అన్‌స్టాపబుల్ మోస్ట్ అవైటెడ్ ఎపిసోడ్ పవన్ కళ్యాణ్ ఎపిసోడ్ ప్రోమో వచ్చేసింది. ఈ ఎపిసోడ్ ప్రోమోను ఆహా శుక్రవారం సాయంత్రం ఏడు గంటలకు అధికారికంగా రిలీజ్ చేసింది. ఈ ఎపిసోడ్‌కు పవన్ కళ్యాణ్‌తో పాటు సాయి ధరమ్ తేజ్ కూడా వచ్చాడు.
‘ఈశ్వరా... పవనేశ్వరా... పవరేశ్వరా...’ అంటూ పవన్ గురించి బండ్ల గణేష్ ఇచ్చిన వైరల్ స్పీచ్‌ను బాలకృష్ణ ఇమిటేట్ చేయగా... అన్‌స్టాపబుల్‌లో బాలయ్య రెగ్యులర్‌గా చెప్పే ‘నేను మీకు తెలుసు. నా స్థానం మీ మనసు.’ అనే మాటను పవన్ కళ్యాణ్ అన్నారు.
‘గుడుంబా శంకర్ సినిమాలో ప్యాంట్ మీద ప్యాంట్ వేశావు. అలా ప్యాంటేసి పాతిక సంవత్సరాలు వయసు తగ్గావు తెలుసా?’ అని పవన్‌ను బాలయ్య ఆటపట్టించారు. ఆ తర్వాత ఇద్దరూ మొదటి సారి కలిసినప్పటి ఫొటోను చూపించి ‘అప్పుడు నేను యంగ్‌గా ఉన్నాను కదా’ అని బాలయ్య అనగా ‘ఇప్పుడు కూడా అలాగే ఉన్నారు’ అని పవన్ కాంప్లిమెంట్ ఇచ్చారు.
‘నువ్వు, త్రివిక్రమ్ మంచి ఫ్రెండ్స్ కదమ్మా’ అని అడిగినప్పుడు ‘ఫ్రెండ్స్ అవ్వాల్సి వచ్చిందండీ’ అని పవన్ సమాధానం ఇచ్చారు. అలాగే ‘రామ్ చరణ్ ఎలా నీకు క్లోజ్ అయ్యాడమ్మా’ అని అడిగినప్పుడు ‘క్లోజ్ అవ్వాల్సి వచ్చిందండీ.’ అని ఫన్నీ ఆన్సర్ ఇచ్చారు.
‘నాకు వీళ్ల డ్యూటీ ఉండేది చినప్పుడు’ అని పవన్ అంటుండగా, బాలయ్య మధ్యలో ‘నాగబాబు ఉన్నాడుగా మధ్యలో’ అని అడిగారు. ‘ఆయన నిర్మాతగా ఉండేవాడు కాబట్టి నేనొక్కడ్నే ఇంట్లో దొరికిపోయే వాడిని.’ అని పవన్ సమాధానం ఇచ్చారు. ఆ తర్వాత రామ్ చరణ్‌కు కూడా ఫోన్ చేసి ‘ఏమయ్యా ఫిటింగ్ మాస్టరూ... మొన్న ప్రభాస్ గురించి ఫోన్ చేసినప్పుడు నీ గుడ్ న్యూస్ మింగేసి అతని న్యూస్ చెప్పావు.’ అని ఆట పట్టించారు.
‘నీకు మీ అమ్మంటే భయమా? లేకపోతే మీ ఆవిడంటే భయమా?’ అని కూడా అడిగారు. ఆ తర్వాత షోలోకి సాయి ధరమ్ తేజ్ ఎంట్రీ ఇచ్చారు. పంచె కట్టుకుని వచ్చిన తేజ్‌ను చూసిన బాలకృష్ణ ‘ఏమ్మా... పెళ్లి చూపులకు వచ్చావా? ఇక్కడే ఉన్నారు చూడు’ అని ఆట పట్టించారు. ‘అమ్మాయిలని ఎలా గౌరవించాలో కూడా ఆయనే నేర్పారండీ.’ అని పవన్ కళ్యాణ్ గురించి తేజ్ చెప్పారు.
‘తొడ కొట్టి వెళ్లిపో’ అని సాయి ధరమ్ తేజ్‌కు బాలయ్య చెప్పారు. అప్పుడు తేజ్ బాలకృష్ణ దగ్గరకు వెళ్లగా ఆయన ‘నా తొడ కాదమ్మా నీ తొడ కొట్టాలి.’ అన్నారు. సాయి ధరమ్ తేజ్ వెళ్లిపోయాక బాలకృష్ణ వివాదాస్పదమైన పవన్ కళ్యాణ్ పెళ్లిళ్ల గురించి అడిగారు. ‘ఈ పెళ్లిళ్ల గొడవ ఏంటయ్యా’ అని అడిగినప్పుడు దానికి పవన్ చెప్పిన సమాధానాన్ని పూర్తిగా చెప్పలేదు. అలాగే తనకు ఆత్మహత్యకు సంబంధించిన ఆలోచనలు వచ్చిన విషయాన్ని కూడా పవన్ ప్రస్తావించారు.
ప్రభాస్ ఎపిసోడ్ తరహాలో రెండు భాగాలుగా ఈ ఎపిసోడ్ కూడా స్ట్రీమ్ కానుంది. మొదటి భాగాన్ని ఫిబ్రవరి మూడో తేదీన ఆహా యాప్‌లో విడుదల చేయనున్నారు.