనింగ్


ఉల్లిపాయ తొక్కలోని సపోనిన్ కంటెంట్ ఉంటుంది. దీన్ని చూర్ణం చేసి నీటితో కలిపినప్పుడు అది కొద్దిగా సబ్బుగా మారుతుంది. ఈ మిశ్రమంతో పాత్రలు శుభ్రం చేసుకోవచ్చు. సహజంగా శుభ్రపరిచే గుణాలు ఇందులో ఉన్నాయి.


జుట్టుకి కూడ


కొంతమంది ఉల్లిపాయ తొక్కల కషాయాలని హెయిర్ రిన్స్ గా ఉపయోగిస్తారు. ఈ తొక్కలోని పోషకాలు జుట్టు ఆరోగ్యాన్ని మెరుగుపరుస్తాయి. జుట్టుని ప్రకాశవంతం చేయడంలో సహాయపడతాయి. వీటిలో సల్ఫర్ ఉంటుంది. దీన్ని తలకి పట్టిస్తే తెల్ల జుట్టు నుంచి బయట పడొచ్చు. ఉల్లిపాయ తొక్కలు స్టవ్ మీద పెట్టి నల్లగా అయ్యేంత వరకు వేడి చేసి మెత్తగా పొడి చేసుకోవాలి. అందులో కలబంద జెల్ లేదా నూనె కలుపుకుని హెయిర్ డై మాదిరిగా జుట్టుకి అప్లై చేసుకోవచ్చు.


కంపోస్ట్


గులాబీ మొక్కల పెరుగుదలకి చాలా మంది కుండీల్లో ఉల్లిపాయ తొక్కలు వేస్తూ ఉండటం మనం చూస్తూనే ఉంటాం. ఇవి కంపోస్ట్ గా చక్కగా సహాయపడతాయి. ఇందులవన్నీ ఫాస్పరస్, పొటాషియం, ఐరన్, కాల్షియం ఉన్నాయి. ఇవి మొక్కలకు కావాల్సిన పోషణ అందిస్తాయి.


గమనిక: పలు అధ్యయనాలు, పరిశోధనల నుంచి సేకరించిన సమాచారాన్ని ఇక్కడ యథావిధిగా అందించాం. ఇది వైద్య నిపుణుల సూచనలకు ప్రత్యామ్నాయం కాదు. తప్పకుండా వైద్యుడు లేదా ఆహార నిపుణుల సలహా తీసుకున్న తర్వాతే ఈ ఆహారాన్ని మీ డైట్‌లో చేర్చుకోవాలి. ఈ సమాచారం కేవలం మీ అవగాహన కోసమే.


Also Read: నోరు శుభ్రంగా ఉంచుకోవడం లేదా? జాగ్రత్త మతిమరుపు రావడం ఖాయం