అందాల తార సమంత ప్రస్తుతం అమెరికాలో ఉంది. మైయోసిటిస్ కు చికిత్స కోసం ఆమె గత కొంత కాలంగా అక్కడే ఉంటుంది. ఓవైపు ట్రీట్మెంట్ తీసుకుంటూనే అక్కడ నిర్వహించే పలు కార్యక్రమాల్లో పాల్గొంటున్నది. ఆగష్టు 15 సందర్భంగా ఇండియా డే పరేడ్ లో పాల్గొని సందడి చేసింది. రీసెంట్ గా డల్లాస్ లో ఏర్పాటు చేసిన ఫ్యాన్స్ మీట్ కు హాజరైంది. ఈ సందర్భంగా అభిమానులతో కలిసి కాసేపు సందడి చేసింది. అభిమానులను కలిసి వారితో ఫోటోలు దిగింది. అయితే, తాజాగా ఆమె పాల్గొన్న ఓ ఈవెంట్ లో చేదు అనుభవం ఎదురైనట్లు తెలుస్తోంది. నిర్వాహకులు ఆమెకు చిరాకు కలిగించడంతో అనుకున్న సమయానికి కంటే ముందుగానే ఆమె అక్కడి నుంచి వెళ్లిపోయిందట.
అమెరికాలో సమంతకు చేదు అనుభవం
ఈ ఈవెంట్ లో పాల్గొనేందుకు సమంత ముందుగానే ఫేమెంట్ తో పాటు టైమ్ ఫిక్స్ చేసుకుందట. రెండు గంటల పాటు ఈవెంట్ లో ఉంటానని చెప్పిందట. ఇందుకు గాను $25,000 పేమెంట్ ఇవ్వాలని కోరిందట. నిర్వాహకులు అందుకు సరే అన్నారు. అనుకున్నట్లుగానే ఈ ఈవెంట్ కు హాజరైన సమంత గంటన్నర తర్వాత అక్కడి నుంచి వెళ్లిపోవడం అందరికీ ఆశ్చర్యం కలిగించింది. అంతేకాదు, ఆమె కారులో బయల్దేరుతుండగా నిర్వాహకులు మరో ట్విస్ట్ ఇచ్చారు. సమంత కారు వెనుకాలే వెళ్తున్న లగేజీ కారును ఆపారు. సుమారు గంట పాటు బయటకు వెళ్లనీయలేదట. దీంతో ఆమె తీవ్ర ఆగ్రహం వ్యక్తం చేసినట్లు తెలుస్తోంది.
సమంత పట్ల తీవ్ర పదజాలాన్ని ఉపయోగించిన ఈవెంట్ నిర్వాహకుడు
అటు సమంత కోపంతో వెళ్లిపోతున్న సమయంలో ఈవెంట్ నిర్వాహకుడు ఆమె కారు నడుపుతున్న వ్యక్తికి కాల్ చేశాడట. ఆయన తీవ్ర పదజాలంతో సమంతపై కోప్పడ్డట్లు తెలుస్తోంది. యాక్టివ్ బ్లూటూత్ కనెక్షన్ కారణంగా, అతడు మాట్లాడిన మాటలు కారు స్పీకర్ సిస్టమ్ ద్వారా బయటకు వినిపించాయట. ఆయన మాట్లాడిన మాటలు సమంతకు ఇబ్బంది కలిగించాయట. ఆర్గనైజర్ అమర్యాదగా, అగౌరవంగా మాట్లాడ్డంతో తీవ్రంగా బాధపడిందట. ఈ సంఘటన తనను చాలా బాధించబడినప్పటికీ, ఫిర్యాదు చేయకూడదని నిర్ణయించుకుందట. అయితే, నిర్వాహకులపై ఆమెకు ఎందుకు కోపం వచ్చింది? ఆమె ముందుగానే ఈవెంట్ నుంచి ఎందుకు వెళ్లిపోవాల్సి వచ్చింది? అనే విషయం మాత్రం బయటకు రాలేదు.
ఇక సమంత తాజాగా ‘ఖుషి‘ సినిమాలో కనిపించింది. రౌడీ స్టార్ విజయ్ దేవరకొండ తో కలిసి ఈ సినిమాలో నటించింది. సెన్సిబుల్ డైరెక్టర్ శివ నిర్వాణ ఈ రొమాంటిక్ లవ్ ఎంటర్టైనర్ కి దర్శకత్వం వహించారు. మైత్రీ మూవీ మేకర్స్ బ్యానర్ లో రూపొందిన ఈ ప్రేమకథా చిత్రం సెప్టెంబర్‌ 1న ప్రేక్షకుల ముందుకు వచ్చింది. తొలి షో నుంచే హిట్ టాక్ తో సక్సెస్ ఫుల్ గా రన్ అవుతోంది. సినిమా హిట్ పట్ల చిత్రబృందం సంతోషం వ్యక్తం చేసింది.
Read Also: జపాన్‌ వెకేషన్‌లో రవితేజ, ఫ్యామిలీతో కలిసి ఎంజాయ్!
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial