'రుద్ర: ది ఎడ్జ్ ఆఫ్ డార్క్‌నెస్‌'తో బాలీవుడ్ హీరో అజయ్ దేవగణ్ డిజిటల్ తెరకు పరిచయం అవుతున్న సంగతి తెలిసిందే. ఆయన నటించిన తొలి వెబ్ సిరీస్ ఇది. ఓటీటీలో ఆయన డెబ్యూ ప్రాజెక్ట్ ఇది. ఈ రోజు 'రుద్ర' ట్రైలర్ (Rudra Trailer) విడుదల చేశారు. త్వరలో డిస్నీ ప్లస్ హాట్ స్టార్ ఓటీటీ వేదికలో సిరీస్ విడుదల కానుంది. ట్రైలర్ చూస్తే... మాంచి ఇన్వెస్టిగేషన్ థ్రిల్లర్ అనే అభిప్రాయం కలిగించింది.
బ్రిటిష్ షో 'లూథర్' ఆధారంగా 'రుద్ర: ది ఎడ్జ్ ఆఫ్ డార్క్‌నెస్‌'ను రూపొందించారు. ఇందులో డీసీపీ రుద్రవీర్ సింగ్ పాత్రలో అజయ్ దేవగణ్ నటించారు. 'సింగం' ఫ్రాంఛైజీలో ఆయన పోలీస్ రోల్ చేశారు. అయితే... ఆ పాత్రకు, 'రుద్ర'లో పాత్రకు చాలా వ్యత్యాసం ఉన్నట్టు ట్రైలర్ చూస్తే తెలుస్తోంది. సైకలాజికల్ క్రైమ్ డ్రామాగా తెరకెక్కిన ఈ సిరీస్‌లో హంతుకులను పట్టుకునే దమ్మున్న పోలీస్ అధికారిగా అజయ్ దేవగణ్ కనిపించారు. అయితే... ఆ పోలీస్ వ్యక్తిగత జీవితంలో మాత్రం సమస్యలు ఉన్నట్టు చూపించారు. అజయ్ భార్య పాత్రలో ఇషా డియోల్, ఆయనకు లైన్ వేసే అమ్మాయిగా టాలీవుడ్ స్టార్ హీరోయిన్ రాశీ ఖన్నా కనిపించారు.
అజయ్ దేవగణ్, రాశీ ఖన్నా (Raashi Khanna) మధ్య కెమిస్ట్రీ బావుంది. 'పడిపోయేవాళ్లను మాత్రమే మీరు పట్టుకుంటారన్నమాట. మరి, స్లిప్ అవ్వని వాళ్ల సంగతి ఏంటి?' అని రాశీ ఖన్నా అడిగితే... 'వాళ్ల కోసం నేను చీకట్లో ఎదురు చూస్తాను' అని అజయ్ దేవగణ్ బదులు ఇస్తారు. 'రుద్ర' ట్రైల‌ర్‌లో రాశీ ఖన్నా క‌నిపించింది కాసేపే అయినా... ఈ డైలాగ్, అజయ్ దేవ‌గ‌ణ్‌తో లిప్ లాక్‌కు సిద్ధ‌ప‌డిన విజువల్స్ రిజిస్టర్ అయ్యేలా ఉన్నాయి. లిప్ లాక్ సిరీస్‌లో చూపిస్తారేమో!? సిరీస్ విడుదలైతే ఆమె పాత్ర ఎలా ఉంటుందో తెలుస్తుంది.