Fact Check సీఎం జగన్ ఆ ఇంగ్లీష్ ప్రశ్న అర్థం కాక సమాధానం దాటేశారా? - అసలు నిజం ఏంటంటే?

False Video On Cm Jagan: సీఎం జగన్ ఓ ఇంటర్వ్యూలో ఇంగ్లిష్ ప్రశ్న అర్థం కాక దాటవేశారంటూ ఓ వీడియో వైరల్ అవుతుండగా 'ఫ్యాక్ట్ లీ చెక్' దీనిపై క్లారిటీ ఇచ్చింది. ఇది ఎడిటెట్ వీడియో అని స్పష్టం చేసింది.

Factly Check Clarity On False Video Sharing On Cm Jagan: ఓ ఇంటర్వ్యూలో ప్రముఖ జర్నలిస్ట్ రాజ్ దీప్ సర్దేశాయ్ ఇంగ్లీష్ లో అడిగిన ప్రశ్న అర్థం కాక ఏపీ సీఎం వైఎస్ జగన్ సమాధానం చెప్పకుండా దాటేశారంటూ ఓ వీడియో తాజాగా సోషల్ మీడియాలో వైరల్ అవుతోంది. 'ఇట్స్ ఏ వెరీ లెంగ్తీ క్వశ్చన్ (It's a very lenghty question)' అని సీఎం ఆ ప్రశ్నను దాటేశారనే ఆ వీడియోలో ఉంది. అయితే, ఇది పూర్తిగా ఎడిటెట్ వీడియో అని సీఎం జగన్ ఎక్కడా అలా అనలేదని 'ఫ్యాక్ట్ లీ చెక్' స్పష్టం చేసింది. ఇటీవల ఏప్రిల్ 30, 2024న ప్రసారం అయిన 'ఇండియాటుడే' ఇంటర్వ్యూలోని వీడియో క్లిప్పింగ్ కు, మే 2022లో దావోస్ లో జరిగిన వరల్డ్ ఎకనామిక్ ఫోరం సదస్సులో జగన్ మాట్లాడిన ఆడియోను చేర్చి ఎడిట్ చేస్తూ.. ఈ వీడియోను రూపొందించినట్లు నిర్ధారించింది.

ఇదీ అసలు ఫ్యాక్ట్

సీఎం జగన్ ఇంటర్వ్యూకు సంబంధించి పూర్తి వీడియోను 'ఇండియాటుడే' 2024, ఏప్రిల్ 30న తమ అధికారిక యూట్యూబ్ ఛానల్ లో అప్ లోడ్ చేసింది. 'Election Unlocked: Andhra Pradesh CM Jagan Mohan Reddy Exclusive/ India Today' అనే శీర్షికతో లైవ్ టెలికాస్ట్ చేసినట్లు తేలింది. ఈ వీడియోను పూర్తిగా పరిశీలిస్తే.. వైరల్ వీడియోలోని క్లిప్పింగ్ దృశ్యాలు టైంస్టాంప్ 10:47 వద్ద మొదలై, 11:03 వద్ద ముగుస్తుందని తెలిసింది. వాస్తవంగా, ఈ ఇంటర్వ్యూలో చాలా మంది ఎంపీలు, ఎమ్మెల్యేలను మార్చడంపై రాజ్ దీప్ సర్దేశాయ్ అడిగిన ప్రశ్నకు జగన్ సమాధానం ఇచ్చారు. 'తమ వ్యూహంలో భాగంగా.. తన మీద తనకున్న నమ్మకంతో మార్చాను' అని ఆయన చెప్పారు. ఈ మొత్తం ఇంటర్వ్యూలో ఎక్కడా వైరల్ వీడియోలో చూపించినట్లుగా 'ఇట్స్ ఏ వెరీ లెంగ్తీ క్వశ్చన్' అంటూ ఆ ప్రశ్నలను దాటవేయలేదు.

ఆ రెండు ఎడిట్ చేశారు

2022, మే 23న 'సాక్షి టీవీ (Sakshi Tv)' తమ అధికారిక యూట్యూబ్ ఛానెల్ లో 'Cm Ys Jagan Superb Answers At World Economic Forum In Dawos / Sakshi Tv' అనే శీర్షికతో ఓ వీడియో లైవ్ టెలికాస్ట్ చేసింది. ఇది మే, 2022లో దావోస్ లో జరిగిన వరల్డ్ ఎకనమిక్ ఫోరం సదస్సులో సీఎం జగన్ మాట్లాడిన వీడియో. ఈ క్లిప్పింగ్ లోని టైం 02:33 వద్ద మొదలై, 02:35 వద్ద ముగుస్తుంది అని తెలిపింది. ఈ సదస్సులో అడిగిన ఓ సుదీర్ఘ ప్రశ్నకు సమాధానం చెప్తూ సీఎం జగన్.. 'ఇట్స్ ఏ వెరీ లెంగ్తీ క్వశ్చన్ (It's A Very Lengthy Question)' అని అన్నారు. దీని ప్రకారం ఈ ఆడియోను.. 'ఇండియాటుడే' ఇంటర్వ్యూలోని వీడియోను ఎడిట్ చేస్తూ ఈ వైరల్ వీడియోను రూపొందించారని 'ఫ్యాక్ట్ లీ' చెక్ నిర్ధారించింది. సీఎం జగన్ ఎక్కడా అలా ప్రశ్నలు దాటవేయలేదని స్పష్టం చేసింది.

This story was originally published by factly.in as part of the Shakti Collective. This story has been edited by ABPDesam staff.