Golden and Crispy Kunafa Dessert Recipe : ఇన్స్టాగ్రామ్లో ఈ మధ్య ఓ రెసిపీ తెగ వైరల్ అవుతుంది. అదే కునాఫా. క్రిస్పీగా, చీజీగా ఉండే ఈ కునాఫా ఇప్పుడు తెలుగు రాష్ట్రాల్లో కూడా పలు చోట్లు అందుబాటులో ఉంటుంది. అయితే మీరు దీనిని తినాలంటే షాప్స్కే వెళ్లాల్సిన అవసరం లేదు. కావాల్సిన పదార్థాలు ఉంటే ఇంట్లోనే దీనిని ఈజీగా చేసుకోవచ్చు. ఇంతకీ ఈ రెసిపీని ఎలా చేసుకోవాలి. కునాఫా చేసేప్పుడు ఫాలో అవ్వాల్సిన టిప్స్ ఏంటి వంటి విషయాలు తెలుసుకుందాం.
కావాల్సిన పదార్థాలు
పాల పేనీలు - 200 గ్రాములు
బటర్ - 3 టేబుల్ స్పూన్లు
పాలు - అర కప్పు
మిల్క్ పౌడర్ - 2 టేబుల్ స్పూన్లు
మొక్కజొన్న పిండి - 1 టేబుల్ స్పూన్
పంచదార - 1 టేబుల్ స్పూన్
ఫ్రెష్ క్రీమ్ - 2 టేబుల్ స్పూన్లు
వెనీలా ఎసెన్స్ - అర టీస్పూన్
పంచదార - అరకప్పు
నీళ్లు - అరకప్పు
నిమ్మరసం - 4 చుక్కలు
కుంకుమ పువ్వు - చిటికెడు
వెన్న -1 టేబుల్ స్పూన్
చీజ్ - అరకప్పు
పిస్తా - 2 టేబుల్ స్పూన్లు
తయారీ విధానం
ముందుగా పేనీలు తీసుకోవాలి. దీనిని సన్నని సేమ్యా అని కూడా అంటారు. ఇవి నార్మల్వి ఉంటాయి. రోస్ట్ చేసినవి కూడా ఉంటాయి. రోస్ట్ చేసినవి తీసుకుంటే ఈ రెసిపీ మరింత తక్కువ సమయంలో ఫినిష్ చేయగలుగుతారు. కాబట్టి రోస్ట్ చేసిన పేనీలు తీసుకోండి. ఇప్పుడు వాటిని చిన్నగా అయ్యేలా క్రష్ చేయండి. దానిలో బటర్ వేసి.. మొత్తం కలిసేలా.. చిన్న చిన్న సేమ్యా ముక్కలుగా చేసి పక్కన పెట్టుకోవాలి.
ఇప్పుడు ఓ గిన్నెలో కాచి చల్లార్చిన పాలు తీసుకోవాలి. దానిలో మిల్క్ పౌడర్, మొక్కజొన్న పిండి, పంచదార, ఫ్రెష్ క్రీమ్, వెనీలా ఎసెన్స్ వేసి బాగా మిక్స్ చేసుకోవాలి. ఉండలు లేకుండా మిక్స్ చేసుకున్న ఈ మిశ్రమాన్ని ఇప్పుడు స్టౌవ్ పెట్టి మంటను మీడియంలో ఉంచి ఉడికించాలి. ఈ మిశ్రమాన్ని కలుపుతూనే ఉండాలి. లేదంటే ఉండలుగా పేరుకుపోతుంది. పాల మిశ్రమం దగ్గరగా అయిన తర్వాత స్టౌవ్ ఆపేయాలి. చల్లగా మారేవరకు కూడా దానిని కలుపుతూనే ఉండాలి. లేదంటే ఉండలు కట్టేస్తుంది.
మిశ్రమం చల్లారిన తర్వాత ఓ గిన్నెలో పంచదార, నీళ్లు వేసి గులాబ్ జామున్ సిరప్లా తయారు చేసుకోవాలి. పాకం మరీ తీగలా కాకుండా అలా అని పలుచగా కాకుండా కాస్త చిక్కగా మారేలా సిద్ధం చేసుకోవాలి. ఇప్పుడు స్టౌవ్ ఆపేసి దానిలో నాలుగు చుక్కలు నిమ్మరసం వేయాలి. రుచికోసం కుంకుమ పువ్వు కూడా వేసుకోవచ్చు. ఈ షుగర్ సిరప్ని పక్కనపెట్టి.. ఇప్పుడు ఓ పాన్ తీసుకోవాలి. దానికి వెన్న పూయాలి.
బటర్ రాసిన పాన్లో ముందుగా సిద్ధం చేసుకున్న పేనీలు ఓ అంగుళం వేయాలి. అనంతరం పాలతో చేసిన క్రీమ్ వేయాలి. దానిని ఓ లేయర్గా పేర్చి.. దానిపై చీజ్ వేయాలి. అనంతరం మిగిలిన పేనీలు మరో లేయర్గా వేసి.. దానిపై మూత పెట్టి స్టౌవ్ వెలిగించాలి. కింద రోస్ట్ అయ్యాక.. మరో పాన్కి వెన్న రాసి సిద్ధం చేసుకోవాలి. ఇప్పుడు రోస్ట్ అయిన దానిని మరోవైపు రోస్ట్ చేయడం కోసం వెన్న రాసిన పాన్లోకి మార్చాలి.
రెండోవైపు కూడా రోస్ట్ అయిపోతే టేస్టీ, క్రిస్పీ కునాఫా రెడీ. ఈ డిజెర్ట్ని తినేముందు పిస్తా క్రస్ట్ వేసుకుని.. దానిపై షుగర్ సిరప్ వేసుకోవాలి. అంతే టేస్టీ టేస్టీ కునాఫా రెడీ. క్రిస్పీగా, టేస్టీగా ఉంటుంది కాబట్టి పిల్లల నుంచి పెద్దల వరకు అందరూ దీనిని ఇష్టంగా తింటారు. మరి ఇంకెందుకు ఆలస్యం. ఈ వీకెండ్ మీరు కూడా ఇంట్లో ఈ రెసిపీని ట్రై చేయండి.