Fibre Importantance On Health : రోజువారీ ఆహారంలో కార్బోహైడ్రేట్లు, ప్రోటీన్‌ల గురించి ఎక్కువగా మాట్లాడుతుంటాం. కానీ శరీర ఆరోగ్యానికి అవసరమైన మరో ముఖ్యమైన పోషకం ఫైబర్. పండ్లు, కూరగాయలు, పప్పులు, తృణధాన్యాల్లో లభించే ఫైబర్ జీర్ణవ్యవస్థ ఆరోగ్యంగా పనిచేయడంలో కీలక పాత్ర పోషిస్తుంది. ఫైబర్ తక్కువగా తీసుకుంటే మలబద్ధకం వంటి సమస్యలతో పాటు ఇతర ఆరోగ్య సమస్యలు కూడా వచ్చే అవకాశం ఉంటుంది.
అందుకే శరీరానికి ఫైబర్ అందించాలని చెప్తున్నారు నిపుణులు. కేవలం ప్రోటీన్ మాత్రమే తీసుకుని.. కార్బ్స్ తగ్గిస్తే సరిపోదని.. శరీరానికి తగినంత ఫైబర్ కూడా ఇవ్వాలని చెప్తున్నారు. మరి ఫైబర్ తక్కువగా తీసుకుంటే ఏమవుతుంది? ఫైబర్ తింటే కలిగే లాభాలు ఏంటో.. ఏ ఫుడ్స్లో ఫైబర్ ఎక్కువగా దొరుకుతుందో ఇప్పుడూ చేసేద్దాం.
Also Read : బరువు తగ్గడంలో హెల్ప్ చేసే హెల్తీ ఫుడ్స్.. ప్రోటీన్, ఫైబర్ నుంచి కార్బ్స్ వరకు
ఫైబర్ తీసుకోకపోతే వచ్చే సమస్యలు..
మలబద్ధకం సమస్య
ఫైబర్ మలాన్ని పేగుల్లో సులభంగా కదలడానికి సహాయపడుతుంది. ఆహారంలో ఫైబర్ తక్కువగా ఉంటే మలం గట్టిగా మారి మలబద్ధకం సమస్య వచ్చే అవకాశం ఎక్కువగా ఉంటుంది.
ఎక్కువ ఆకలి
ఫైబర్ ఎక్కువగా ఉండే ఆహారాలు జీర్ణం కావడానికి కొంత సమయం పడుతుంది. దీంతో ఎక్కువసేపు కడుపు నిండిన భావన ఉంటుంది. ఫైబర్ తక్కువగా ఉండే ప్రాసెస్డ్ ఫుడ్స్ తీసుకుంటే త్వరగా ఆకలి వేసి, అవసరానికి మించి తినే అవకాశం ఉంటుంది.
Also Read : కడుపు శుభ్రం కావాలంటే డీటాక్స్ డ్రింక్స్ అవసరం లేదు.. ఈ 3 అలవాట్లు చాలు, మలబద్ధకం కూడా తగ్గిపోతుంది
బరువు నియంత్రణ
ఫైబర్ ఉన్న ఆహారాలు కడుపు నిండిన భావనను పెంచడంలో సహాయపడతాయి. దీంతో ఆహారం పరిమాణాన్ని నియంత్రించుకోవడం సులభం కావచ్చు. అయితే ఫైబర్ మాత్రమే బరువు తగ్గించదు. సమతుల్య ఆహారం, వ్యాయామం కూడా అవసరం.
రక్తంలో చక్కెర స్థాయిలు
డైటరీ ఫైబర్ కొన్ని కార్బోహైడ్రేట్ల జీర్ణక్రియను నెమ్మదింపజేయడంలో సహాయపడుతుంది. దీంతో భోజనం తర్వాత రక్తంలో చక్కెర వేగంగా పెరగకుండా ఉండేందుకు తోడ్పడవచ్చు.
Also Read : ఉదయాన్నే 2 నానబెట్టిన అంజీర్ తింటే.. మలబద్ధకం నుంచి బరువు తగ్గడం వరకు ఎన్నో లాభాలు
పేగుల ఆరోగ్యంపై ప్రభావం
కొన్ని రకాల ఫైబర్ పేగుల్లో ఉండే ప్రయోజనకరమైన బ్యాక్టీరియాకు ఆహారంగా పనిచేస్తుంది. ఫైబర్ తక్కువగా ఉండే ఆహారం పేగుల ఆరోగ్యకరమైన సూక్ష్మజీవుల సమతుల్యతపై ప్రభావం చూపే అవకాశం ఉంది.
