పవర్ స్టార్ పవన్ కళ్యాణ్, సుప్రీమ్ హీరో సాయి ధరమ్ తేజ్ హీరోలుగా నటిస్తున్న తాజా చిత్రం 'బ్రో'. పి. సముద్రఖని దర్శకత్వం వహిస్తున్న ఈ సినిమాకి స్టార్ డైరెక్టర్ త్రివిక్రమ్ శ్రీనివాస్ స్క్రీన్ ప్లే, డైలాగ్స్ అందిస్తున్నారు. మెగా మేనమామ-మేనల్లుడు మొదటిసారి కలిసి నటిస్తున్న ఈ మూవీపై అభిమానుల్లో భారీ అంచనాలు నెలకొన్నాయి. దీనికి తగ్గట్టుగానే ఇప్పటికే విడుదలైన పవన్ కళ్యాణ్ ఫస్ట్ లుక్, మోషన్ పోస్టర్ కు మంచి రెస్పాన్స్ వచ్చింది. ఈ క్రమంలో లేటెస్టుగా వచ్చిన సాయి తేజ్ ఫస్ట్ లుక్ ఆకట్టుకుంది. తాజాగా ఈ సినిమాకు సంబంధించి క్రేజీ అప్ డేట్ వచ్చింది.
బ్రో మూవీ నుంచి సాలిడ్ పోస్టర్ విడుదల
‘బ్రో’ సినిమా నుంచి పవర్ స్టార్ పవన్ కళ్యాణ్, సుప్రీం స్టార్ సాయి ధరమ్ తేజ్ కలిసి ఉన్న సాలిడ్ పోస్టర్ ను మేకర్స్ రివీల్ చేశారు. ముందుగా ప్రకటించినట్లుగానే ఇవాళ(మే 29న) ఉదయం 10.08 నిమిషాలకు పోస్టర్ రిలీజ్ చేశారు. ఇప్పటికే పవర్ స్టార్ అభిమానులతో పాటు సాయి తేజ్ అభిమానులు సైతం ఇద్దరూ కలిసి ఉన్న పోస్టర్ రిలీజ్ చేయాలని కొద్ది రోజులుగా మేకర్స్ ను కోరుతున్నారు. ఫ్యాన్స్ కోరిక మేరకు ఈ పోస్టర్ ను విడుదల చేశారు. పవన్ బైక్ మీద కాలు పెట్టి నిలబడగా, ఆయన మోకాలు మీద చెయ్యిపెట్టి సాయి తేజ్ నిలబడి కనిపించాడు. ప్రస్తుతం ఈ పోస్టర్ నెట్టింట వైరల్ అవుతోంది.
తెలుగు నేటివిటీకి తగ్గట్లుగా కీలక మార్పులు
'బ్రో' అనేది 'వినోదయ సీతం' అనే తమిళ్ చిత్రానికి అధికారిక రీమేక్ అనే సంగతి తెలిసిందే. దేవుడు - భక్తుడి మధ్య ఆసక్తికరమైన కథాంశంతో సముద్రఖని ఈ సినిమాజని రూపొందించారు. ఇందులో సముద్ర ఖని - తంబి రామ‌స్వామి ప్రధాన పాత్రల్లో నటించారు. కానీ ఇక్కడ బ్రో విషయానికొస్తే తెలుగు నేటివిటీకి తగ్గట్టుగా త్రివిక్రమ్ పలు మార్పులు చేర్పులు చేసారు. ఒరిజినల్ సినిమా నుంచి మెయిన్ ప్లాట్ ని మాత్రమే తీసుకున్నారనే టాక్ ఉంది. ఇందులో పవన్ ను మోడరన్ గాడ్ గా చాలా స్టైలిష్ గా చూపించనున్నారు. అతను టైమ్ ఆఫ్ గాడ్ పాత్రను పోషిస్తున్నప్పటికీ, BRO మోషన్ పోస్టర్ లో శివుడి గురించి ప్రస్తావించడాన్ని గమనించవచ్చు. మరోవైపు సాయి తేజ్ పాత్రను మాత్రం మాతృకకు కాస్త భిన్నంగా తీర్చిదిద్దుతున్నారని టాక్. మార్కండేయులు ఫస్ట్ లుక్ మోషన్ పోస్టర్ కూడా ఇదే విషయాన్ని స్పష్టం చేస్తోంది.
జూలై 28న ‘బ్రో’ సినిమా విడుదల
కాగా, 'బ్రో' చిత్రాన్ని జీ స్టూడియోస్ సమర్పణలో పీపుల్ మీడియా ఫ్యాక్టరీ పతాకంపై ప్రతిష్టాత్మకంగా నిర్మిస్తున్నారు. టి.జి. విశ్వప్రసాద్ నిర్మిస్తున్న ఈ సినిమాకి వివేక్ కూచిభొట్ల సహ నిర్మాతగా వ్యవహరిస్తున్నారు. ఎస్ థమన్ సంగీతం సమకూరుస్తున్నారు. సుజిత్ వాసుదేవ్ సినిమాటోగ్రఫీ నిర్వహిస్తుండగా, నవీన్ నూలి ఎడిటింగ్ వర్క్ చేస్తున్నారు. ఈ సినిమాలో కేతిక శర్మ, ప్రియ ప్రకాష్ వారియర్, సముద్ర ఖని, రోహిణి, తనికెళ్ళ భరణి, వెన్నెల కిషోర్, సుబ్బరాజు, నర్రా శ్రీను, అలీ రెజా ఇతర పాత్రలు పోషిస్తున్నారు. 'బ్రో' సినిమా షూటింగ్ దాదాపు పూర్తయింది. ప్రస్తుతం చివరి షెడ్యూల్ చిత్రీకరణ జరుగుతోంది. ఈ చిత్రాన్ని జూలై 28న ప్రపంచవ్యాప్తంగా భారీస్థాయిలో విడుదల చేయడానికి మేకర్స్ సన్నాహాలు చేస్తున్నారు.
Read Also: కమల్‌ హాసన్‌ కామెంట్స్‌కు ‘ది కేరళ స్టోరీ’ డైరెక్టర్ కౌంటర్