టాలీవుడ్‌లో దాదాపు కనుమరుగైపోయిన రెజీనా కసండ్ర.. నేనున్నానని చెబుతూ.. ‘నేనే నా?!’ అనే థ్రిల్లర్ చిత్రంతో వచ్చేస్తోంది. ఈ సందర్భంగా మంగళవారం టాలీవుడ్, కోలివుడ్ ప్రముఖుల ద్వారా ఒకేసారి తెలుగు, తమిళ ట్రైలర్లను విడుదల చేయించారు. ఈ ట్రైలర్ చూస్తే రెజినా మళ్లీ ఫామ్‌లోకి వచ్చే అవకాశాలు కనిపిస్తున్నాయి. ప్రస్తుతం రెజినాకు హీరోయిన్ అవకాశాలు తగ్గిపోయాయి. దీంతో ఆమె ఈ చిత్రంపై భారీ అంచనాలే పెంచుకుంది. ఈ చిత్రంతో మరోసారి తన లక్ పరీక్షించుకోవాలని రెజీనా ప్రయత్నిస్తోంది. ఇప్పటికే నయనతార విభిన్న చిత్రాలతో ఆకట్టుకుంటోంది. దీంతో రెజీనా కూడా ఆమె బాటలోనే ప్రయాణించేందుకు సిద్ధమైనట్లు తెలుస్తోంది. ఇప్పటికే ‘ఎవరు’ సినిమా ద్వారా రెజినా మంచి హిట్ సాధించినా.. అవకాశాలు మాత్రం రాలేదు. చాలా రోజుల గ్యాప్ తర్వాత తెలుగు, తమిళ భాషల్లో తెరకెక్కుతున్న ‘నేనే నా?!’ సినిమా ద్వారా ప్రేక్షకులను పలకరించేందుకు వచ్చేస్తోంది.
మిస్టరీ థ్రిల్లర్‌‌గా తెరకెక్కుతున్న ‘నేనే నా?!’ చిత్రానికి కార్తీక్ రాజు దర్శకత్వం వహిస్తున్నారు. సందీప్ కిషన్‌ నటించిన ‘నిను వీడని నీడను నేనే’ సినిమాతో ఇప్పటికే కార్తిక్ మంచి దర్శకుడుగా నిరూపించుకున్నాడు. ఈ నేపథ్యంలో రెజినా నటిస్తున్న ‘నేనే నా?!’ చిత్రంపై కూడా ప్రేక్షకులు భారీ అంచనాలే ఉన్నాయి. తమిళంలో ఈ చిత్రాన్ని ‘సూర్పనగై’ టైటిల్‌తో రిలీజ్ చేస్తున్నారు. యాపిల్ ట్రీ బ్యానర్‌పై రూపొందుతున్న ఈ చిత్రాన్ని రాజశేఖర్ వర్మ నిర్మిస్తున్నారు. పీకే వర్మ సినిమాటోగ్రఫీ అందిస్తున్నారు. సామ్ సి.ఎస్. సంగీతం సమకూరుస్తున్నారు.
ఇక ట్రైలర్ విషయానికి వస్తే.. ఒక విదేశీయుడి హత్యతో మొదలవుతుంది. అతడిని ఎవరు హత్య చేశారనే మిస్టరీని చేధించే నిమిత్తం పోలీసులు.. ఆర్కియాల‌జిస్ట్‌గా పనిచేస్తున్న రెజీనా సాయం కోరతారు. అయితే, ఆ హత్యల వెనుక వందేళ్ల కిందట జరిగిన ఓ ఘటనే కారణమని తెలుస్తుంది. అప్పట్లో ఏం జరిగింది? ఆ హత్యలకు గల కారణాలు ఏమిటీ? సూర్పుణక ఎవరు అనేది తెరపైనే చూడాలి. ఓవరాల్‌గా చూస్తే.. ఈ చిత్రం ప్రేక్షకులను థ్రిల్‌కు గురిచేసేలాగే ఉంది. అయితే, కాస్త ‘భాగమతి’, ‘అరుంధతి’ తరహాలోనే ఈ చిత్రం ఉంటుందా అనిపిస్తోంది.
ట్రైలర్:
కొద్ది రోజుల కిందట హీరో వరుణ్ తేజ్ ఈ సినిమా ఫస్ట్‌లుక్ విడుదల చేశారు. అందులో రెజినా.. ముక్కు పుడకతో మహారాణిలా ఇనుప చువ్వల మధ్య బందీగా ఉన్నట్లు కనిపించింది. ఈ చిత్రంలో రెజీనా ఆర్కియాల‌జిస్ట్‌గా క‌న‌ప‌డ‌తారు. అంటే రెజినా ఇందులో రెండు పాత్రల్లో కనిపించున్నట్లు అర్థమవుతోంది. మరో పోస్టర్‌లో రెజీనా ఓ అస్థిపంజరాన్ని పరిశీలిస్తున్నట్లుగా ఉంది. చూస్తుంటే.. ఆ అస్థిపంజరం వెనుక మిస్టరీ ఏదో దాగుని ఉంటుందనిపిస్తోంది. మొత్తానికి ఈ పోస్టర్లు.. ట్రైలర్లు సినిమాపై అంచనాలను పెంచేస్తున్నాయి. ఈ సినిమాలో యాక్షన్ సన్నివేశాలు కూడా ఉన్నాయని, ఇందుకు రెజినా ప్రత్యేకంగా శిక్షణ పొందిందని నిర్మాతలు చెప్పారు.
Also Read: ‘శ్రీకాంత్ జాగ్రత్త.. నా కళ్ల ముందు హీరో అయ్యావు’.. నరేష్ మండిపాటు