Dark Comedy Movies On OTT: ఈరోజుల్లో డార్క్ కామెడీ మూవీస్‌కు కూడా విపరీతమైన పాపులారిటీ పెరిగిపోతోంది. ముఖ్యంగా యూత్ ఇలాంటి సినిమాలను తెగ ఇష్టపడుతున్నారు. ప్రతీ భాషలో తెరకెక్కుతున్న డార్క్ కామెడీ చిత్రాల సంఖ్య పెరుగుతూ వస్తోంది. అలా హాలీవుడ్‌లో ఇలాంటి జోనర్‌లో తెరకెక్కిన చిత్రమే ‘సైలెంట్ నైట్’ (Silent Night). ఈ టైటిల్‌తో హాలీవుడ్‌లో పలు చిత్రాలు తెరకెక్కాయి. కానీ 2021లో విడుదలయిన ‘సైలెంట్ నైట్’ మాత్రం ఒక డార్క్ కామెడీ సెటైరికల్ చిత్రంగా తెరకెక్కింది. ఈ సినిమా హాయిగా చూసి నవ్వుకోవడానికి మాత్రమే కాకుండా చూసే ప్రేక్షకులను ఆలోచించేలా చేస్తుంది.
కథ..
‘సైలెంట్ నైట్’ కథ విషయానికొస్తే.. సైమన్ (మాథ్యు గూడ్), నెల్ (కెయిరా నైట్లే).. తమ ఇంట్లో క్రిస్మస్ పార్టీని ఏర్పాటు చేస్తారు. దానికి తన ఫ్రెండ్స్ అందరినీ పిలుస్తారు. సైమన్, నెల్‌కు ముగ్గురు పిల్లలు. ఆర్ట్ (రోమన్ గ్రిఫిన్ డేవిస్), హార్డీ (హార్డీ), థామస్ (గిల్బీ గ్రిఫిన్ డేవిస్). వారు ఏర్పాటు చేసిన క్రిస్మస్ పార్టీకి ముగ్గురు కపుల్స్ వస్తారు. అందులో ఒకరికి కిట్టీ (డేవిడ మ్యాక్‌కెన్జీ) అనే కూతురు కూడా ఉంటుంది. క్రిస్మస్ డిన్నర్ ప్రారంభమయిన తర్వాత ఒక్కరి మొహంలో కూడా సంతోషం కనిపించదు. ఆర్ట్, కిట్టీ ఒకరినొకరు తిట్టుకుంటూ ఉన్నా కూడా ఎవ్వరూ వారిని ఆపరు. ఆ డిన్నర్ టేబుల్‌పై చూస్తే సరిపడా ఆహారం ఉండదు. అందరి ప్లేట్‌లో కొంచెం ఫుడ్ మాత్రమే ఉంటుంది.
కట్ చేస్తే.. ఆ దేశంలో ఒక విషపూరిత గ్యాస్ విడుదల అవుతూ ఉంటుంది. దాని వల్ల అందరూ చనిపోతూ ఉంటారు. ఆ గ్యాస్‌ను కంట్రోల్ చేసి, ప్రజలను కాపాడాలని ప్రభుత్వం ప్రయత్నించినా కూడా అది జరగదు. దీంతో గ్యాస్ వల్ల ఘోరమైన చావును ఎదుర్కోవడం కంటే నొప్పి లేకుండా చనిపోతే బాగుంటుందని అనుకునేవారి కోసం ప్రభుత్వం.. ఒక ఎగ్జిట్ పిల్‌ను ఇస్తుంది. ఆ ఎగ్జిట్ పిల్‌ను వేసుకోవడం కోసమే సైమస్, నెల్.. ఈ క్రిస్మస్ పార్టీని ఏర్పాటు చేసుంటారు. వారి కొడుకు ఆర్ట్.. చిన్నవాడే అయినా తనకు ఈ విషపూరిత గ్యాస్ మీద నమ్మకం ఉండదు. అందుకే ఎగ్జిట్ పిల్ వేసుకోను అని మారాం చేస్తాడు. కానీ తన తల్లిదండ్రులు తనను ఒప్పిస్తారు. ఆ తర్వాత ఏం జరిగింది? వారందరినీ ఆ గ్యాస్ చంపేసిందా? లేదా ఎగ్జిట్ పిల్ వేసుకొని వారే చనిపోయారా? అనేది తెరపై చూడాల్సిన కథ.
తక్కువ ట్విస్టులు..
‘సైలెంట్ నైట్’లో చెప్పుకోవడానికి పెద్దగా ట్విస్టులు ఏమీ లేకపోవచ్చు. కానీ తర్వాత ఏం జరుగుతుంది అనే ఆసక్తిని క్రియేట్ చేయడంలో మాత్రం దర్శకురాలు క్యామిలీ గ్రిఫిన్ సక్సెస్ అయ్యారు. ఎగ్జిట్ పిల్ వేసుకొని చనిపోవడం కోసమే వారంతా క్రిస్మస్ పార్టీని ఏర్పాటు చేసుకున్నారు అనే ట్విస్ట్ మాత్రం ప్రేక్షకులు ఊహించలేరు. చనిపోయే ముందు మనుషులు ఎలా ఉంటారు అనే అంశాన్ని ‘సైలెంట్ నైట్’లో బాగా చూపించారు. టైమ్ పాస్ కోసం ఒక డార్క్ కామెడీ చిత్రాన్ని చూడాలనుకుంటే ‘నెట్‌ఫ్లిక్స్’లో ఉన్న ‘సైలెంట్ నైట్’ను ట్రై చేయండి.