ఫైబర్ తీసుకోవడం వల్ల కలిగే ప్రయోజనాలు
ఫైబర్‌ను సరైన మోతాదులో తీసుకోవడం వల్ల జీర్ణక్రియ సక్రమంగా సాగేందుకు, మలబద్ధకం తగ్గేందుకు సహాయపడుతుంది. అలాగే కడుపు నిండిన భావన ఎక్కువసేపు ఉండటం వల్ల బరువు నియంత్రణకు మద్దతు ఇవ్వవచ్చు. కరిగే ఫైబర్ గుండె ఆరోగ్యానికి, కొలెస్ట్రాల్ స్థాయిలను అదుపులో ఉంచడానికి కూడా ఉపయోగపడవచ్చు.
Also Read : రోజూ చియా సీడ్స్ తీసుకుంటే కలిగే ఆరోగ్య ప్రయోజనాలు ఇవే.. మలబద్ధకం నుంచి బరువు తగ్గడం వరకు
ఫైబర్ ఫుడ్స్
మీ డైట్లో ఫైబర్ ఉండాలనుకుంటే.. కొన్ని ఫుడ్స్ కచ్చితంగా తీసుకోవాలి. జామపండు, యాపిల్, బేరిపండ్లు, నారింజ వంటి పండ్లను జ్యూస్ కంటే పండుగానే తినడం మంచిది. తొక్క తినడానికి అనుకూలంగా ఉంటే అలాగే తీసుకోవచ్చు. క్యారెట్, బీన్స్, బెండకాయ, బ్రొకోలీ, ఆకుకూరలు వంటి వాటిని రోజువారీ ఆహారంలో చేర్చుకోవాలి.
కందిపప్పు, పెసరపప్పు, శనగలు, రాజ్మా, బీన్స్ వంటివి ఫైబర్‌తో పాటు ప్రోటీన్‌ను కూడా అందిస్తాయి. ఓట్స్, బ్రౌన్ రైస్, చిరుధాన్యాలు,గోధుమతో చేసిన ఆహారాలను తీసుకోవచ్చు. చియా సీడ్స్, అవిసె గింజలు వంటి వాటిలో కూడా ఫైబర్ ఉంటుంది. వీటిని మోతాదులో తీసుకోవాలి.
Also Read : జీర్ణ సమస్యలను దూరం చేసే 9 హెల్తీ ఫుడ్స్.. కడుపు ఉబ్బరం నుంచి మలబద్ధకం వరకు
ఫైబర్ ఒకేసారి పెంచేస్తే..
ఇప్పటివరకు తక్కువ ఫైబర్ తీసుకుంటున్నవారు ఒక్కరోజులో ఫైబర్ పెంచేయాలి అనుకోకూడదు. అధిక మొత్తంలో ఫైబర్ తీసుకుంటే.. గ్యాస్, కడుపు ఉబ్బరం లేదా అసౌకర్యం వంటి ఇబ్బందులు కలుగుతాయి. కాబట్టి ఆహారంలో క్రమంగా ఫైబర్‌ను పెంచాలి. ఫైబర్ ఎక్కువగా తీసుకునేటప్పుడు తగినంత నీరు తాగడం కూడా చాలా ముఖ్యం.
రోజుకు ఎంత ఫైబర్ అవసరమనేది.. వయసు, లింగం, ఆరోగ్య పరిస్థితిని బట్టి మారుతుంది. కేవలం ఒకే రకం ఫైబర్ ఫుడ్‌పై ఆధారపడకుండా పండ్లు, కూరగాయలు, పప్పులు, తృణధాన్యాలను కలిపి తీసుకోవడం మంచిది. దీర్ఘకాలంగా మలబద్ధకం లేదా ఇతర జీర్ణ సమస్యలు ఉంటే సొంతంగా డైట్ మార్చుకోవడం కంటే వైద్యుడి సలహా తీసుకోవడం మంచిది.
Also Read : సాయంత్రం 5 గంటలకే డిన్నర్ ముగించేయాలా? నిద్ర, గట్ హెల్త్పై దీని ప్రభావం ఎలా ఉంటుంది? నిపుణుల సలహాలివే
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.