పవర్ స్టార్ పవన్ కళ్యాణ్ ప్రధాన పాత్రలో దర్శకుడు క్రిష్ 'హరిహర వీరమల్లు' అనే సినిమాను తెరకెక్కిస్తోన్న సంగతి తెలిసిందే. గతేడాది ఈ సినిమా షూటింగ్ మొదలుపెట్టగా.. కరోనా కారణంగా వాయిదా పడింది. ఎట్టకేలకు ఈ సినిమా షూటింగ్ ను పునః ప్రారంభించారు. ప్రస్తుతం ఈ సినిమా షూటింగ్ దశలో ఉంది. రీసెంట్ గా ఈ సినిమా కోసం పవన్ కత్తిసాము ప్రాక్టీస్ చేస్తోన్న వీడియోను షేర్ చేయగా.. అది బాగా వైరల్ అయింది.
ఇదిలా ఉండగా.. ఈ సినిమాలో కొందరు బాలీవుడ్ తారలను ఎంపిక చేసుకున్నారు. అందులో నోరా ఫతేహి కూడా ఉంది. నిజానికి ముందుగా జాక్వెలిన్ ఫెర్నాండేజ్ ను తీసుకోవాలనుకున్నారు కానీ ఫైనల్ గా నోరా ఫతేహిని ఆన్ బోర్డ్ చేసుకున్నారు. ఇదివరకు ఈ బ్యూటీ తెలుగులో కొన్ని ఐటెం సాంగ్స్ లో నటించింది. ఇప్పుడు పవన్ సినిమాలో కీలకపాత్ర పోషించనుంది. కథ ప్రకారం.. ఆమె మహారాజు ఔరంగాజేబ్ సోదరి పాత్రలో కనిపించనుంది.
ఆమెతో హరిహర వీరమల్లు స్నేహం చేస్తుంటాడు. సినిమాలో వీరిద్దరి మధ్య ఓ సాంగ్ కూడా ఉంటుందని సమాచారం. ఇక ఈ సినిమాలో నిధి అగర్వాల్ ను హీరోయిన్ గా కనిపించనుంది. రాకుమారి పాత్రలో ఆమె కనిపించనుంది. మెగా సూర్య ప్రొడక్షన్స్ బ్యానర్ పై ప్రముఖ నిర్మాత ఏఎం రత్నం ఈ సినిమాను నిర్మిస్తున్నారు. దీనికి ఎం.ఎం. కీరవాణి సంగీతం అందిస్తున్నారు.
జ్ఞానశేఖర్ ఛాయాగ్రహణ బాధ్యతలు నిర్వర్తిస్తున్నారు. సాయి మాధవ్ బుర్రా సంభాషణలు అందిస్తున్నారు. తెలుగుతో పాటు హిందీ, తమిళ, మలయాళ భాషల్లో పాన్ ఇండియా స్థాయిలో ఈ సినిమాను విడుదల చేయడానికి సన్నాహాలు చేస్తున్నారు. ఈ ఏడాదే సినిమాను పూర్తి చేసి 2023 సంక్రాంతి కానుకగా సినిమాను విడుదల చేయాలనుకుంటున్నారు.
Also Read: రాజమౌళితో సినిమా చేసిన హీరోలకు ఫ్లాప్స్ తప్పవా? అసలు కారణాలు ఏంటి??