టీవీ నటి, ‘దియా ఔర్ బతి హమ్’ ఫేమ్ కనిష్కా సోనీ పెళ్లి చేసుకుని అందరికీ షాక్ ఇచ్చింది. అదేంటి పెళ్లి చేసుకుంటే మంచి విషయమే కదా అని అనుకుంటున్నారా? అయితే తను ఎవరిని పెళ్లి చేసుకుందో తెలిస్తే మీరు షాక్ అవుతారు. ఎందుకంటే సోనీ తనని తానే పెళ్లి చేసుకుంది. ఇటీవల సోనీ తన ఇన్ స్టాగ్రామ్ లో మెడలో మంగళ సూత్రం, నుదుటిన కుంకుమపెట్టుకుని ఉన్న ఫోటో ఒకటి పోస్ట్ చేస్తూ తన పెళ్లి విషయం బయట పెట్టేసింది.
‘‘నన్ను నేను పెళ్లి చేసుకుని నా కలలన్నీ నెరవేర్చుకున్నాను. నా ప్రేమలో ఉన్న ఏకైక వ్యక్తిని నేనే. అన్ని ప్రశ్నలకు నేనే సమాధానం. నాకు ఏ పురుషుడితో అవసరం లేదు. నా గిటార్ తో ఒంటరిగా నేను ఎప్పుడు సంతోషంగా ఉంటాను. నేనే దేవతని. స్ట్రాంగ్ అండ్ పవర్ ఫుల్, శివుడు, శక్తి అంతా నాలోనే ఉంది. ధన్యవాదాలు'’ అంటూ మంగళసూత్రంతో ఉన్న ఫోటో పెట్టి అందరికీ షాక్ ఇచ్చింది. దీనిపై నెటిజన్లు విపరీతమైన ట్రోల్స్ చేశారు దాంతో సోనీ వాళ్ళందరికీ ఘాటుగా బదులిచ్చింది.
కనిష్క సోనీ దీని గురించి మాట్లాడుతూ ఇన్ స్టా స్టోరీలో 6 నిమిషాల నిడివిగల ఒక వీడియోని పోస్ట్ చేసింది. ఈ పెళ్లి గురించి తను అందులో మాట్లాడింది. ‘‘నాకు తెలుసు మీరందరూ నన్ను నేను పెళ్లిచేసుకోవడం గురించి ఎన్ని ప్రశ్నలు సంధిస్తారని. నాకు భారతీయ సాంప్రదాయంపై యెనో గౌరవం ఉంది. పెళ్లి అనేది కేవలం శృంగారానికి సంబంధించినదే కాదు.. ప్రేమ, నిజాయితీ ఒకరి నుంచి మరొకరు కోరుకునేది. నేను ఆ విశ్వాసాన్ని కోల్పోయానని నమ్ముతున్నాను. అందుకే నన్ను నేను పెళ్లి చేసుకున్నాను. గూగుల్ లో నా పోస్ట్ నా న్యూస్ ట్రెండింగ్ చేసినందుకు మీ అందరికీ ధన్యవాదాలు’' అని తెలిపింది.
‘‘ఈ పోస్ట్ పెట్టినప్పుడు కొందరు నేను తాగి ఉన్నానని డ్రగ్స్ తీసుకున్న మైకంలో ఉన్నానని అనుకున్నారు. కానీ నేను చాలా కాలం పాటు సినిమా ఇండస్ట్రీలో ఉన్నా కానీ అటువంటి పనులు ఎప్పుడు చెయ్యలేదు. నేను హృదయపూర్వకంగా చెప్తున్నాను నేను భారతీయురాలిని. మరి కొన్ని సంవత్సరాల పాటు నేను సినిమా ఇండస్ట్రీలో ఉన్నా కూడా అటువంటి అలవాట్లు జోలికి వెళ్ళను అని కచ్చితంగా చెప్తాను. ఇది నేను హృదయపూర్వకంగా తెలివిలో ఉండే తీసుకున్న నిర్ణయం. ప్రస్తుతం నేను యూఎస్ఏ లో ఉన్నందుకు సంతోషిస్తున్నా. హాలీవుడ్ లో నా కెరీర్ పై దృషి పెడుతున్నా’’ అని వీడియాలో చెప్పుకొచ్చారు.
సోనీ 'పవిత్ర రిష్ట', 'దియా ఔర్ బతి హమ్' సీరియల్ తో మంచి పాపులారిటీ సంపాదించుకుంది. సోలోగమి పెళ్లి చేసుకుని అందరికీ షాక్ ఇచ్చింది ఈ ముద్దుగుమ్మ. గతంలో గుజరాత్ కి చెందిన క్షమా బిందు అనే 24 ఏళ్ల యువతి కూడా ఇదే విధంగా సోలోగమి వివాహం చేసుకుంది. అప్పట్లో ఇది సంచలనంగా మారింది. పలువురు దీన్ని వ్యతిరేకించారు. అయినా కూడా చెప్పిన తేదీ కంటే ముందే ఆమె వివాహం చేసుకుని అందరినీ ఆశ్చర్యపరిచింది.
Also Read : తీస్ మార్ ఖాన్ రివ్యూ : రేసుగుర్రంలా దూసుకు వెళ్ళాలనుకున్న ఆది సాయి కుమార్, సినిమా ఎలా ఉందంటే?