Periods: ఆడవాళ్లలో రుతుక్రమానికి సంబంధించి ఇవన్నీ అపోహలే, నిజాలేంటో తెలుసుకోండి

రుతుస్రావం మహిళల ఆరోగ్యానికి సూచికలాంటిది.

పూర్వం నుంచి రుతుస్రావం విషయంలో చాలా అపోహలు ఉన్నాయి. పీరియడ్స్ వచ్చిన వారిని దూరంగా ఉంచడం, వారిని ఆ మూడు రోజులు అంటరానివారిగా చూడడం లాంటివి ఇంకా అనేక ఇళ్లల్లో కొనసాగుతోంది. ఆ సమయంలో బయటికి పోయే రక్తాన్ని చెడు రక్తంగా భావిస్తారు. నిజానికి రుతుస్రావం మహిళల ఆరోగ్యాన్ని సూచిస్తుంది. వారి పునరుత్పత్తి వ్యవస్థలో ముఖ్య పాత్ర పోషిస్తుంది. రుతుక్రమం గతి తప్పితే ఆ స్త్రీ ఏవో అనారోగ్య సమస్యలతో ఉన్నట్టు అర్థం. బయటికి ఆరోగ్యంగా కనిపిస్తున్నా అంతర్గతంగా ఏదో సమస్య ఉందని సూచన. పీరియడ్స్ తో ముడిపడి ఎన్నో అపోహలు ప్రజల్లో ఉన్నాయి. అవేంటంటే...

అపోహ: పీరియడ్స్ వచ్చిన సమయంలో నిల్వ పచ్చళ్లు, పెరుగు, పుల్లని, కారంగా ఉండే పదార్థాలు తినకూడదు.
నిజం: పీరియడ్స్ లో ఉన్నప్పుడు ఎలాంటి ఆహారం అయినా తినవచ్చు. కాకపోతే వేడి చేసే పదార్థాలకు దూరంగా ఉంటే పొట్టనొప్పి రాకుండా ఉంటుంది. ప్రాసెస్ చేసిన ఆహారాలు, జంక్ ఫుడ్ కు దూరంగా ఉంటే ఇతర అనారోగ్యసమస్యలు రాకుండా ఉంటాయి. 

అపోహ: పీరియడ్స్ సమయంలో నొప్పి రావడం సహజం.
నిజం: రుతుస్రావం సమయంలో కలిగే నొప్పికి వైద్య పరిభాషలో ‘డిస్మెనోరియా’ అంటారు. పీరియడ్స్ లో నొప్పి రావడం సహజమైన విషయం కాదు. తరచుగా నొప్పి వస్తుంటే దాన్ని తేలికగా తీసుకోవద్దు. దీనికి ఎండో మెట్రియోసిస్, అడెనోమైయోసిస్, యుటెరైన్ ఫైబ్రాయిడ్స్ వంటి అంతర్లీన్ ఆరోగ్య సమస్యలు దాగి ఉండే అవకాశం ఉంది. 

అపోహ: ఈ సమయంలో ఎలాంటి శారీరకంగా కష్టపడే పనులు చేయకూడదు, విశ్రాంతి తీసుకోవాలి.
నిజం: ఇది కచ్చితంగా అపోహే. రుతుక్రమంలో ఉన్న స్త్రీలు ఏపనీ చేయకూడదు అని లేదు. పూర్తిగా విశ్రాంతి తీసుకుంటే నొప్పులు, అసౌకర్యం ఇంకా ఎక్కువైపోతుంది. వ్యాయామం చేస్తే నొప్పులు, పీరియడ్స్ సంబంధిత సమస్యలు తగ్గుతాయి.

అపోహ: పీరియడ్స్ సమయంలో సెక్స్ చేయకూడదు.
నిజం: ఇది పూర్తిగా మీ ఇష్టం. ఈ సమయంలో లైంగిక చర్యల వల్ల ఎలాంటి సమస్యలు రావు. మీకు ఆసక్తి ఉండి అసౌకర్యం లేకుండా ఉంటే పాల్గొనవచ్చు. అయితే పీరియడ్స్ సమయంలో సెక్స్ చేయడం వల్ల కూడా గర్భం ధరించే అవకాశం ఉంది. కాబట్టి సురక్షిత పద్ధతులు పాటించడం ఉత్తమం. 

అపోహ: పీరియడ్స్ సమయంలో వచ్చేదంతా చెడు రక్తం .
నిజం: ఇది పూర్తిగా అబద్ధం. మన శరీరంలో రక్తమే ఉంటుంది. చెడు రక్తం, మంచి రక్తం  అని రెండు రకాలు ఉండవు. రక్త సంబంధ వ్యాధులు ఉన్న వారిలోనే రక్తం కలుషితం అవుతుంది. పీరియడ్స్ రక్తం అనేది శరీరంలో ప్రవహించే రక్తమే. ఇది మురికిది ఏమాత్రం కాదు.