Gangavva: నాకేం దెల్వదు సారు, క్షమించండి! చంద్రబాబుకు గంగవ్వ క్షమాపణ

టీడీపీ అధినేత చంద్రబాబుకు ‘మై విలేజ్ షో’ గంగవ్వ క్షమాపణలు చెప్పారు. చంద్రబాబుకు గ్రహణం పట్టిందన్న వైరల్ వీడియో గురించి ఆమె వివరణ ఇచ్చారు. ఓ ఛానల్ వారు అనమంటే అన్నాను తప్ప తనకేమీ తేలియన్నారు.

‘మై విలేజ్ షో’ ద్వారా మంచి గుర్తింపు తెచ్చుకున్న గంగవ్వ, ఏకంగా బిగ్ బాస్ హౌస్ లోకి అడుగు పెట్టి అందరినీ ఆశ్చర్యపరిచింది. చదువు రాకపోయినా, సోషల్ మీడియా ద్వారా కనీవినీ ఎరుగని రీతిలో పాపులారిటీ దక్కించుకుంది. తాజాగా గంగవ్వకు ఓ పాత వీడియో తలనొప్పులు తెచ్చి పెట్టింది. చివరకు క్షమాపణలు చెప్పే వరకు చేరింది. ఇంతకీ ఆ వీడియో ఏంటి? గంగవ్వ క్షమాపణలు ఎందుకు చెప్పాల్సి వచ్చింది?

గంగవ్వ మాటతో చంద్రబాబుపై ట్రోలింగ్

ఈ ఏడాది ఉగాది సందర్భంగా ఓ చానెల్ వాళ్లు ప్రత్యేక కార్యక్రమం ఏర్పాటు చేశారు. అందులో భాగంగానే బిగ్ బాస్ హౌస్ లోకి వెళ్లి వచ్చిన గంగవ్వతో ఓ ఇంటర్వ్యూ ప్లాన్ చేశారు. అనుకున్నట్లుగానే సదరు చానెల్ ఆమెను ఇంటర్వ్యూ చేశారు. అందులో భాగంగా పలువురు రాజకీయ నాయకుల ఫోటోలు చూపించి ఆమెతో జాతకాలు చెప్పిస్తారు. కొంత మంది లీడర్ల ఫోటోలు చూసి ఆమె జాతకం చెప్తుంది. అదే సమయంలో చంద్రబాబు, లోకేష్ ఫోటోలను కూడా ఆమెకు చూపిస్తారు. వాటిని తను చూసి జాతకం చెప్పనని వెళ్లిపోతుంది. కానీ, సదరు చానెల్ వాళ్లు మళ్లీ మళ్లీ అడగడంతో  “చంద్రబాబుకు గ్రహణం పట్టింది” అని గంగవ్వ చెప్తుంది. ఆ ఒక్క ముక్కను ఎడిట్ చేసి సోషల్ మీడియాలోకి వదిలారు. దానిని బేస్ చేసుకుని చంద్రబాబుపై కొందరు తీవ్ర విమర్శలు చేస్తున్నారు. ట్రోలింగ్ కు దిగుతున్నారు.

చంద్రబాబుకు క్షమాపణ చెప్పిన గంగవ్వ

తాజాగా ఈ వీడియోపై గంగవ్వ స్పందించారు. చంద్రబాబు నాయుడిని తాను కావాలని అలా అనలేదని చెప్పారు. సదరు చానెల్ వాళ్లు చెప్పమంటేనే చెప్పానన్నారు. తన మాటలు ఇబ్బంది పెట్టి ఉంటే క్షమించాలని చంద్రబాబును కోరారు. “‘అందరికీ నమస్కారం. నాకు వాళ్లు ఏదైనా చెబితేనే అంటాను. నా అంతట నాకు ఏదీ అనరాదు. నేను పెద్దగా చదువుకోలేదు. ఆ సారును నేను అనను అంటే టీవీ ఛానల్ వాళ్లు అనిపించారు. మీరు తప్పుగా అనుకోవద్దు. క్షమించండి. నాకు తెలువది ఎక్కువ. అనమంటేనే అన్నా. మీ అందరి వల్లే నాకు ఇంత గూడు అయ్యింది. నేను మాట జారితే క్షమించండి” అని చెప్పుకొచ్చారు. 

‘మై విలేజ్‌ షో’ ద్వారా మంచి గుర్తింపు తెచ్చుకున్న గంగవ్వ

తెలంగాణ యాసలో చక్కటి  వీడియోలు చేస్తూ  మంచి గుర్తింపు తెచ్చుకుంది ‘మై విలేజ్‌ షో’ యూట్యూబ్ చానెల్. ఈ చానెల్ ద్వారా పాపులారిటీ సంపాదించి ఏకంగా బిగ్ బాస్ హౌస్ లోకి ఎంట్రీ ఇచ్చింది గంగవ్వ. తక్కువ రోజులు హౌస్ లో ఉన్నా ప్రేక్షకులను బాగా అలరించింది. ఆ తర్వాత పలు సినిమాల్లో అవకాశాలు దక్కించుకుంటోంది. ప్రస్తుతం సినిమాలతో పాటు, బుల్లితెరపైనా అప్పుడప్పుడు కనిపిస్తూ సందడి చేస్తోంది గంగవ్వ.